ການນຳໃຊ້ ຕື່ມ ແລະ ເຕີມ ແລະ ຄວາມໝາຍໃນພສາລາວ
ເວົ້າລາວກັນ
ພາສາລາວ ອະທິບາຍຄວາມໝາຍຂອງຄຳວ່າ ຕື່ມ ແລະ ເຕີມ.
ໃນບົດນີ້ເຮົາຈະຂໍຍົກເອົາສອງຄຳທີ່ຄ້າຍຄືກັນອີກມາເພື່ອອະທິບາຍ ແລະ ລົມກັນເພື່ອຈະໄດ້ເຂົ້າໃຈພາສາລາວແຕ່ລະຄຳໃຫ້ດີຂື້ນພ້ອມທັງນຳໃຊ້ໃຫ້ຖືກຕ້ອງໃສພາສາລາວ, ສອງຄຳນັ້ນກໍ່ຄື ຕື່ມ ແລະເຕີມ ເຊິ່ງຂ້າພະເຈົ້າຕ້ອງໄດ້ຂໍຂອບໃຈ ເພຈ ປ່ອງຢ້ຽມພາສາລາວ ທີ່ເປັນເພຈ ທີ່ຂ້າພະເຈົ້າຕິດຕາມມາຕະຫລອດ ແລະ ສອງຄຳນີ້ກໍ່ເຊັ່ນດຽວກັນ ໄດ້ນຳເອົາມາຈາກເພຈ ປ່ອງຢ້ຽມພາສາລາວ ມາໃຫ້ບັນໄດ້ທ່ານໄດ້ຮູ້ລະອຽດນຳກັນ.
ຍ້ອນສອງຄຳນີ້ມີຄວາມໝາຍອັນດຽວກັນ ຈຶ່ງມີຄົນສົງໄສວ່າ ອັນໃດຖືກ-ອັນໃດຜິດ, ອັນໃດເໝາະສົມ-ອັນໃດບໍ່ເໝາະສົມ, ອັນໃດທາງການ-ອັນໃດເວົ້າ ແລະ ຈະນຳໃຊ້ແບບໃດເພື່ອໃຫ້ຖືກຕ້ອງຕາມຫລັກການໃນພາສາລາວ, ເຊິ່ງວ່າຄຳວ່າ ຕື່ມ ແລະ ເຕີມ ຖ້າຈະເວົ້າເຖິງຄວາມໝາຍຂອງມັນນັ້ນແມ່ນມີຄວາມໝາຍດຽວກັນຄືໝາຍເຖິງ “ແຖມ, ເຮັດໃຫ້ຫຼາຍຂຶ້ນ, ເພີ່ມເຂົ້າ, ເອົາໃຫ້ອີກ, ເສີມໃສ່…
ຄວາມຈິງຄຳສອງຄຳນີ້ມີບໍລິບົດທີ່ແຕກຕ່າງເຊັ່ນ:
- ໄດ້ຂໍ້ມູນເພີ່ມເຕີມຈາກ…..
- ຊອກຫາຂໍ້ມູນເພີ່ມຕື່ມໄດ້ທີ່….
- ເຕີມຮັກທີ່ຂາດຫາຍ ເຕີມໃຈທີ່ຂາດຮັກ
- ເຕີມຮັກເຕີມໃຈ (ຖ້າວ່າຕື່ມໃຈ ຈະໝາຍເຖິງເຮັດໃຫ້ມີຫຼາຍໃຈ)
- ເພີ່ມເຕີມເສີມໃສ່
- ໃສ່ອີກຕື່ມ, ເອົາຕື່ມ, ກິນຕື່ມ
- ຕື່ມໃສ່ບ່ອນວ່າງ
- ບັດຕື່ມເງິນ
- ຂ້ອຍຊິແວ່ເຕີມນໍ້າມັນລົດ ເງິນບໍ່ພໍຂໍຕື່ມແດ່
- ຕື່ມໃສ່ຜູ້ລະເລັກລະໜ້ອຍ ເພື່ອໃຫ້ເຕີມເຕັມ
- ນໍ້າແກງໜ້ອຍ ເອົານໍ້າໃສ່ຕື່ມ
- ເມື່ອກີ້ຂ້ອຍເຫັນນໍ້າແກງໜ້ອຍ ຈຶ່ງເຕີມນໍ້າໃສ່ອີກຕື່ມ
- ສຳລັບບໍລິບົດຂອງກອນສາມາດທົດແທນກັນໄດ້ເຊັ່ນ -ເຕີມຕື່ມນໍ້າ…ນົວເພີ່ມພໍດີ
- ຄັນວ່າເຮົາເຕີມເຕັມ ຕື່ມໃຈຈອງໄວ້
- ພຽງແຕ່ເຕີມເຕັມໃຫ້ ຫົວໃຈເຕັມຕື່ມ ……..
ຈາກການຍົກຕົວຢ່າງມາຂ້າງເທິງ ເຫັນໄດ້ວ່າ ທັງຕື່ມ ແລະເຕີມສາມາດໄປນຳກັນ, ທົດແທນກັນໄດ້ ແຕ່ກໍເຫັນຄວາມແຕກຕ່າງເຊັ່ນ
- ອີກຕື່ມ ບໍ່ໃຊ້ຄຳວ່າ ອີກເຕີມ ຈະກາຍ ເຕີມອີກ,
- ເອົານໍ້າໃສ່ຕື່ມ = ເຕີມນໍ້າໃສ່
- ຕື່ມບໍ່ໃຊ້ກັບຄວາມຮັກ.
ສະຫຼຸບຄື:
- ຕື່ມ ຈະໄດ້ເປັນຈຳນວນນັບຫຼາຍຂຶ້ນ
- ເຕີມ ຈະໄດ້ຫຼາຍ ເພີ່ມຂຶ້ນ ແຕ່ບໍ່ເປັນຈຳນວນນັບ ອາດເປັນບໍລິມາດ ຫຼື ຄວາມຮູ້ສຶກ.
ແລະ ໄດ້ຍິນບາງທ່ານເຂົາເຈົ້າໜ້າຈະເດົາເອົາວ່າ ຕື່ມ ໜ້າຈະເກີດຫຼັງ ເຕີມ ອັນນີ້ເປັນຄວາມຄິດເຫັນສ່ວນບຸກຄົນບໍ່ໄດ້ມີເອກະສານອ້າງອີງຫຍັງເປັນພຽງການສັນນິຖານ
ເມື່ອເຮົາເວົ້າຄຳວ່າ ເຕີມ ເປັນສຽງສັ້ນ ເຕິມ ຈະຄ້າຍກັບ ຕື່ມ ແລະ ຕື່ມ ມີວັນນະຍຸດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ປ່ອງຢ້ຽມພາສາລາວ
