ເພື່ອຮັບປະກັນໃຫ້ມີວັກຊິນ ບໍລິການຢ່າງທົ່ວເຖິງ ກຸ່ມເປົ້າໝາຍ ການໃຫ້ການສັກວັກຊິນ ປ້ອງກັນພະຍາດໂຄວິດ-19 ບັນລຸ 70% ຂອງປະຊາກອນ ໃນຂອບເຂດທົ່ວປະເທດ ແລະ ໃນກຸ່ມເປົ້າໝາຍໃຫ້ໄດ້ຢ່າງໜ້ອຍ 95%, ເຊິ່ງສູນສຸຂະພາບແມ່ ແລະ ເດັກ, ກະຊວງສາທາລະນະສຸກ ໄດ້ວາງຍຸດທະສາດໃນການຈັດຕັ້ງປະຕິບັດໃນປີ 2022 ໂດຍເລັ່ງໃສ່ ການບໍລິການໃຫ້ວັກຊິນກັນພະຍາດໂຄວິດ-19 ໃນຈຸດຄົງທີ່ ແລະ ເຄື່ອນທີ່ ໃຫ້ລົງຮອດລະດັບໂຮງໝໍນ້ອຍໃນທົ່ວປະເທດ.

ເລັ່ງໃສ່ການສື່ສານໂຄສະນາ ແລະ ການມີສ່ວນຮ່ວມຂອງອໍານາດການປົກຄອງແຕ່ລະຂັ້ນ ແລະ ເລັ່ງຂະຫຍາຍການບໍລິການວັກຊິນໂຄວິດ-19 ໃຫ້ພາກໂຮງໝໍ-ຄຣີນິກເອກະຊົນ ຮັບ ປະກັນໃຫ້ມີວັກຊິນ ບໍລິການຢ່າງທົ່ວເຖິງ ກຸ່ມເປົ້າໝາຍ.

ສຳລັບການບໍລິການໃຫ້ວັກຊິນກັນພະຍາດໂຄວິດ-19 ຂອງການບໍລິການຈຸດຄົງທີ່, ເຊິ່ງທຸກສະ ຖານທີ່ບໍລິການໃນໂຮງໝໍສູນກາງ, ໂຮງໝໍແຂວງ, ໂຮງໝໍຊຸມຊົນ ແລະ ໂຮງໝໍນ້ອຍ ຕ້ອງໄດ້ເປີດບໍ ລິການໃຫ້ວັກຊິນກັນພະຍາດໂຄວິດ-19 ທຸກມື້. ສ່ວນຄົນເຈັບທີ່ນອນປິ່ນປົວຢູ່ໂຮງໝໍແຕ່ລະຂັ້ນ ກ່ອນຈະອອກໂຮງໝໍ ໃຫ້ທີມແພດໄປສັກວັກຊິນໃຫ້ເຂົາເຈົ້າເພື່ອຈະບໍ່ພາດໂອກາດ. ສຳລັບແມ່ຍິງຖືພາເຂົ້າມາກວດທ້ອງໃນສະຖານທີ່ບໍລິການ ແມ່ນໃຫ້ໄດ້ສັກວັກຊິນທຸກກໍລະນີ ໃນອາຍຸການຖືພາຫລາຍກວ່າ 3 ເດືອນຂຶ້ນໄປໃຫ້ສັກຄົບສອງເຂັມ.

