ໃນວັນທີ 5 ເມສາ 2023 ກອງປະຊຸມກາງສະໄໝຂອງໜ່ວຍພັກຮາກຖານສະຫະພັນແມ່ຍິງ (ສຍ) ແຂວງເຊກອງ ໄດ້​ສິ້ນ​ສຸດ​ລົງ ໂດຍການເປັນປະທານຂອງສະຫາຍ ເຫລັກໄຫລ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ສະຫາຍ ນາງ ວິໄລວັນ ດາລາສິນ ກຳມະການພັກແຂວງ, ເລຂາໜ່ວຍພັກຮາກຖານ, ປະທານ ສຍ ແຂວງ ພ້ອມດ້ວຍສະມາຊິກພັກພາຍໃນໜ່ວຍ ເຂົ້າ ຮ່ວມ.

ສະຫາຍ ນາງ ວິໄລວັນ ດາລາສິນ ໄດ້ຕີລາຄາຜົນສໍາເລັດ ການຈັດຕັ້ງປະຕິບັດມະຕິ ກອງປະຊຸມກາງສະໄໝ ຄັ້ງທີ IX ຂອງໜ່ວຍພັກ ໃນໄລຍະ 2 ປີ (2020-2023) ວ່າ: ໜ່ວຍພັກຮາກຖານ ສຍ ແຂວງ ເປັນໜ່ວຍພັກໜຶ່ງ ທີ່ຂຶ້ນກັບຄະນະບໍລິຫານງານພັກແຂວງ, ສາຍຕັ້ງຂຶ້ນກັບການຊີ້ນໍາໂດຍກົງຂອງ ສູນກາງສະຫະພັນແມ່ຍິງລາວ, ສາຍ ຂວາງຂຶ້ນກັບການຊີ້ນໍາ-ນໍາພາຂອງຄະນະປະຈໍາພັກແຂວງ.

ຜ່ານມາຄະນະໜ່ວຍ ໄດ້ເອົາໃຈໃສ່ສຶກສາອົບຮົມການ ເມືອງນຳພາແນວຄິດ ແລະ ເຕົ້າໂຮມຄວາມສາມັກຄີ ພາຍໃນຂອບເຂດຄວາມຮັບຜິດຊອບຂອງຕົນ ຢ່າງເປັນປະຈຳ ແລະ ຕໍ່ເນື່ອງ ເປັນຕົ້ນ ໄດ້ນຳເອົາເອກະສານສຳຄັນຕ່າງໆ

ໂດຍສະເພາະ ມະຕິຕ່າງໆຂອງພັກ ແລະ ລະບຽບກົດ ໝາຍຂອງລັດ, ຂອງສະຫະພັນແມ່ຍິງມາຈັດຕັ້ງເຜີຍແຜ່, ຄົ້ນຄວ້າຮ່ຳຮຽນ, ຝຶກກອົບຮົມ, ສຳມະນາ ແລະ ຈັດຕັ້ງການປາຖະກະຖາ.

ພ້ອມກັນນີ້, ໜ່ວຍພັກຮາກຖານ ສຍ ແຂວງ ຍັງໄດ້ເຂົ້າຮ່ວມເຊື່ອມຊຶມມະຕິ ແລະ ເອກະສານສຳຄັນຕ່າງໆ ຂອງພັກ-ລັດ ນຳຄະນະພັກ-ອົງການປົກຄອງຈັດຂຶ້ນຢ່າງເປັນປະຈໍາ, ເອົາໃຈໃສ່ນໍາພາ-ຊີ້ນໍາ ດຳເນີນຮ່ວມຊີວິດພັກ ປົກກະຕິ ເພື່ອເປັນການຕໍານິຕິຊົມ ແລະ ກໍ່ສ້າງຊ່ວຍເຫລືອເຊິ່ງກັນ ແລະ ກັນ ເຮັດໃຫ້ສະມາຊິກພັກທຸກສະຫາຍ ມີສະຕິ ຕໍ່ກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກ

ປະກອບສ່ວນເຂົ້າໃນການກໍ່ສ້າງຮາກຖານການ ເມືອງຂອງພັກ, ຮັກສາຄວາມເປັນລະບຽບຮຽບຮ້ອຍ ແລະ ອະນຸລັກຮັກສາຮີດຄອງປະເພນີອັນດີງາມ ຂອງ ຊາດຂອງເຜົ່າ, ຊຶ່ງສາມາດຈັດປະເພດສະມາຊິກພັກແຂງ ໄດ້ 13 ສະຫາຍ, ຍິງ 12 ສະຫາຍ, ກາງ 3 ສະຫາຍ, ຍິງ 3 ສະຫາຍ, ໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ 3 ປີຊ້ອນ.

ໂອກາດນີ້, ເລຂາໜ່ວຍພັກ ສຍ ຍັງໄດ້ຜ່ານທິດທາງແຜນການໄລຍະ 2 ປີເຄິ່ງ ທ້າຍສະໄໝ (2024-2025), ຜ່ານຮ່າງແຜນດຳເນີນງານກອງປະຊຸມໃຫຍ່ຄັ້ງທີ IX ແລະ ຜ່ານບົດສໍາຫລວດການ ນໍາພາ-ຊີ້ນໍາລວມ ຂອງຄະນະພັກ ໃນໄລຍະຜ່ານມາຕື່ມອີກ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: ຂປລ.