ສະຫາຍ ນາງ ປິ່ງຄໍາ ລາຊະສິມມາ ກໍາມະການສູນກາງພັກ, ເລຂາທິການສະພາແຫ່ງຊາດລາວ ເຂົ້າຮ່ວມ ສໍາມະນາແລກປ່ຽນບົດຮຽນ ຄັ້ງທີ XI ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ທີ່ຈັດຂຶ້ນຢູ່ແຂວງກວາງບິງ ສສ ຫວຽດນາມໃນລະຫວ່າງວັນທີ 19-22 ສິງຫາ 2022 ນີ້.

ການສໍາມະນາໃນຄັ້ງນີ້, ໄດ້ສຸມໃສ່ແລກປ່ຽນບົດຮຽນ ກ່ຽວກັບການຍົກສູງການເປັນເສນາທິການຮັບໃຊ້ ໃຫ້ແກ່ກອງປະຊຸມສະພາແຫ່ງຊາດ ໂດຍການຫັນເປັນທັນສະ ໄໝ, ການຍົກສູງວຽກງານຂໍ້ມູນ-ຂ່າວສານ ແລະ ສື່ມວນຊົນ, ການເພີ່ມທະວີການປະສານສົມທົບ ລະຫວ່າງ ຫ້ອງວ່າການສະພາແຫ່ງຊາດ ຫລື ຄະນະເລຂາທິການສະພາແຫ່ງຊາດ

ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ເຊິ່ງເປັນຫົວຂໍ້ທີ່ເຕັມໄປດ້ວຍເນື້ອໃນສຳຄັນ ທີ່ມີປະໂຫຍດ, ແທດ ເໝາະຕົວຈິງ ແລະ ສາມາດນໍາໄປຈັດຕັ້ງປະຕິບັດຕົວຈິງໄດ້.

ໃນໂອກາດເຂົ້າຮ່ວມສໍາມະນາດັ່ງກ່າວ, ຄະນະຜູ້ແທນຄະນະເລຂາທິການສະພາແຫ່ງຊາດລາວ ໄດ້ພົບປະສອງຝ່າຍກັບ ສະຫາຍ ບຸ່ຍ ວັນ ເກື່ອງ ເລຂາທິການ, ຫົວໜ້າຫ້ອງວ່າການສະພາແຫ່ງຊາດ ຫວຽດນາມ ເຊິ່ງສອງຝ່າຍ ໄດ້ຕີລາຄາຄືນການພົວ ພັນຮ່ວມມື ໂດຍສະເພາະ ການຈັດຕັ້ງປະຕິບັດບົດບັນທຶກການຮ່ວມມືສະບັບປີ 2017-2019 ແລະ ບົດບັນທຶກທີ່ເຊັນກັນໃນເດືອນພຶດສະພາ 2022, ພ້ອມທັງປຶກສາຫາລືທິດທາງແຜນການຮ່ວມມືໃນຕໍ່ໜ້າ.

ພ້ອມນັ້ນ, ຍັງໄດ້ເຂົ້າຢ້ຽມຂໍ່ານັບ ສະຫາຍ ເຈີ່ນ ແທັງ ເມີ້ນ ກໍາມະການກົມການເມືອງສູນກາງພັກ, ຮອງປະທານສະພາແຫ່ງຊາດ ສສ ຫວຽດນາມ ໂດຍສະຫາຍນາງ ປິ່ງຄໍາ ລາຊະສິມມາ ໄດ້ສະແດງຄວາມຮູ້ບຸນຄຸນ ແລະ ຂອບໃຈມາຍັງ ສະຫາຍຮອງປະທານ, ຜູ້ປະຈຳການສະພາແຫ່ງຊາດຫວຽດນາມ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມີທິດຊີ້ນຳກ່ຽວກັບການເສີມຂະຫຍາຍການພົວພັນ 2 ຝ່າຍ

ສະຫາຍຫົວໜ້າຄະນຜູ້ແທນຝ່າຍລາວ ຍັງໄດ້ຕີລາຄາສູງການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫລືອອັນລໍ້າຄ່າ ຂອງສະຫາຍຫວຽດນາມອ້າຍນ້ອງ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ແລະ ພາລະ ກິດປົກປັກຮັກສາ ແລະ ພັດທະນາປະເທດຊາດ ໃນປັດຈຸບັນ

ພິເສດ ຕໍ່ການຊ່ວຍເຫລືອທຶນຮອນອັນລ້ຳຄ່າຂອງ ພັກ, ລັດ, ສະພາແຫ່ງຊາດ ແລະ ປະຊາຊົນຫວຽດນາມອ້າຍນ້ອງ ໃນການສ້າງຫໍສະພາແຫ່ງຊາດລາວ ຫລັງໃໝ່, ທຶນໃນການບູລະນະປົກປັກຮັກສາຫໍສະພາແຫ່ງຊາດ, ອຸປະກອນເຕັກນິກຮັບໃຊ້ຫ້ອງການ, ອຸປະກອນການແພດ ແລະ ທຶນຮອນ ໃນການບໍາລຸງສ້າງພະນັກງານ-ລັດຖະກອນ ຂອງສະພາແຫ່ງຊາດລາວ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: ຂ​ປ​ລ.