ເບົ້າ ອາຫານຊັ້ນຍອດຊະນິດໜຶ່ງຂອງລາວທີ່ຫາໄດ້ຈາກກອງຂີ້ຄວາຍ
ພາບ: ພອນເທວັນ ພິມມະລີ
ເບົ້າ ອາຫານສຸດແຊບຈາກກອງຂີ້ຄວາຍທີ່ທ່ານຕ້ອງໄດ້ລອງຊິມໃຫ້ໄດ້.
ຖ້າຈະເວົ້າເຖິງການຊອກຢູ່ຫາກິນຂອງພໍ່ແມ່ພີ່ນ້ອງປະຊາຊົນລາວເຮົາກັບທຳມະຊາດແມ່ນມີຫລາຍອັນພັນແນວທີ່ເວົ້າໄປໝົດມື້ກໍຄົງບໍ່ຈົບ, ອາຫາຕາມລະດູການ, ອາຫານຕາມໜ້າຝົນ, ໜ້າໜາວ, ແລະ ອື່ນໆ ຄົນລາວເຮົາ ມັກຈະຫາອາຫານການກິນໄດ້ທຸກລະດູການ ຕັ້ງແຕ່ໃຕ້ພື້ນດິນ ຈົນເຖິງຍອດຕົ້ນໄມ້ ເຊິງອາຫານກໍຈະມີຫລາກຫລາຍສະນິດຫລາຍປະເພດຕາມຄວາມມັກຂອງແຕ່ລະຂົງເຂດ ແລະ ບຸກຄົນ.
ໃນລະດູໜາວ ຫາແລ້ງນີ້, ຈະພາມາຮູ້ຈັກກັບອາຫານຂອງຄົນລາວເຮົາອີກປະເພດໜຶ່ງ ເຊີ່ງເປັນອາຫານທີ່ຢູ່ພື້ນດິນ ແລະ ບັນພະບຸລຸດໄດ້ຂຸດຄົ້ນພົບ ແລະ ຖ່າຍທອດພູມປັນຍາສູ່ລູກຫຼານໃນປັດຈຸບັນເຊິງຍັງຄົງພົບເຫັນຢູ່ໃນເຂດຊານເມືອງ ຫລື ເຂດຊົນນະບົດຫ່າງໄກຊອກຫລີກ ເຊິ່ງປະຊາຊົນໃນຊົນນະບົດສ່ວນຫລາຍກໍຫາຢູ່ຫາກິນຕາມທຳມະຊາດເປັນພື້ນຖານຢູ່ແລ້ວ.
ເບົ້າ ຫຼື ເບົ້າຂີ້ຄວາຍ ມີຊື່ທາງວິທະຍາສາດວ່າ Heliocoris bucephalus Fabricius ມີລັກສະນະເປັນໜ່ວຍມົນໃຫ່ຍ ໂດຍແມງຈຸດຈີ່ ໄດ້ໄຂ່ໄວ້ໃນກອງຂີ້ຄວາຍ ແລ້ວມ້ວນກ້ອນຂີ້ຄວາຍທີ່ໄຂ່ໄວ້. ໂດຍໃຊ້ປາກດັນຖອຍຫຼັງ ຂາຫຼັງເຮັດໜ້າທີ່ມ້ວນກ້ອນຂີ້ຄວາຍໃຫ້ເປັນຮູບຊົງກົມຂະໜາດໃຫ່ຍ ແລ້ວລຳລຽງລົງໄປໃນຂຸມທີ່ເຮັດໄວ້ ເມື່ອເຂົ້າໄປໃນຂຸມແລ້ວ ກ້ອນເບົ້າຈະຍັງຖືກມ້ວນຕໍ່ ເພື່ອໃຫ້ດິນມາມ້ວນທັບຂີ້ເບົ້າອີກຊັ້ນ ເຊີ່ງ ຂຸມໜື່ງ ຈະມີກ້ອນຂີ້ເບົ້າຢູ່ປະມານ 5-11 ໜ່ວຍ
ວິທີການຫາເບົ້ານັ້ນ, ແມ່ນຈະສັງເກດກອງດິນທີ່ຖືກຂຸດຂຶ້ນມາ ຫຼື ເອີ້ນວ່າ ຂວຍ
ປະມານເດືອນມີນາ ຫາ ເດືອນເມສາ ໂຕອ່ອນຂອງມັນຈະກາຍເປັນດັກແດ້ ຊ່ວງນີ້ຂີ້ຄວາຍຈະຖືກໂຕອ່ອນກິນໝົດ ເຫຼືອພຽງກ້ອນດິນທີ່ເປັນເປືອກ. ເຊີ່ງໃນໄລຍະນີ ດັກແດ້ຈະບໍ່ກິນຫຍັງເລີຍ ແລະ ຖືວ່າເປັນຊ່ວງທີ່ຕົວອ່ອນດັກແດ້ນັ້ນ ຈະມີຄຸນຄ່າທາງດ້ານອາຫານຫຼາຍທີ່ສຸດ ແລະ ບໍ່ມີຂີ້ຄວາຍໃນທ້ອງດັກແດ້
ເບົ້າ ສາມາດນຳມາປະກອບອາຫານໄດ້ຫຼາຍຢ່າງ ເຊັ່ນ: ປີ້ງ, ອ່ອມ, ຕໍາແຈ່ວ ເປັນຕົ້ນ
ປັດຈຸບັນ, ເຮົາມັກຈະພົບເຫັນໜ້ອຍແລ້ວ ແລະ ບາງຄົນອາດຈະຍັງບໍ່ເຄີຍເຫັນ ບໍ່ຮູ້ຈັກ ແລະ ບໍ່ເຄີຍສຳພັດ ເນື່ອງຈາກວ່າມັນມີຈຳນວນທີ່ຫຼຸດລົງ ຕາມຈຳນວນຂອງງົວຄວາຍ ຕາມຍຸກຕາມສະໄໝ
ແນວໃດກໍ່ຕາມ, ຕາມເຂດຊົນນະບົດ ທີ່ຍັງເຮັດໄຮ່ເຮັດນາ ລ້ຽງງົວລ້ຽງຄວາຍ ແມ່ນຍັງພົບເຫັນກ້ອນເບົ້າຢູ່, ແລະ ຍັງມັກພົບເຫັນຕາມຕະຫຼາດຊຸມຊົນໃນທ້ອງຖິ່ນອີກດ້ວຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ອິນໄຊລາວ.
