ເຂົ້າໜົມປາດ ຂອງຫວານອາຫານລາວທີ່ມີມາຫລາຍຍຸກຫລາຍສະໄໝ.
ວິທີການເຮັດ ເຂົ້າໜົມປາດສູດແບບລາວໆທີ່ທຸກຄົນຕ້ອງເຄີຍກິນ.
ຖ້າຈະເວົ້າເລື່ອງອາຫານເຂົ້າໜົມຂອງຫວານຕ່າງໆຖືວ່າມີມາຢ່າງຍາວນານແລ້ວເຊິງຫລາຍຄົນກໍເຮັດຫລາກຫລາຍແຕກຕ່າງກັນໄປ ຕາມຮີດຄອງປະເພນີຫລາຍແຕ່ລະຊົນຊາດຊົນເຜົ່າ ແລະ ທັງມີເອກະລັກຂອງໃຜລາວ.
ເປັນໂອກາດທີ່ດີ, ມື້ນີ້ໄດ້ນຳເອົາສູດຂອງຫວານມາຝາກມາຕ້ອນທຸກທ່ານ ຂອງຫວານທີ່ມັນແໜ້ນ ມີສີຂຽວງາມ ແລະ ແຊບ ນັ້ນກໍຄືເຂົ້າປາດທີ່ເຮັດມາຈາກແປ້ງສິງກະໂປ ແລະ ແປ້ງເຂົ້າຈ້າວ, ເຊືອແນວ່າລູກຫຼານທີ່ຢູ່ເຮືອນທ່ານຕ້ອງມັກກິນ ແລະ ຕິດໃຈຢ່າງແນນອນດ້ວຍຄວາມຫອມຫວານໜ້າຮັບປະທານຂອງເຂົ້າໜົມປາດນີ້.
ເຊິງເຂົ້າໜົມປາດນີ້ຈະມີກິ່ນຫອມຈາກໃບເຕີຍ ແລະ ມີຄວາມຫອມຂອງໝາກພ້າວຂູດ ເຮັດໃຫ້ເຂົ້າກັນດີ. ຂັ້ນຕອນການເຮັດນີ້ອາດຈະຕ້ອງໃຊ້ເວລະແດ່ເນື່ອງຈາກວ່າມັນຕ້ອງໃຊ້ເວລາເພື່ອໃຫ້ມັນເຢັນ ແຕ່ຮັບປະກັນວ່າສົມກັບການລໍຄອຍແນ່ນອນ, ເຮົາມາເບິ່ງສ່ວນປະສົມ ແລະ ວິທີເຮັດເຂົ້າປາດໄປພ້ອມກັນເລີຍ.
ສ່ວນປະສົມ
- ແປ້ງເຂົ້າຈ້າວ 1/2 ຖ້ວຍ
- ແປ້ງສິງກະໂປ 1/4 ຖ້ວຍ
- ເກືອ 1/2 ບ່ວງກາເຟ
- ກະທິໝາກພ້າວ 1 ປ໋ອງ
- ນ້ຳໃບເຕີຍ 2 ຖ້ວຍ
- ກິ່ນໃບເຕີຍ 1 ບ່ວງກາເຟ
- ນ້ຳຕານ 1 ຖ້ວຍ
- ໝາກພ້າວຂູດ 1 ຖ້ວຍ
ວິທີເຮັດ
- ຂູດໝາກພ້າວຫ້າວ ຫຼື ພ້າວອ່ອນ ( ເລືອກຕາມໃຈມັກ ) ເອົາແຕ່ເນື້ອມັນ.
- ເຮັດນ້ຳໃບເຕີຍ ໂດຍການປັ່ນໃບເຕີຍໃສ່ນ້ຳແລ້ວໄປຕອງເອົາແຕ່ນ້ຳ.
- ເອົາຊາມມາປະສົມແປ້ງເຂົ້າຈ້າວ, ແປ້ງສິງກະໂປ ແລະ ເກືອ, ຈາກນັ້ນຄົນໃຫ້ເຂົ້າກັນດີ.
- ເອົາຊາມອີກອັນໜຶ່ງມາໃສ່ກະທິໝາກພ້າວ, ນ້ຳໃບເຕີຍ, ກິ່ນໃບເຕີຍ ( ສຳເລັດຮູບ ) ແລະ ນ້ຳຕານ ຄົນໃຫ້ເຂົ້າກັນ.
- ໃສ່ນ້ຳກະທິທີ່ປະສົມນ້ຳໃບເຕີຍນັ້ນລົງໃສ່ຊາມແປ້ງ ແລ້ວຄົນເຂົ້າກັນ.
- ນຳໄປຕົ້ມໃສ່ໝໍ້ ທຳອິດເຮັດໄຟແຮງຈົນແປ້ງມັນເລີ່ມຂຸ້ນ ແລ້ວໃຫ້ຫຼຸດໄຟອ່ອນ ຕົ້ມຕໍ່ປະມານ 8 – 10 ນາທີ, ສັງເກດມັນຈະແຂ້ນ ແລະ ເປັນເນື້ອມັນໆຖືວ່າສຸກ.
- ທານ້ຳມັນໃສ່ຖາດ ແລ້ວຖອກນ້ຳເຂົ້າປາດທີ່ຕົ້ມນັ້ນລົງ ປະໃຫ້ເຢັນ 1 ຊົ່ວໂມງ, ຈາກນັ້ນໄປໃສ່ຕູ້ເຢັນຕໍ່ອີກ 2 ຊົ່ວໂມງ ຈົນມັນແໜ້ນດີ.
- ນຳມາຕັດເປັນຕ່ອນ ແລ້ວໂຮຍໝາກພ້າວຂູດໃສ່ ພ້ອມຮັບປະທານໄດ້.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: laoedaily.com.la