ແຫຼ່ງທ່ອງທ່ຽວທຳມະຊາດ ບໍ່ນ້ຳປຸ້ນ ເມືອງປາກລາຍ ແຂວງໄຊຍະບູລີ
ອິນໄຊລາວ
ມາຮູ້ຈັກກັບ ບໍ່ນ້ຳປຸ້ນ ແຫຼ່ງທ່ອງທ່ຽວທຳມະຊາດແຫ່ງໃໝ່ຂອງ ເມືອງ ປາກລາຍ
ເນືອງໃນໂອກາດທີ່ລັດຖະບານໄດ້ເປີດໃຫ້ມີເຂດທ່ອງທ່ຽວສີຂຽວຫລັງຈາກສະພາບການໂຄວິດ-19 ຊາລົງ, ຫລາຍໆ ແຫລ່ງທ່ອງທ່ຽວກໍໄດ້ມີການພັດທະນາຂື້ນເພື່ອເພີ່ມຊອງທາງໃນການເຮັດວຽກເຮັດງານໃຫ້ແກ່ປະຊາຊົນ, ແລະ ເພື່ອເປັນການພັດທະນາແຫຼ່ງທ່ອງທ່ຽວທາງທໍາມະຊາດ ກໍຄືເປັນການຕ້ອນຮັບນັກທ່ອງທ່ຽວທີ່ຈະເດີນທາງມາທ່ຽວ ເມືອງປາກລາຍ ໃຫ້ມີໂສມໜ້າໃໝ່
ສະນັ້ນ, ໃນວັນທີ 12 ກຸມພາ 2022 ທີ່ຜ່ານມາ ຢູ່ທີ່ບ້ານ ເມືອງປາ, ເມືອງ ປາກລາຍ, ແຂວງ ໄຊຍະບູລີ ຈຶ່ງໄດ້ຈັດພິທີເປີດ ແຫຼ່ງທ່ອງທ່ຽວທາງທຳມະຊາດ ບໍ່ນ້ຳປຸ້ນ ຂຶ້ນຢ່າງເປັນທາງການ ໂດຍເປັນກຽດເຂົ້າຮ່ວມຂອງ ທ່ານ ກອງສີ ວົງສີ, ກຳມະການພັກແຂວງ, ເລຂາພັກເມືອງເຈົ້າເມືອງໆປາກລາຍ, ມີຫົວໜ້າຫ້ອງການທີ່ກ່ຽວຂ້ອງ, ມີຜູ້ສຳປະທານ ແລະ ອຳນາດການປົກຄອງບ້ານເຂົ້າຮ່ວມ.
ຖ້າຈະເວົ້າເຖິງ “ບໍ່ນໍ້າປຸ້ນ” ນອນຢູ່ໃນຂອບເຂດ ບ້ານ ເມືອງປາ, ເມືອງ ປາກລາຍ, ແຂວງ ໄຊຍະບູລີ ເຊິ່ງຫ່າງຈາກເທດສະບານເມືອງ ໄປທາງທິດຕາເວັນອອກສ່ຽງເໜືອປະມານ 53 ກິໂລແມັດ, ຂອບເຂດດັ່ງກ່າວມີເນື້ອທີ່ທັງໝົດ 2,76 ເຮັກຕາ
ໂຄງການ ພັດທະນາແຫຼ່ງທ່ອງທ່ຽວທຳມະຊາດ ບໍ່ນ້ຳປຸ້ນ ເປັນການລົງທຶນຮູບແບບກໍ່ສ້າງ, ດຳເນີນງານ, ມອບໂອນຂອງເອກະຊົນພາຍໃນ 100%
ເຊິ່ງມີທຶນຈົດທະບຽນ 536 ລ້ານກີບ, ອາຍຸການສຳປະທານ 25 ປີ, ປັດຈຸບັນ ແມ່ນສ້າງສຳເລັດແລ້ວ 80%, ຍັງຄ້າງຄາ 20% ແມ່ນການຕົບແຕ່ງຕົ້ນໄມ້, ຕົບແຕ່ງອ່າງນ້ຳປຸ້ນ, ບັງກາໂລ ແລະ ວຽກລະອຽດຈຳນວນໜຶ່ງ.
ແຫຼ່ງທ່ອງທ່ຽວທຳມະຊາດ ບໍ່ນ້ຳປຸ້ນ ສາມາດຮອງຮັບແຂກໄດ້ທັງໝົດ 30 ຫາ 40 ຄົນຕໍ່ມື້, ມີຕູບຮອງຮັບການໄປພັກຜ່ອນຈຳນວນ 6 ຫຼັງ, ມີບ່ອນພັກເຊົາຄ້າງຄືນຈຳນວນ 3 ຫຼັງ, ມີຮ້ານກິນດື່ມຮອງຮັບແຂກຈຳນວນ 1 ຫຼັງ.
ໂອກາດດຽວກັນນີ້ທ່ານ ກອງສີ ວົງສີ, ເຈົ້າເມືອງໆປາກລາຍ ກໍໄດ້ລົງຊຸກຍູ້ການສ້າງຂົວຂ້າມແມ່ນ້ຳຄານ ຢູ່ບ້ານ ປາກຄານ ແລະ ໄດ້ນຳເອົາປູນຈຳນວນ 5 ໂຕນ ລວມມູນຄ່າ 4.000.000 ກີບ ໄປມອບໃຫ້ອຳນາດການປົກຄອງບ້ານ ປາກຄານ ເພື່ອກໍ່ສ້າງຫໍປະຊຸມບ້ານ ແລະ ນຳເອົາຄອມພິວເຕີຈຳນວນ 1 ຊຸດ ມູນຄ່າ 1.500.000 ກີບ ມອບໃຫ້ໂຮງຮຽນ ມຕ ບ້ານ ໜອງໄຄ ອີກຕື່ມ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ອິນໄຊລາວ.
