ລົງນາມ ການຮ່ວມມື ສປປລາວ ແລະ ສປຈີນ ຈັດຊື້ສິນຄ້າກະສິກຳປຸງແຕ່ງ 09 ລາຍການໃຫຍ່ຈາກ ສປປລາວ.

ຕາມຂໍ້ມູນຂອງ ທ່ານ Sourioudong Sundara ໃນເຟສບຸກຂອງທ່ານເພີນໄດ້ຂຽນກ່ຽວກັບການ ສຶກສາຂໍ້ມູນ “ວັນທີ 28 ພຶດສະພາ 2021, ໄດ້ລົງນາມຮ່ວມມື ເພື່ອຈັດຊື້ສິນຄ້າກະສິກຳປຸງແຕ່ງ 09 ລາຍການໃຫຍ່ຈາກ ສປປລາວ ສົ່ງໄປ ສປຈີນ ເປົ້າໝາຍລວມມູນຄ່າການສົ່ງອອກ 1,5 ຕື້ໂດລາ ພາຍໃນໄລຍະອີກ 05 ປີ.”

ການລົງນາມຮ່ວມມືເພື່ອຈັດຊື້ສິນຄ້າກະສິກຳປຸງແຕ່ງ 9 ລາຍການໃຫຍ່ ຈາກ ສປປ ລາວ ສົ່ງໄປ ສປ ຈີນ ລວມມູນຄ່າການສົ່ງອອກ 1,5 ຕື້ໂດລາ ພາຍໃນປີທີ 5 ເປັນຕົ້ນໄປ ແມ່ນຈະເລີ່ມສົ່ງອອກ ຊຶ່ງການ ຮ່ວມມືດັ່ງກ່າວຈະເປັນໂຄງການ ທີ່ຈະສ້າງອາຊີບໃຫ້ແກ່ປະຊາຊົນລາວຫຼາຍແສນຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນລາວດີຂຶ້ນ.

ເຊິງໃນລາຍລາຍອຽດຂອງການຮ່ວມມືດັ່ງກ່າວໄດ້ມີທັງໝົດ 16 ຂໍ້ດັ່ງລຸ່ມນີ້:

1ເປັນການລົງນາມຮ່ວມມືດ້ານຍຸດທະສາດ ເພື່ອນຳເອົາສິນຄ້າຈາກ ສປປລາວ ໄປຂາຍໃນ ສປຈີນ ໂດຍການຮ່ວມມືກັບ ລັດວິສາຫະກິດສະບຽງອາຫານ ສປຈີນ,
ກວມເອົາສິນຄ້າກະສິກຳປຸງແຕ່ງ 09 ລາຍການໃຫຍ່ ຄື: ຖົ່ວດິນ 01 ແສນໂຕນ, ແປ້ງມັນຕົ້ນ 01 ແສນໂຕນ, ຊີ້ນງົວແຊ່ແຂງ 01 ແສນໂຕນ, ໝາກມ່ວງຫິມະພານ 02 ແສນໂຕນ, ໝາກມ່ວງ 01 ແສນໂຕນ, ຖົ່ວລຽນ 05 ໝື່ນໂຕນ, ຖົ່ວເຫຼືອງ 02 ແສນໂຕນ, ກ້ວຍ 01 ແສນໂຕນ ແລະ ນ້ຳຕານ 05 ແສນໂຕນ ຊຶ່ງລວມມູນຄ່າການສົ່ງອອກ 1,5 ຕື້ໂດລາ ພາຍໃນປີທີ 05 ເປັນຕົ້ນໄປ,
ການຮ່ວມມືດັ່ງກ່າວນີ້ ຈະສ້າງອາຊີບໃຫ້ແກ່ປະຊາຊົນລາວຫຼາຍແສນຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ແລະ ຈະສ້າງລາຍຮັບໃຫ້ແກ່ລັດຖະບານ,
