ໃນເມືອກ່ອນເປັນບໍລິເວນວັດພຣະທາດພູຊວງເທພະນິມິດ (ທາດຝຸ່ນ) ເພາະວັດແຫ່ງນີ້ ມີເນື້ອທີກວ້າງຂວາງຫລາຍ ເຊິ່ງກວມເອົາເນື້ອທີ່ຫລາຍເຮັກຕາ ກວມຮອດເຂດບໍລິເວນບ້ານຝ່າຍ ເຊິ່ງພຣະພຸດທະຮູບອົງນີ້ ໄດ້ປະດິດສະຖານໄວ້ໃນອູບມຸງໃກ້ກັບພຣະທາດທີ່ເກົ່າແກ່ ໃນປັດຈຸບັນແມ່ນ ບໍລິເວນຂອງກະຊວງພະລັງງານ ແລະ ບໍ່ແຮ່.

ແຕ່ພໍເມື່ອເຖິງເວລາຍົກຂຶ້ນເທິງກວຽນ ກໍ່ເກີດເຫດອັນໜ້າອັດສະຈັນຂຶ້ນ ຄືທ້ອງຟ້າ ສາຍລົມ ອັນເຄີຍເປັນປົກກະຕິ ກໍ່ເກີດເປັນກະແສລົມພາຍຸ ພັດຢ່າງຮຸນແຮງ ທັງມີສາຍຟ້າເຫຼືອມ ຟ້າຮ້ອງເກີດຂຶ້ນ ທ້ອງຟ້າເລີ່ມດໍາມືດມົນອົນທະການຂຶ້ນ ບັນດາເຖົ້າແກ່ ພໍ່ແມ່ພີ່ນ້ອງທີ່ມາເກີດຄວາມຢ້ານ ທ່າມກາງສາຍຝົນ ແລະ ລົມພາຍຸ ທີ່ກໍາລັງຕົກແຮງຢູ່ນັ້ນ ພໍ່ແມ່ປະຊາຊົນທີ່ພວມຍົກພຣະພຸດທະຮູບຂຶ້ນກວຽນນັ້ນປາກົດວ່າຍົກບໍ່ຂຶ້ນ ດ້ວຍພຣະພຸດທະຮູບອົງສັກສິດນີ້ ໄດ້ສະແດງປາຕິຫານທ່າມກາງຜູ້ຄົນເປັນຈໍນວນຫຼວງຫຼາຍ

ໃນເມື່ອເກີດເຫດການດັ່ງກ່າວແລ້ວ ເຖົ້າແກ່ພໍ່ແມ່ພີ່ນ້ອງທັງຫຼາຍ ຈຶ່ງໄດປຶກສາຫາລືກັນໃໝ່ອີກຄັ້ງ ຕົກລົງເຫັນດີກັນວ່າຈະນິມົນເພິ່ນໄປປະດິດສະຖານໄວ້ທີ່ ວັດສົມສະຫງັດ (ບ້ານຝາຍ) ເພື່ອໄປເປັນທີ່ສັກກາລະບູຊາຂອງອອກຕົນຍາດໂຍມ ເພື່ອເປັນມິ່ງຂວັນຂອງຊາວບ້ານຝາຍ ໃນເມື່ອຕົກລົງເຫັນດີກັນແລ້ວກໍ່ນິມົນເພິ່ນ ແລະ ຍົກຂຶ້ນກວຽນ ປາກົດວ່າຍົກຂຶ້ນສະບາຍ ພໍ່ແມ່ປະຊາຊົນກໍ່ຍໍມືສາທຸການເປັນຢ່າງຍິ່ງ ດ້ວຍເຫດນີ້ ຈຶ່ງໄດ້ປະດິດສະຖານໄວ້ທີ່ວັດສົມສະຫງັດ ( ບ້ານຝາຍ ) ເມືອງໄຊເສດຖາ ນະຄອນຫຼວງວຽງຈັນ ຈົນຮອດປັດຈຸບັນ.