ສິນຄ້າລາວຈະໄດ້ຮັບການຍົກເວັ້ນພາສີນຳເຂົ້າ 0% ຈາກ ສປ ຈີນ ໃນທ້າຍປີນີ້. ⋆ DooDiDo

ສປ ຈີນ ໃຫ້ສິດທິພິເສດຍົກເວັ້ນພາສີນໍາເຂົ້າສິນຄ້າລາວ 0% ໃນຈໍານວນ 97% ຂອງສິນຄ້າທັງໝົດ.

ສປປ ລາວ ເປັນປະເທດທີ່ກ່ຳລັງພັດທະນາ ແລະ ມີທ່າແຮງຫລາຍທາງດ້ານສິນຄ້າທັງຫັດຖະກຳ, ກະສິກຳ, ແຮງງານ ແລະ ທຳມະຊາດລວມທັງສິນຄ້າອື່ນໆຫລາຍໆຢ່າງທີ່ຍັງຕ້ອງການການພັດທະນາໃຫ້ເປັນສາກົນ ແລະ ເປັນສິນຄ້າທີ່ສາມາດສົ່ງອອກສູ່ຕ່າງປະເທດໄດ້.

ເຊິງລ້າສຸດຄະນະກໍາມະການຄຸ້ມຄອງອັດຕາພາສີ ປະຈໍາສະພາແຫ່ງຊາດ ສປ ຈີນ ໄດ້ອອກນະໂຍບາຍຫຼຸດຜ່ອນອັດຕາພາສີ ດ້ວຍການເກັບພາສີ 0% ໃນຈໍານວນ 97% ລາຍການສິນຄ້າທັງໝົດ ຂອງ ສປປ ລາວ ຕາມທີ່ໄດ້ໃຫ້ສັດຕະຍາບັນ.

ເວັບໄຊສູນຂ່າວສານທາງດ້ານການຄ້າ, ກະຊວງອຸດສາຫະກຳ ແລະ ການຄ້າ ລາຍວ່າ: ອີງຕາມແຫຼ່ງຂ່າວເວັບໄຊ http://gss.mof.gov.cn ໃຫ້ຮູ້ວ່າ ຄະນະກໍາມະການຄຸ້ມຄອງອັດຕາພາສີປະຈໍາສະພາແຫ່ງຊາດ ສປ ຈີນ ໄດ້ອອກແຈ້ງການເລກທີ 9.2019 ເພື່ອຫຼຸດຜ່ອນອັດຕາພາສີ 0% ໃຫ້ກັບສິນຄ້າຂອງສປປ ລາວ ກວມເອົາ 97% ຫຼື 8.256 ລາຍການສິນຄ້າທັງໝົດ ເຊິ່ງຈະເລີ່ມຈັດຕັ້ງປະຕິບັດໃນວັນທີ 1 ທັນວາ 2020 ເປັນຕົ້ນໄປ.

ສປປ ລາວ ຖືວ່າຍັງເປັນປະເທດດ້ອຍພັດທະນາ ມີລະບົບການຜະລິດຍັງບໍ່ເຂັ້ມແຂງ, ຄວາມສາມາດໃນການແຂ່ງຂັນຍັງອ່ອນແອ. ການໄດ້ຮັບສິດທິພິເສດດ້ານອັດຕາພາສີ ຈາກ ສປ ຈີນ ທີ່ເປັນປະເທດກໍາລັງຈະກາຍເປັນມະຫາອໍານາດທາງດ້ານເສດຖະກິດ ຫຼື ເວົ້າອີກຢ່າງໜຶ່ງ ແມ່ນກໍາລັງຈະກາຍເປັນປະເທດທີ່ມີຂະໜາດເສດຖະກິດທີີ່ໃຫຍ່ທີ່ສຸດໃນໂລກ ທັງຍັງປະເປັນປະເທດທີ່ມີປະຊາກອນຫຼາຍທີ່ສຸດໃນໂລກ.

ສປປ ລາວ ແລະ ສປ ຈີນ ຍັງເປັນເພື່ອນບ້ານທີ່ດີຕໍ່ກັນ ມີການຮ່ວມມືຮອບດ້ານ, ຜົນເດັ່ນດ້ານການຮ່ວມມືສ້າງພື້ນຖານໂຄງລ່າງ ແມ່ນການຮ່ວມມືສ້າງທາງລົດໄຟຄວາມໄວສູງ ເຊື່ອມຕໍ່ລະຫວ່າງສອງປະເທດ ແລະ ເຊື່ອມຕໍ່ໄປຍັງບັນດາປະເທດອາຊຽນ, ການສ້າງທາງດ່ວນແຕ່ເໜືອຮອດໃຕ້, ໂຄງການພະລັງງານໄຟຟ້າ ແລະ ອື່ນໆ.

ການໄດ້ຮັບສິດທິພິເສດຫຼຸດຜ່ອນອັດຕາພາສີ 0% ບວກກັບລະບົບການຂົນສົ່ງທີ່ກໍາລັງໄດ້ຮັບການກໍ່ສ້າງໃຫ້ສະດວກ ແລະ ທັນສະໄໝ ມັນເປັນໂອກາດທີ່ດີເລີດໃຫ້ ສປປ ລາວ ຫຼື ປະຊາຊົນລາວ ທີ່ມີຄວາມດຸໝັ້ນຂະຫຍັນພຽນຢູ່ແລ້ວ ໃນການສ້າງສາພັດທະນາປະເທດຊາດ ຄວນຈັບເອົາໂອກາດນີ້ ຂຸ່ນຂ້ຽວສ້າງຄວາມເຂັ້ມແຂງດ້ານການຜະລິດສິນຄ້າໃຫ້ມີຄຸນນະພາບສູງ ເພື່ອສົ່ງສິນຄ້າໄປຍັງ ສປ ຈີນ ໂດຍສະເພາະແມ່ນສິນຄ້າທີ່ ປະເທດເຮົາມີທ່າແຮງ ແລະ ຄຽງຄູ່ກັບສິນຄ້າທີ່ ສປ ຈີນ ມີຄວາມຕ້ອງການ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບໃຈແຫຼ່ງຂໍ້ມູນຈາກ: ເສດຖະກິດ-ການຄ້າ.