ສະຫາຍ ຢ໋າງເຈຍສື ກຳມະການກົມການເມືອງສູນກາງພັກ, ຫົວໜ້າຫ້ອງການຄະນະກຳມະການວຽກງານການຕ່າງປະເທດ ຂອງສູນກາງພັກກອມມູນິດຈີນ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນາງຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາເຕັມແຫ່ງ ສປປ ລາວ ປະຈຳ ສປ ຈີນ ໃນວັນທີ 20 ເມສາ 2022 ນີ້, ທີ່ນະຄອນຫລວງປັກກິ່ງ,

ສະຫາຍ ຢ໋າງເຈຍສື ໄດ້ກ່າວວ່າ: ສາຍພົວພັນຈີນ-ລາວ ໝັ້ນຄົງຂະໜົງແກ່ນ ແລະ ປະຊາຊົນສອງຊາດ ມີຄວາມເຂົ້າໃຈເຊິ່ງກັນ ແລະ ກັນ, ສອງປະເທດໄດ້ກ້າວເຂົ້າສູ່ຍຸກໃໝ່ ຍຸກແຫ່ງການສ້າງປະຊາຄົມຮ່ວມຊາຕາກຳຂອງມວນມະນຸດ.

ພາຍຫລັງເປີດນຳໃຊ້ເສັ້ນທາງລົດໄຟລາວ-ຈີນ ແລ້ວ, ເຫັນວ່າມີປະສິດທິພາບທີ່ດີ, ສອງຝ່າຍໄດ້ໃຫ້ການສະໜັບສະໜູນເຊິ່ງກັນ ແລະ ກັນ

ໃນບັນຫາທີ່ເປັນຜົນປະໂຫຍດໃຈກາງຂອງແຕ່ລະຝ່າຍ, ສອງຝ່າຍຈະສືບຕໍ່ຈັດຕັ້ງປະຕິບັດຄຳເຫັນທີ່ສຳຄັນ ເຊິ່ງເປັນເອກະພາບຮ່ວມກັນຂອງຜູ້ນຳສອງປະເທດ, ຍົກລະດັບ ແລະ ຄຸນນະພາບການຮ່ວມມືດ້ານເສດຖະກິດການຄ້າ, ຊຸກຍູ້ການຮ່ວມມືໃນຂົງເຂດຕ້ານກັບການລະບາດຂອງພະຍາດໂຄວິດ-19 ລວມທັງຊຸກຍູ້ການປັບປຸງຊີວິດການເປັນຢູ່ຂອງປະຊາຊົນ, ວັດທະນະທຳ ແລະ ຂົງເຂດອື່ນໆ ໃຫ້ປະສົບຜົນສຳເລັດໃໝ່ໃຫຍ່ຫລວງກວ່າເກົ່າ.

ໂອກາດນີ້, ສະຫາຍ ນາງ ຄຳເພົາ ເອີນທະວັນ ໄດ້ສະແດງຄວາມຂອບໃຈເປັນຢ່າງສູງມາຍັງ ສປ ຈີນ ທີ່ໄດ້ໃຫ້ການຊ່ວຍເຫລີອອັນລ້ຳຄ່າແກ່ ສປປ ລາວ ໃນການຕ້ານການລະບາດຂອງພະຍາດໂຄວິດ-19 ແລະ ການພັດທະນາເສດຖະກິດ-ສັງຄົມ. ພ້ອມທັງໄດ້ກ່າວຕື່ມວ່າ:

ສປປ ລາວ ໄດ້ຍຶດໝັ້ນການສະໜັບສະໜູນຫລັກໝັ້ນທີ່ເປັນທຳຂອງຈີນ ໃນຜົນປະໂຫຍດໃຈກາງ ແລະ ບັນຫາສາກົນທີ່ສຳຄັນ, ຫວັງວ່າຈະສືບຕໍ່ຮ່ວມກັບຝ່າຍຈີນ ຊຸກຍູ້ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ແລະ ລາວຈະຕັ້ງໜ້າຊຸກຍູ້ການພັດທະນາ ສາຍພົວພັນຄູ່ຮ່ວມຍຸດທະສາດຮອບດ້ານ ອາຊຽນ – ຈີນ ໃຫ້ຂະຫຍາຍຕົວກວ່າເກົ່າ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​: ຂປລ.