ພ້ອມກັນນັ້ນ, ກໍຍັງເປັນການປັບປຸງພື້ນຖານໂຄງລ່າງ ເປັນຕົ້ນແມ່ນທະໜົນຫົນທາງ, ໄຟຟ້າ, ນ້ຳປະປາ ແລະ ຊົນລະປະທານໄປພ້ອມໆກັນ,
ຜ່ານມາກໍໄດ້ພ້ອມກັນທົດລອງເຮັດກະສິກຳຢູ່ຫຼາຍຈຸດ ແລະ ໄດ້ກະກຽມພື້ນທີ່ປູກຝັງ ເຮັດການຜະລິດ ແຕ່ພາກກາງຫາພາກໃຕ້ ໂດຍປັດຈຸບັນໄດ້ເກືອບ 01 ແສນເຮັກຕາ,
ພາຍຫຼັງການລົງນາມຄັ້ງນີ້, ບໍລິສັດ ແລະ ລັດວິສາຫະກິດ ສະບຽງອາຫານ ຈີນ ຈະປຶກສາຫາລືເຖິງລາຍລະອຽດດ້ານເຕັກນິກຂອງການປູກ-ການປຸງແຕ່ງ ແລະ ກ້າວສູ່ຂັ້ນຕອນການນຳສະເໜີໂຄງການໃຫ້ແກ່ລັດຖະບານ ໃນການຂໍໂກຕ້າ ແລະ ພະຍາຍາມໃຫ້ລາຄາສາມາດແຂ່ງຂັນໄດ້ ທຽບກັບປະເທດອື່ນອ້ອມຂ້າງ,
ພາຍຫຼັງທີ່ ລາວ-ຈີນ ໄດ້ສຳເລັດການເຊັນສັນຍາຊື້-ຂາຍ ເຂົ້າ 20 ພັນໂຕນ ແລະ ສືບຕໍ່ສົ່ງອອກ ເຂົ້າ 50 ພັນໂຕນ ໃນອະນາຄົດ,
ການລົງນາມໃນຄັ້ງນີ້ ກໍເປັນອີກສິ່ງໜຶ່ງທີ່ມີຄວາມໝາຍສຳຄັນຍິ່ງ ເປັນໂອກາດ ທີ່ເປີດຊ່ອງທາງໃຫ້ສາມາດສ້າງມູນຄ່າການຄ້າ ຂອງທັງສອງປະເທດເພີ່ມຂຶ້ນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປລາວ ແລະ ທັງເປັນໂອກາດໃນການສົ່ງອອກສິນຄ້າກະສິກຳທີ່ເປັນສິນຄ້າທີ່ເປັນທ່າແຮງຂອງລາວ,
ນອກນີ້, ຍັງເປັນການສົ່ງເສີມການຜະລິດ, ດຶງດູດການລົງທຶນ ເພື່ອກ້າວຜ່ານອຸປະສັກທີ່ເກີດຈາກໂຄວິດ-19 ແລະ ຍັງເປັນການຮອງຮັບໃຫ້ແກ່ຜົນສຳເລັດຂອງການກໍ່ສ້າງທາງລົດໄຟລາວ-ຈີນ ໃນທ້າຍປີ 2021 ນີ້ ກໍຄືຍຸດທະສາດ ໜຶ່ງເລວໜຶ່ງເສັ້ນທາງ ໃຫ້ປະກົດຜົນເປັນຈິງ,
ເຊື່ອໝັ້ນວ່າການສົ່ງອອກສິນຄ້າ ຜ່ານການຂົນສົ່ງຂອງທາງລົດໄຟນີ້ ຈະຊ່ວຍໃຫ້ຫຼຸກຕົ້ນທຶນ ແລະ ສາມາດແຂ່ງຂັນກັບສິນຄ້າຂອງບັນດາປະເທດ ແລະ ຂອງສາກົນໄດ້,
