ອົງການກອງທຶນອະນຸລັກທໍາມະຊາດໂລກ ປະຈໍາ ລາວ (WWF-Laos) ຖືໂອກາດນີ້ສະແດງຄວາມເສຍໃຈຮ່ວມກັບສັງຄົມ ກໍ່ຄື ສປປ ລາວ ຕໍ່ການສູນເສຍສັດນໍ້າ ອັນລໍ້າຄ່າ (ປາຂ່າ) ຂອງແມ່ນໍ້າຂອງ ເພີ່ມອີກຈໍານວນ 1 ໂຕ ໃນວັນທີ 15 ກຸມພາ 2022 ທີ່ຜ່ານມາ ນີ້ (ຕາຍ 2 ໂຕ ໃນໄລຍະ ກາງປີ 2021). ທັ້ງ 3 ໂຕ ທີ່ພົບເຫັນຕາຍ ແມ່ນເຫັນຢູ່ຝັ່ງກໍາປູເຈຍ ແຕ່ຄາດວ່າຕາຍ ແລະ ໄຫຼຈາກຝັ່ງຂອງລາວ.

ຈາກການໃຫ້ຂໍ້ມູນຂອງທີມງານລາດຕະເວນ ຫຼື ເຈົ້າໜ້າທີ່ຄຸ້ມຄອງວັງອະນຸລັກປາຂ່າ ໃນໄລຍະ 2-3 ປີທີ່ຜ່ານມາ ສາມາດພົບເຫັນປາຂ່າ ປະມານ 3-4 ໂຕ ແລະ ຈໍານວນ 2 ໂຕທີ່ຕາຍໃນກາງປີ 2021 ແລະ ອີກ 1 ໂຕ ໃນວັນທີ 15 ກຸມພາ 2022 ນີ້ ອາດນອນຢູ່ໃນຈໍານວນທີ່ທີມງານລາດຕະເວນ ພົບເຫັນ ນັ້ນສະແດງໃຫ້ເຫັນວ່າ ປາຂ່າຢູ່ໃນແມ່ນໍ້າຂອງ ໃນ ສປປ ລາວ ອາດຕົກຢູໃນສະຖານະການ ສ່ຽງຕໍ່ການສູນພັນ ຂັ້ນສູງສຸດ.

ຈາກການຕາຍຂອງປາຂ່າໃນຄັ້ງນີ້ ເຮັດໃຫ້ກະຈ່າງແຈ້ງຂຶ້ນອີກວ່າ ວຽກງານອະນຸລັກ ແລະ ມາດຕະການຕໍ່ການຄຸ້ມຄອງ ສັດນໍ້າ ຈໍາຕ້ອງເພີ່ມທະວີຄູນຂຶ້ນ ໂດຍສະເພາະຕໍ່ຊະນິດພັນສັດນໍ້າ ທີ່ໄກ້ຈະສູນພັນຈາກແມ່ນໍ້າຂອງ ເຊັ່ນ ປາຝາໄລ, ປາບຶກ ແລະ ອື່ນໆ ກ່ອນຈະຊ້າເກີນໄປ.

ປາຂ່ານໍ້າຈືດ ມີທັ້ງໝົດ 6 ສາຍພັນ ແລະ ໜຶ່ງໃນ 6 ສາຍພັນນີ້ແມ່ນພົບເຫັນຢູ່ແມ່ນໍ້າຂອງ ສະເພາະໃນ ລາວ ແລະ ກໍາປູເຈຍ (ຝັ່ງກໍາປູເຈຍແມ່ນຍັງມີປະມານ 89 ໂຕ ຈາກການສໍາລວດໃນປີ 2020) ແຕ່ຕອນນີ້ ຈາກການຕາຍຂອງປາຂ່າ 3 ໂຕ ໃນລະຫວ່າງປີ 2021-2022 ນີ້ ອາດຍາກທີ່ຈະເວົ້າໄດ້ວ່າ ປາຂ່າຍັງມີຢູ່ໃນ ສປປ ລາວ ເພາະລະຫວ່າງ 2-3 ປີທີ່ຜ່ານມາ ການພົບເຫັນປາຂ່າໃນລາວແມ່ນມີປະມານ 3-4 ໂຕເທົ່ານັ້ນ.

ປາຂ່ານໍ້າຈືດຄືໜຶ່ງໃນຊະນິດພັນສັດນໍ້າ ປະເພດຫວງຫ້າມ ບັນຊີ 1 ແລະ ຍັງນອນຢູ່ໃນບັນຊີແດງ ວ່າດ້ວຍສັດນໍ້າ-ສັດປ່າ ທີ່ໄກ້ຈະສູນພັນ ຂອງ IUCN.

ອົງການ WWF-Laos ຮຽກຮ້ອງມາຍັງທຸກຄົນ ທຸກພາກສ່ວນຈົ່ງໃຫ້ຄວາມສໍາຄັນ ແລະ ຮ່ວມແຮງກັນຕໍ່ການປົກປັກຮັກສາ ແລະ ອະນຸລັກສັດນໍ້າ-ສັດປ່າ ທີ່ໄກ້ຈະສູນພັນ ໃຫ້ຢູ່ກັບແມ່ນໍ້າຂອງ ແມ່ນໍ້າສາຂາຕ່າງໆ ຢູ່ກັບຜືນປ່າ ແລະ ຊຸມຊົນ ກໍ່ຄື ປະເທດລາວ ເຮົາ.