ມອບເຄື່ອງບັນເທົາທຸກໃຫ້ຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມ
ຄອບຄົວຜູ້ໄດ້ຮັບຜົນກະທົບ ຈາກໄພນໍ້າຖ້ວມຢູ່ແຂວງໄຊຍະບູລີ ໄດ້ຮັບເຄື່ອງຊ່ວຍເຫຼືອ.
ດັ່ງທີ່ໄດ້ຮູ້ກັນດີແລ້ວວ່າຫລາຍແຂວງທາງພາກເຫນືອຂອງ ສປປ ລາວ ເຮົາ ໄດ້ເກີດມາພະຍຸໄພພິບັດເຂົ້າຢ່າງຮ້າຍແຮງໂດຍສະເພາະແຂວງໄຊຍະບູລີໄດ້ຖືກໄພພິບັດທຳມະຊາດຖະຫລົ່ມຢ່າງຮ້າຍແຮງ ແລະ ໄດ້ສ້າງຄວາມເສຍຫາຍຈ່ຳນວນຫລວງຫລາຍໃຫ້ແກ່ຫລາຍຄອບຄົວ ແລະ ກໍໄດ້ມີຫລາຍພາກສ່ວນເຂົ້າໃຫ້ຄວາມຊ່ວຍເຫລືອແລ້ວຈາກນ້ຳຈິດນ້ຳໃຈຂອງຫລາຍພາກສ່ວນ.
ຫລ້າສຸດ ໃນລະຫວ່າງວັນທີ 24-25 ມິຖຸນາ, ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ, ທ່ານ ໜູເກນ ພັນລັກ ວ່າການ ຫົວໜ້າພະແນກ ຮສສ ແຂວງ ພ້ອມຄະນະ ໄດ້ນໍາເອົາເຄື່ອງຊ່ວຍເຫຼືອບັນເທົາທຸກມາມອບໃຫ້ຜູ້ປະຊົບໄພພິບັດຢູ່ເມືອງເງິນ, ເມືອງ ຫົງສາແລະ ເມືອງ ໄຊສະຖານ ໂດຍສະເພາະແມ່ນຄອບຄົວຜູ້ທີ່ຖືກນໍ້າຊຸເຮືອນໄຫຼ, ດິນເຈື່ອນຖົມເຮືອນ, ເນື້ອທີ່ທໍາການຜະລິດ, ສັດລ້ຽງ ແລະ ອື່ນໆ.
ເຄື່ອງຊ່ວຍເຫຼືອບັນເທົາທຸກປະກອບມີ: ນໍ້າດື່ມ, ເຂົ້າສານ, ອາຫານແຫ້ງ, ເຄື່ອງນຸ່ງ-ຮົ່ມ ແລະ ເຄື່ອງໃຊ້ເຮືອນຄົວ.ຜົນເສຍຫາຍຈາກໄພພິບັດຄັ້ງນີ້ ຢູ່ເມືອງ ຫົງສາ ເກີດດິນເຈື່ອນຖົມເຮືອນ ມີ 1 ຫຼັງ, ມີຈຳນວນພົນ 2 ຄົນ ຍິງ 1 ຄົນ ( ບໍ່ສາມາດອາໄສຢູ່ໄດ້ ) ລວມມູນຄ່າເສຍຫາຍ 54ລ້ານກວ່າກີບ; ເມືອງ ເງິນ ນ້ຳຖ້ວມເຮືອນ 1 ບ້ານ ມີ 19 ຄອບຄົວ ຈຳນວນພົນ 71 ຄົນ(ຍິງ 33 ຄົນ) ລວມມູນຄ່າເສຍຫາຍ 47,7ລ້ານກວ່າກີບ, ດິນເຈືອນຖົມເຮືອນ 1 ຫຼັງ ມູນຄ່າເສຍຫາຍ 150ລ້ານກີບ;ເມືອງໄຊສະຖານ ນ້ຳຖ້ວມເຮືອນ 1 ບ້ານ ຈຳນວນ 17 ຄອບຄົວ ຈຳນວນພົນ 99 ຄົນ(ຍິງ 43 ຄົນ) ລວມມູນຄ່າເສຍຫາຍ 99,6ລ້ານກວ່າ ກີບ.
ໂອກາດດັ່ງກ່າວ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ ກໍໄດ້ຮຽກຮ້ອງໃຫ້ຄະນະກໍາມະການຄຸ້ມຄອງໄພພິບັດຂັ້ນເມືອງຈົ່ງສືບຕໍ່ໃຫ້ການຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບ, ເລັ່ງເກັບກໍາຂໍ້ມູນຜົນເສຍຫາຍໃຫ້ລະອຽດ ແລະ ວ່ອງໄວ, ຊັດເຈນ, ມີມູນຄວາມຈິງ, ສຶກສາອົບຮົມປະຊາຊົນໃຫ້ມີຄວາມເຂົ້າໃຈໃນການຊ່ວຍເຫຼືອຂອງພາກລັດ, ເຖິງວ່າບໍ່ໄດ້ຕາມຄວາມຕ້ອງການແຕ່ກໍສາມາດແບ່ງເບົາພາລະຂອງຄອບຄົວ, ພ້ອມດຽວກັນກໍໃຫ້ຈັດສັນທີ່ຢູ່ອາໄສໃໝ່ໃຫ້ກັບປະຊາຊົນເຂດທີ່ມີຄວາມສ່ຽງ.
ຂອບໃຈແຫລ່ງທີ່ມາ: laoedaily.com