ເຊີນຊົມ! ລາວທ່ຽວລາວຊົມໃຊ້ຜະລິດຕະພັນລາວ ໃນວິຖີ່ຊິວິດແບບໃໝ່.
ງານວາງສະແດງສິນຄ້າ ຜະລິດຕະພັນລາວ ປີ 2022 ທີ່ສູນການຄ້າລາວ-ໄອເຕັກ
ເພື່ອສົ່ງເສີມຜະລິດຕະພັນທີ່ຜະລິດໂດຍຄົນລາວເອງ ແລະ ໃນສະພາບການປະຈຸບັນທີ່ມີການລະບາດຂອງພະຍາດໂຄວິດ-19 ນີ້, ປະຊາຊົນລາວຕ້ອງໄດ້ຫັນມາເອົາໃຈໃສ່ໃນການຜະລິດພາຍໃນ ແລະ ສົ່ງເສີມອູດໜູນສິນຄ້າພາຍໃນກັນເອງເພື່ອກະຕຸ້ນສະພາບເສດຖະກິດ ແລະ ແກ້ໄຂບັນຫາໃນອານາຄົດ.
ໃນຕອນບ່າຍຂອງ ວັນທີ 22 ກຸມພາ 2022 ທີ່ ສູນວາງສະແດງສິນຄ້າ ລາວ-ໄອເຕັກ ທາງກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ຮ່ວມກັບ ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຈັດກອງປະຊຸມສໍາມະນາກ່ຽວກັບການຊຸກຍູ້, ສົ່ງເສີມ ວຽກງານມາດຕະຖານ, ຄຸນນະພາບ ແລະ ວັດແທກ ຕໍ່ກັບຜະລິດຕະພັນລາວ
ໂດຍການເປັນປະທານ ຂອງ ທ່ານ ພູໄຊ ເທບພະວົງ ເລຂາທິການ ສະພາການຄ້າ ແລະ ອຸດສາຫະກຳ ແຫ່ງຊາດລາວ ເປັນປະທານຮ່ວມໂດຍ ທ່ານ ວຽງທອງ ວົງທະວິໄລ ຫົວໜ້າກົມ ມາດຕະຖານ ແລະ ວັດແທກ.
ຈຸດປະສົງໃນການຈັດກອງປະຊຸມສໍາມະນາໃນຄັ້ງນີ້ :
ກໍເພື່ອສ້າງຄວາມຮູ້, ຄວາມເຂົ້າໃຈ ກ່ຽວກັບວຽກງານມາດຕະຖານ, ຄຸນນະພາບ ແລະ ວັດແທກ ຕໍ່ກັບຜະລິດຕະພັນລາວ ໃຫ້ແກ່ຜູ້ປະກອບການ, ພາກທຸລະກິດທີ່ຜະລິດ, ຈໍາໝ່າຍ ຜະລິດຕະພັນສິນຄ້າ ຢູ່ພາຍໃນ ສປປ ລາວ ໃຫ້ໄດ້ຕາມມາດຕະຖານ ແລະ ຄຸນນະພາບ ທີ່ກໍານົດໄວ້ ຖືເອົາວຽກງານນີ້ເປັນສ່ວນໜຶ່ງໃນການຍົກສູງຄວາມຮັບຜິດຊອບຂອງຕົນ ຕໍ່ກັບສັງຄົມ ແລະ ຜູ້ຊົມໃຊ້ ຕ່າງຝ່າຍຕ່າງມີຜົນປະໂຫຍດຮ່ວມກັນ.
ຜະລິດຕະພັນສິນຄ້າ ທີ່ຜະລິດຢູ່ພາຍໃນ ສປປ ລາວ ແມ່ນກໍານົດໃນແຜນຍຸດທະສາດທີ່ສໍາຄັນຂອງລັດຖະບານ ໃນການພັດທະນາໂຄງລ່າງພື້ນຖານດ້ານຄຸນນະພາບແຫ່ງຊາດ ເຊິ່ງເປັນເຄື່ອງມືໃນການສະໜັບສະໜູນ ສົ່ງເສີມ ໃນການອຳນວຍຄວາມສະດວກທາງດ້ານການຄ້າ, ເຂົ້າເຖິງຕະຫຼາດ ແລະ ສາມາດແຂ່ງຂັນ ດ້ານຜະລິດຕະພັນສິນຄ້າທີ່ຜະລິດພາຍໃນ ໃຫ້ສອດຄ່ອງຕາມມາດຕະຖານ ແລະ ໄດ້ຄຸນນະພາບ ທີ່ໄດ້ກໍານົດໄວ້ ເພື່ອກ້າວໄປເຖິງການສົ່ງອອກໃນຕະຫຼາດ ພາກພື້ນ ແລະ ສາກົນ
ພ້ອມກັນນັ້ນກໍ່ເພື່ອເປັນການ ປົກປ້ອງຜູ້ບໍລິໂພກ, ຜູ້ຊົມໃຊ້, ຮັກສາສະພາບແວດລ້ອມ, ສຸຂະພາບ, ຄວາມປອດໄພ ແລະ ຊີວິດການເປັນຢູ່ຂອງປະຊາຊົນລາວ ໃຫ້ດີຂື້ນ ແລະ ທັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງປະເທດອີກດ້ວຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ສະພາການຄ້າ ແລະ ອຸດສາຫະກຳ ແຫ່ງຊາດລາວ