ແບບໃໝ່! ລົດໄຟຟ້າ ແຫຼ່ງທ່ອງທ່ຽວຕາດກວາງຊີ 5 ພັນກີບ ຫຼວງພະບາງ
ເປີດ ລົດໄຟຟ້າ ຮັບໃຊ້ແຫຼ່ງທ່ອງທ່ຽວຕາດກວາງຊີ 5 ພັນກີບ ຫຼວງພະບາງ.
ດັ່ງທີ່ຮູ້ກັນດີຢູ່ແລ້ວວ່າ ແຂວງຫລວງພະບາງເປັນແຂວງໜຶ່ງທີ່ມີແຫລ່ງທ່ອງທ່ຽວຈ່ຳນວນຫລວງຫລາຍ ແລະ ຍັງເປັນເມືອງມໍບະດົກໂລກອີກ ແລະ ໃນວັນທີ 1 ເມສາ 2021 ນີ້, ທີ່ບ້ານທ່າແປ້ນ ເຂດເມືອງຂາຍ ນະຄອນຫຼງພະບາງ ແຂວງຫຼວງພະບາງ,ໄດ້ມີພິທີເປີດສະຖານີຈອດລົດ ແລະ ບໍລິການລົດໄຟຟ້າ ຮັບໃຊ້ແຫຼ່ງທ່ອງທ່ຽວຕາດກວາງຊີ,
ໃນພິທີດັ່ງກ່າວໃຫ້ກຽດເຂົ້າຮ່ວມໂດຍ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ, ມີບັນດາຄະນະປະຈໍາພັກແຂວງ,ປະທານສະພາປະຊາຊົນແຂວງ, ເຈົ້ານະຄອນ-ຫຼວງພະບາງ, ຫົວໜ້າພະແນກການຂອງແຂວງ,ປະທານບໍລິສັດ ເຮືອງປະເສີດກຣູບ,ອຳນາດການປົກບ້ານ, ແລະ ແຂກຕ່າງໆທີ່ຖືກເຊີນເຂົ້າຮ່ວມ.
ໃນພິທີທ່ານ ຄິນຄໍາ ເລັ່ງສະຫວັດ ຫົວໜ້າພະແນກການເງິນແຂວງຫຼວງພະບາງ ໄດ້ຂຶ້ນມີຄໍາເຫັນນຳສະເໜີ ການນໍາໃຊ້ອຸປະກອນການສະແກນປີ້ບັດເກັບຄ່າເຂົ້າແຫຼ່ງທ່ອງທ່ຽວຕາດກວາງຊີ ແລະ ຄ່າບໍລິການລົດໄຟຟ້າ ຂອງ ບໍລິສັດ ເຮືອງປະເສີດ ກຣຸບ ເພື່ອປະຕິບັດຕາມແນວທາງຂອງລັດໃຫ້ການເກັບຄ່າທຳນຽມເປັນປະຕູດຽວ ເພື່ອຮັບປະກັນບໍ່ໃຫ້ມີການຮົວໄຫຼ,ຈາກນັ້ນ ໄດ້ຮັບຟັງການຜ່ານບົດລາຍງານການກໍ່ສ້າງສະຖານີຈອດລົດແລະບໍລິການລົດໄຟຟ້າຮັບໃຊ້ແຫຼ່ງທ່ອງທ່ຽວຕາດກວາງຊີ ວ່າ:
ການກໍ່ສ້າງແມ່ນໄດ້ຮັບໃບອານຸຍາດການລົງທຶນຈາກປະທານຄະນະກຳມະການສົ່ງເສີມການລົງທຶນຂັ້ນແຂວງ ສະບັບເລກທີ 02/ຄລທຂ ລົງວັນທີ 14 ກຸມພາ 2020 ຮູບແບບການລົງທຶນເອກະຊົນພາຍໃນ ຮ້ອຍສ່ວນຮ້ອຍ, ໃບທະບຽບວິສາຫະກິດ ຈາກພະແນກອຸດສາຫະກຳການຄ້ານແຂວງ ສະບັບເລກທີ່ 0083 ລົງວັນທີ 21 ກຸມພາ 2020, ໄດ້ຮັບໃບອານຸຍາດປຸກສ້າງຈາກພະແນກໂຍທາທິການແລະຂົນສົ່ງປະຈໍາແຂວງ ເລກທີ 1214 ລົງວັນທີ 31 ພຶດສະພາ 2019, ໄດ້ຮັບໃບຢັ້ງຢືນການມອບອາກອນ ເລກທີ 237 ລົງວັນທີ 27 ຕຸລາ 2020, ໃບອານຸຍາດດຳເນີນທຸລະກິດສະຖານີຈອດລົດ ແລະ ບໍລິການລົດໄຟຟ້າຂົນສົ່ງນັກທ່ອງທ່ຽວເຂດຕາດກວາງຊີ, ການກໍ່ສ້າງແມ່ນໄດ້ເລີ່ມລົງມືແຕ່ວັນທີ 4 ທັນວາ 2019 – 29 ກຸມພາ 2021 ໄດ້ສຳເລັດ ໂດຍແມ່ນການລົງທຶນຂອງບໍລິສັດ ເຮືອງປະເສີດ ກຣູບ ຮ້ອຍສ່ວນຮ້ອຍ. ໃນມູນຄ່າກໍ່ສ້າງ 9 ຕຶ້ 9 ຮ້ອຍ 86 ລ້ານກວ່າກີບ, ການໃຫ້ບໍລິການລົດໄຟຟ້າຮັບໃຊ້ແຫຼ່ງທ່ອງທ່ຽວຕາດກວາງຊີ ມີທັງໝົດ 15 ຄັນ.
ຈາກນັ້ນບັນດາຄະນະປະທານຜູ້ເຂົ້າຮ່ວມໄດ້ພ້ອມກັນຕັດແຖບຜ້າເປີດປ້າຍສະຖານີຈອດລົດແລະບໍລິການລົດໄຟຟ້າຮັບໃຊ້ແຫຼ່ງທ່ອງທ່ຽວຕາດກວາງຊີ ພ້ອມທັງຂີ້ລົດໄຟຟ້າເຂົ້າຊົມແຫ່ງທ່ອງທ່ຽວຕາດກວາງຊີຢ່າງເປັນທາງການ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: laoedaily.com.la