ສູນກາງຊາວໜຸ່ມຈັດພິທີການແຂ່ງຂັນປະກວດສິ່ງປະດິດຈາກສິ່ງເສດເຫຼືອໃຊ້ ປະຈຳປີ 2022

ໄດ້ມີການຈັດກິດຈະກຳການແຂ່ງຂັນປະກວດສິ່ງປະດິດຈາກສິ່ງເສດເຫຼືອໃຊ້ ປະຈຳປີ 2022 ໄດ້ຈັດຂຶ້ນໃນ ວັນ ທີ 22 ເມສາ ນີ້ ທີ່ສູນກາງຊາວໜຸ່ມປະຊາຊົນ ປະຕິວັດລາວ

ໂດຍການເຂົ້າຮ່ວມຂອງ ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ຜູ້ຊີ້ນຳວຽກງານຂະບວນການຊາວໜຸ່ມ, ມີບັນດາຫົວໜ້າກົມ, ຮອງກົມ ແລະ ພາກສ່ວນກ່ຽວຂ້ອງເຂົ້າຮ່ວມ.

ການຈັດກິດຈະກຳຄັ້ງນີ້ ເພື່ອເປັນການສ້າງຂະບວນການຊົມເຊີຍວັນຊາດທີ 2 ທັນວາ ຄົບຮອບ 47 ປີ, ວັນເກີດປະທານ ໄກສອນ ພົມວິຫານ ຄົບຮອບ 102 ປີ, ວັນເກີດປະທານ ສຸພານຸວົງ ຄົບຮອບ 113 ປີ, ວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 67 ປີ, ວັນສ້າງຕັ້ງ ຄະນະຊາວໜຸຸ່ມປະຊາຊົນ ປະຕິວັດລາວ ຄົບຮອບ 67 ປີ

ແລະ ເພື່ອໃຫ້ເປັນຂະບວນການອະນຸລັກຮັກສາສິ່ງແວດລ້ອມໃຫ້ຍືນຍົງເຫັນໄດ້ວ່າຊາວໜຸ່ມມີບົດບາດສຳຄັນໃນການຂັບເຄື່ອນວຽກງານດັ່ງກ່າວ.

ດັ່ງນັ້ນ ສູນກາງຊາວໜຸ່ມປະຊາຊົນ ປະຕິວັດລາວ ໃນຖານະຮັບຜິດຊອບໃນການນຳພາຂະບວນການເຄື່ອນໄຫວຕ່າງໆຂອງຊາວໝຸ່ມ, ໂດຍສະເພາະພະແນກແຂ່ງຂັນກົມຂະບວນການຊາວໜຸ່ມ ຊຶ່ງມີພາລະບົດບາດໃນການສົ່ງເສີມພອນສະຫວັນ, ຫົວຄິດປະດິດສ້າງດ້ານຕ່າງໆຂອງຊາວໜຸ່ມ ຈຶ່ງໄດ້ຈັດການແຂ່ງຂັນປະກວດສິ່ງປະດິດຈາກສິ່ງເສດເຫຼືອໃຊ້ ພາຍໃນນະຄອນຫຼວງວຽງຈັນ ຂຶ້ນເພື່ອປູກຈິດສຳນຶກຮັກສາສິ່ງແວດລ້ອມ ແລະ ທັງເປັນການສົ່ງເສີມຫົວຄິດປະດິດສ້າງຂອງຊາວໜຸ່ມຕື່ມອີກ, ການແຂ່ງຂັນຄະນະກຳມະການໄດ້ຄັດເລືອກເອົາ 8 ທີມ ຄື:

ທີມ Passion, ທີມຂັນໄຊ ສອນມາລາ, ທີມຫຼຸດຜ່ອນຂີ້ເຫຍື້ອໃນສັງຄົມ, ທີມປະຍຸກໃຊ້, ທີມ NRD, ທີມສະຫຼາດຄິດ, ທີມສະຫວ່າງສະໄຫວ, ແລະ ທີມ VL ເພື່ອມາຊີງອັນດັບ 1,2 ແລະ 3.

ຜົນຂອງການປະກວດທີມທີ່ໄດ້ ອັນດັບ 1 ແມ່ນທີມ ປະຍຸກໃຊ້ ໄດ້ຮັບເງິນລາງວັນ 2.000.000 ກີບ, ອັນດັບ 2 ແມ່ນທີມ Passion ໄດ້ຮັບເງິນລາງວັນ 1.500.000 ກີບ ແລະ ອັນດັບ 3 ແມ່ນທີມ ສະຫວ່າງສະໄຫວ ໄດ້ຮັບເງິນລາງວັນ 1.000.000 ກີບ.

ດັ່ງທີ່ຮູ້ນໍາກັນແລ້ວວ່າໄລຍະຜ່ານມາເສດຖະກິດ-ສັງຄົມ ຂອງ ສປປ ລາວ ໄດ້ມີການຂະຫຍາຍຕົວຢ່າງຕໍ່ເນື່ອງ ແລະ ກຳລັງມີການພັດທະນາ ໂດຍສະເພາະແມ່ນການຂະຫຍາຍຕົວດ້ານອຸດສາຫະກຳ, ການພັດທະນາດ້ານໂຄງລ່າງພື້ນຖານຂອງເສດຖະກິດໄດ້ຮັບການປັບປຸງ, ການພັດທະນາຕົວເມືອງ, ການຂົນສົ່ງ, ພະລັງງານໄຟຟ້າໄດ້ມີການຂະຫຍາຍຕົວ ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່ານັບມື້ດີຂຶ້ນເທື່ອລະກ້າວ

ຄຽງຄູ່ກັບການພັດທະນາ ສປປ ລາວ ກໍໄດ້ປະເຊີນກັບບັນຫາທ້າທາຍຫຼາຍຢ່າງເປັນຕົ້ນບັນຫາສິ່ງເສດເຫຼືອໃຊ້ ຈາກການນຳໃຊ້ຂອງຄົນເຮົານັບມື້ນັບເພີ່ມຂຶ້ນຈົນສົ່ງຜົນກະທົບຕໍ່ສິ່ງແວດລ້ອມໃນຫຼາຍຂົງເຂດ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບໃຈແຫລ່ງທີ່ມາ: ໜັງສືພິມປະຊາຊົນ