ການບໍລິການເຄື່ອນທີ່ ຕ້ອງເພີ່ມຈໍານວນຈຸດບໍລິການເຄື່ອນທີ່ຂຶ້ນ ໃນເຂດຕົວເມືອງໃຫຍ່ ເຊັ່ນ: ຈຸດສູນການຄ້າ, ຈຸດຢູ່ໂຮງຮຽນ, ຈຸດຢູ່ບ້ານ, ຕະຫລາດ, ຄິວລົດ ແລະ ອື່ນໆ ພ້ອມຈັດທີມແພດລົງເຄື່ອນທີ່ສັກວັກຊິນລົງແຕ່ລະບ້ານ, ຊອກຫາເປົ້າໝາຍຜູ້ທີ່ຍັງພາດໂອກາດ ໂດຍການຂຶ້ນໄປແຕ່ລະຫລັງຄາເຮືອນໃນການໃຫ້ບໍລິການ ເປັນຕົ້ນ ຜູ້ສູງອາຍຸ ຜູ້ມີພະຍາດປະຈໍາຕົວ, ຄົນພິການ ຫລື ເສຍຈິດ. ການຈັດຕັ້ງປະຕິບັດໃນທົ່ວປະເທດ ຕ້ອງເຮັດແບບຕະລຸມບອນ ກຳນົດເປັນມື້ໃນການຈັດຕັ້ງປະຕິ ບັດໃຫ້ສຳເລັດ. ແຕ່ເຖິງຢ່າງໃດກໍຕາມ, ສິ່ງທີ່ຂະແໜງການສາທາລະນະສຸກຄວນຈັດຕັ້ງປະຕິບັດ ເພື່ອໃຫ້ການສັກວັກຊິນບັນລຸເປົ້າໝາຍ ກໍຄື ຕ້ອງກະກຽມການສະໜອງວັກຊິນ ໃຫ້ພຽງພໍໃນແຕ່ລະແຂວງ ເພື່ອປົກຄຸມເປົ້າໝາຍທີ່ວາງໄວ້ໃນແຕ່ລະບ້ານ; ກະກຽມຄວາມພ້ອມທາງດ້ານລະບົບເຢັນ ແລະ ວິຊາການ ແລະ ສະໜອງວັກຊິນໃຫ້ພຽງພໍ; ກະກຽມຈັດສັນປະກອບທີມງານສັກວັກຊິນ ໃນແຕ່ລະຈຸດໃຫ້ພຽງພໍ; ຂະຫຍາຍການບໍລິການວັກຊິນໂຄວິດ-19 ໃຫ້ຮອດເຂດປົກຄຸມສຸກສາລາ ເພື່ອໃຫ້ເຂົ້າເຖິງທຸກບ້ານ; ໃຫ້ບໍລິການວັກຊິນໂຄວິດ-19 ໂດຍເຊື່ອມສານກັບວຽກງານໃຫ້ວັກຊິນກັນພະຍາດ ປົກກະຕິໄປພ້ອມກັນຄວນຈັດເວລາ ການບໍລິການນອກໂມງການສຳລັບຈຸດຄົງທີ່.

ນອກຈາກນີ້, ຂະແໜງການສາທາລະນະສຸກ ຕ້ອງປະສານງານກັບຂະແໜງການອື່ນໆ ເປັນ ຕົ້ນ ຊາວໜຸ່ມ, ສະຫະພັນຍິງ, ກໍາມະບານ, ນາຍຄູ, ປກສ ແລະ ອໍານາດການປົກຄອງບ້ານ ເພື່ອສະໜອງພະນັກງານເຂົ້າມາຊ່ວຍ; ອົບຮົມແນະນໍາໃຫ້ທີມງານ ໃນການຈັດຕັ້ງປະຕິບັດເພື່ອຈະບັນລຸໃຫ້ໄດ້ຫລາຍກວ່າ 70% ໃນແຕ່ລະແຂວງ-ເມືອງ. ພ້ອມກັນນີ້, ສຸກສາລາ ຕ້ອງໄດ້ເຮັດການໃຫ້ບໍລິການວັກຊິນແບບຕະລຸມບອນ (ວສຊ) ໃຫ້ໃນໄລຍະດຽວກັນ ໂດຍກຳນົດເວລາມື້ໃຫ້ສຳເລັດ ແລະ ກະກຽມຄູ່ມືແພດ, ເຄື່ອງມືໂຄສະນາ ເພື່ອສະໜອງໃຫ້ທີມວິຊາການ ແລະ ຊຸມຊົນ.

ຄາດຄະເນຄວາມຕ້ອງການວັກຊິນໃນປີ 2022 ສຳລັບກຸ່ມເປົ້າໝາຍອາຍຸ 12 ປີ ຂຶ້ນໄປປະ ມານ 5.481.998 ຄົນ (ຜູ້ທີ່ພາດໂອກາດ ຍັງບໍ່ໄດ້ຮັບວັກຊິນໃນປີ 2021 ປະມານ 2.740.000 ຄົນ); ເດັກອາຍຸ 5-11 ປີ ປະມານ 1.091.328 ຄົນ; ເຂັມກະຕຸ້ນສຳລັບ ອາຍຸ 12 ປີ ຂຶ້ນໄປປະ ມານ 5.308.959 (ທີ່ສັກໄປແລ້ວປະມານ 173.039 ຄົນ).

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​: ສູນສຸຂະພາບ ແມ່ ແລະ ເດັກ