ປັດຈຸບັນ, ລາວ-ຈີນ ໄດ້ສຳເລັດອະນຸສັນຍາສອງຝ່າຍ ຊຶ່ງສາມາດສົ່ງອອກພືດ ແລະ ຜະລິດຕະພັນພືດ ໄປ ສປ ຈີນ ມີ 07 ຊະນິດພືດຄື: ສາລີ, ມັນຕົ້ນ, ກ້ວຍ, ເຂົ້າສານ, ໝາກໂມ, ມັນດ້າງ, ພືດຕະກູນຖົ່ວ ແລະ ນອກນີ້ຍັງມີ ງົວອີກ,
ສາມາດສຳເລັດການຮ່າງອະນຸສັນຍາ ເພື່ອລໍຖ້າເຊັນລົງນາມ, ໃນການສົ່ງໄປພືດ ແລະ ຜະລິດຕະພັນພືດ ສປຈີນ ອີກ 06 ຊະນິດພືດ ເຊັ່ນ: ໝາກຜຸກ, ໝາກກ້ຽງ, ໝາກນາວ, ໝາກໜ໊ອດ, ພືດເປັນຢາ, ໃບໝາກຕູມແຫ້ງ,
ແຕ່ນີ້ຮອດປີ 2025, ແມ່ນຈະສືບຕໍ່ເຈລະຈາທາງດ້ານເຕັກນິກເປີດຕະຫຼາດກັບ ສປຈີນ ຫຼາຍກວ່າ 90 ລາຍການພືດ ແລະ ຫຼັງຈາກເຊັນສັນຍາໃນພິທີຄັ້ງນີ້, ຈະດຳເນີນການເຈລະຈາເພື່ອຂໍໂກຕ້າສົ່ງອອກໄປ ສປຈີນ 05 ລາຍການທີ່ນອນໃນອະນຸສັນຍາທີ່ລາວ-ຈີນ ໄດ້ລົງນາມແລ້ວ ທີ່ມີໃນ 09 ລາຍການສິນຄ້າ ທີ່ໄດ້ລົງນາມໃນພິທີຄັ້ງນີ້,
ນັບແຕ່ປີ 2019, ບັນດາບໍລິສັດຄູ່ຮ່ວມເຈລະຈາໄດ້ຮ່ວມມື ຝ່າຍລາວໄດ້ສົ່ງອອກສິນຄ້າຫຼາຍກວ່າ 11 ລາຍການ ແລະ ໃນນີ້, ສະເພາະໝາກມ່ວງ ຫິນມະພານ ມີມູນຄ່າສົ່ງອອກເຖິງ 15 ລ້ານໂດລາ ໃນປີ 2019 ແລະ ປັດຈຸບັນ ໝາກເຜັດ ກຳລັງ ເປັນອີກ 01 ລາຍການສິນຄ້າທີ່ມີທ່າແຮງສົ່ງອອກໄປ ສປ ຈີນ,
ບໍລິສັດຄູ່ຮ່ວມມືຝ່າຍ ສປຈີນ COFCO, ຈະໃຫ້ການຊ່ວຍເຫຼືອໃນການສະເໜີຂໍເພີ່ມໂກຕ້າໃນ ການສົ່ງອອກສິນຄ້າຈາກ ລາວ ໄປ ສປຈີນ, ຈະສະເໜີການຍົກເວັ້ນພາສີສິນຄ້າຂອງ 09 ລາຍການ ສິນຄ້າທີ່ ບໍລິສັດ AIDC ລົງນາມຮ່ວມມືກັບ ລັດວິສາຫະກິດ ສະບຽງອາຫານ ຈີນ,
ຈະໃຫ້ຄໍາແນະນຳທາງດ້ານເຕັກນິກວິຊາການໃນການປຸງແຕ່ງສິນຄ້າ ແລະ ອື່ນໆທີ່ຈຳເປັນ ເພື່ອໃຫ້ການຮ່ວມມື ຂອງສອງບໍລິສັດສາມາດສ້າງຜົນປະໂຫຍດມາໃຫ້ສອງຝ່າຍ ກໍຄືຜົນປະໂຫຍດດ້ານການຄ້າມາສູ່ສອງປະເທດ ສປປລາວ ແລະ ສປຈີນ.