ຄໍາວ່າ: “ສີພວນ” ຄົງຈະໝາຍເຖິງ”ສີ”ຂອງພຣະພຸດທະຮູບອົງນີ້ນັ້ນເອງ ເພາະເປັນສີທີ່ງົດງາມແປກຕາຫຼາຍ ມີຄວາມເປັນສີຂຽວຄ້າຍຄືມໍຣະກົດອົມສີປີກຂອງແມງຜູ່ ມີຮູບຊົງງົດງາມຫຼາຍ , ຄໍາວ່າ: “ພວນ” ຄົງໝານເຖິງ ສີລປະຂອງຂອງພີ່ນ້ອງຊາວພວນນັ້ນເອງ. ສະໄໝສົງຄາມ ພຣະພຸດທະຮູບອົງຫຼວງຕາມວັດຕ່າງໆ ໄດ້ຖືກລູກປືນ ລະເບີດ ຖືກຍົນ T-28 ຖະຫຼົ່ມ ເຮັດໃຫ້ບັນດາວັດຕ່າງໆທົ່ວແຂວງຊຽງຂວາງ ຖືກທໍາລາຍເສຍຫາຍ . ຮວມທັງພຣະເຈົ້າສີພວນອົງນີ້ກໍຖືກລູກປືນຫຼາຍໆຈຸດ ຕາມໜ້າຜາກ ຕາມຄີງດ້ານໜ້າແລະດ້ານຫຼັງ ຍັງມີຮອຍລູກປືນຢູ່ ເຫັນແລ້ວກໍເປັນຕາສັງເວກສະລົດໃຈຍິ່ງໜັກ.

“ຊາວບ້ານ ຊາວເມືອງ ຢູ່ບໍ່ເປັນສຸກ ໜີສົງຄາມຫົວຊຸກຫົວຊົນ ເລົ່າທັບທະຫານຜູ້ກ້າທັງຫຼາຍລົ້ມຕາຍລະເນລະນາດ ພວກລູກຫຼານກຳລັງໄລ່ຫຼີ້ນຢອກໃຍກັນຢູ່ຕາມກາງບ້ານ ຖືກເຮືອບິນມາຍິງ ລົ້ມຫາຍຕາຍຈາກ ເມື່ອເຮືອບິນກັບໄປແລ້ວ ສຽງທຸກຢ່າງກໍມິດງຽບ … ” ແມ່ອອກໃຫຍ່ນາລີ ສີສຸລິດ ເພິ່ນເລົ່າດ້ວຍສຽງສະອຶ້ນທື້ນທວງ ໃນມື້ງານບຸນຄັ້ງນີ້ ເຮັດໃຫ້ຜູ້ຟັງຫຼາຍທ່ານກໍພອຍນໍ້າຕາຊຶມເບົ້າໄປຫຼາຍຄົນ ຄົນເຖົ້າຄົນແກ່ຜູ້ເຫັນເຫດການສົງຄາມໃນຄັ້ງນັ້ນ ຫຼາຍທ່ານກໍສະອຶ້ນໄປຕາມໆກັນ.

ສົງຄາມຄືການຂ້າຄົນໃຫ້ຕາຍ ແລະຈັບຄົນມາເປັນສະເລີຍ ກັກຂັງໜ່ວງໜ່ຽວ. ມາບັດນີ້ບ້ານເມືອງເຮົາໄດ້ໝົດສົງຄາມແລ້ວ ຄົນລາວເຮົາຫຼາບແລ້ວກັບສົງຄາມ ຈະບໍ່ຍອມໃຫ້ສົງຄາມເກີດຂຶ້ນອີກເດັດຂາດ ຈະເຮັດໄດ້ຄືແນວນັ້ນ ກໍຄືພວກເຮົາຄົນລາວທົ່ວປະເທດຮ່ວມສາມັກຄີກັນ ເປັນນໍ້າໜຶ່ງໃຈດຽວ ເປັນເຈົ້າການນໍາກັນ ປົກປັກຮັກສາແລະສ້າງສາປະເທດຊາດບ້ານເມືອງຂອງພວກເຮົາໃຫ້ຈະເລີນຮຸ່ງເຮືອງເທົ່າທຽມກັບປະເທດອື່ນ ບໍ່ໃຫ້ຊາດອື່ນໃດມາດູຖືກຢຽດຫຍາມໄດ້ອີກ .