ຂ່າວດີ! ໂຮງໝໍແມ່ ແລະ ເດັກຈັບມືກັບກຸ່ມບໍລິສັດຈີນປິ່ນປົວຄົນມີລູກຍາກ
laoedaily.com.la
ໂຮງຫມໍແມ່ ແລະ ເດັກເກີດໃຫມ່ ແລະ ກຸ່ມບໍລິສັດ ອີໂປຊື ຈຳກັດ ຮ່ວມມືກັນ ໃຫ້ບໍລິການປິ່ນນປົວການມີລູກຍາກ.
ຖືວ່າເປັນຂ່າວດີສຸດໆເລີຍ ສຳລັບຫລາຍໆຄົນທີ່ມີລູກຍາກ, ໃນໄລຍະຜ່ານມາກໍໄດ້ຮູ້ຈັກ ແລະ ມີໝູ່ຄູ່ອ້າຍເອື້ອຍນ້ອງຫລາຍຄົນທີ່ຢາກມີແຕ່ກໍມັກມີບັນຫາບາງທ່ານກໍມີແລ້ວລຸອອກ ບາງທ່ານກໍເຮັດແບບໃດກໍບໍ່ມີ ບາງຄົນມີເງິນແດ່ກໍຂ້າມໄປປະເທດເພືອນບ້ານເພື່ອໄປເຮັດກິບ ຫລື ປະສົມຈາກທາງນອກແລ້ວຈິ່ງເອົາເຂົ້າທ້ອງແມ່ ຫລາຍໆທ່ານກໍໄປເຮັດບໍ່ໄດ້ເນື່ອງຈາກຂາດທືນຮອນອຳນວຍຄວາມສະດວກ.
ໃນໄລຍະບໍ່ດົນມານີ້, ສູນຂ່າວສານການແພດສຸຂະສຶກສາ ລາຍງານວ່າ: ເພື່ອເປັນການຊ່ວຍເຫຼືອປັບປຸງວຽກງານການປິ່ນປົວດ້ວຍເຕັກນິກການແພດທັນສະໄຫມ ຕາມນະໂຍບາຍຂອງລັດຖະບານ ໃນໂຮງໝໍຂັ້ນຕ່າງໆ ໃນຂອບເຂດທົ່ວປະເທດ, ໂດຍສະເພາະ ໂຮງໝໍແມ່ ແລະ ເດັກເກີດໃໝ່ ໃຫ້ມີຄວາມພ້ອມທາງດ້ານພື້ນຖານໂຄງລ່າງ ໃຫ້ເປັນລະບົບຄົບຊຸດ,
ເຄື່ອງຈັກ-ອຸປະກອນ, ເຕັກນິກ-ເຕັກໂນໂລຊີ ຕະຫຼອດຮອດການຮຽນ, ການສອນ, ການຖອດຖອນບົດຮຽນ ແລະ ປະສົບການ, ການບຳລຸງ-ກໍ່ສ້າງພະນັກງານຂອງໂຮງໝໍ ທາງດ້ານວິຊາການແພດ ການປິ່ນປົວມີລູກຍາກ ດ້ວຍເຕັກນິກ-ວິຊາການ ທີ່ທັນສະໄໝໃຫ້ນັບມື້ພັດທະນາຂື້ນ.
ໂຮງຫມໍແມ່ ແລະ ເດັກເກີດໃຫມ່ ແລະ ກຸ່ມບໍລິສັດ ອີໂປຊື(ກວາງໂຈ)ຈຳກັດ ຈຶ່ງໄດ້ເຮັດການຮ່ວມືດ້ານເຕັກນິກການປິ່ນປົວມີລູກຍາກ ໃນໂຮງໝໍແມ່ ແລະ ເດັກເກີດໃໝ່ ກໍ່ຄືຮ່ວມກັບກະຊວງສາທາລະນະສຸກ ສປປ ລາວ ເພື່ອຄວາມເຂັ້ມແຂງດ້ານການໃຫ້ບໍລິການສຸຂະພາບແມ່ທີ່ມີລູກຍາກ
25 ມິຖຸນາ 2021 ໂຮງແຮມດອນຈັນພາເລດ ໄດ້ມີພິທີເຊັນສັນຍາການຮ່ວມມືກັນໄດ້ມີການເຊັນລົງນາມໂດຍ ທ່ານ ດຣ ສີວັນໄຊ ຈັນທະວົງສັກ ຄະນະອຳນວຍການໂຮງໝໍແມ່ ແລະ ເດັກເກີດໃໝ່ ແລະ ທ່ານ ຢາງຊົງເມ ປະທານ ກຸ່ມບໍລິສັດ ອີໂປຊື(ກວາງໂຈ) ຈຳກັດ.
ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ . ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍບັນດາຫົວໜ້າ/ຮອງຫົວໜ້າ ຫ້ອງການ, ຫົວໜ້າກົມ, ຜູ້ອໍານວຍການໂຮງໝໍ, ມະຫາວິທະຍາໄລ ວິທະຍາສາດ ສຸຂະພາບ, ສະມາຄົມປະສູດພະຍາດຍິງ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຂອບໃຈແຫລ່ງທີ່ມາ: laoedaily.com
