ຢ່າປະມາດ! ຍັງເຫັນຫລາຍຄົນຖືເບົາໃນການປະຕິບັດມາດຕະການລັອກດາວ
ປະຊາຊົນຈຳນວນໜຶ່ງຍັງຖືເບົາຕໍ່ຄຳສັ່ງລັອກດາວ ເລກທີ 016/ຈນວ.
ພະຍາດໂຄວິດ-19 ລະບາດຫລາຍຂື້ນໃນອາທິດນີ້ ແລະ ມີແນວໂນ້ມຈະຂະຫຍາຍຕົວກ້ວາງອອກໄປອີກສະນັ້ນເຮັດໃຫ້ທາງນາຍົກໄດ້ມີຄຳສັ່ງເຫັນດີໃນການລັອກດາວນະຄອນຫລວງວຽງຈັນ, ແລະ ຫລັງຈາກມີຄຳສັ່ງຂອງ ທ່ານເຈົ້າຄອງນະຄອນຫລວງວຽງຈັນ ສະບັບເລກທີ 016/ຈນວ ອອກມາ ທາງເຈົ້າໜ້າທີ່ກໍໄດ້ປະສານສົມທົບອຳນາດການປົກຄອງໃນແຕ່ລະບ້ານ ແຕ່ລະເຂດ ຕັ້ງຈຸດກວດ ກາປິດການສັນຈອນ ໃນຫລາຍຈຸດທົ່ວນະຄອນຫລວງວຽງຈັນ.
ແຕ່ຈາກການປະຈຳການໃນການເຟົ້າກວດກາຂອງເຈົ້າໜ້າທີ່ໃນເຂດຈຸດຕ່າງໆ, ເປັນຕົ້ນແມ່ນ ຈຸດກວດກາເຂດເຊື່ອມຕໍ່ບ້ານດົງສະຫວາດ-ໜອງໄຮ ແລະ ກວດກາບ້ານສົມຫວັງເໜືອ-ຫາດຊາຍຂາວ ທີ່ໄດ້ມີການປິດການສັນຈອນ, ແຕ່ກໍມີປະຊາຊົນຈຳນວນໜຶ່ງ ຍັງຖືເບົາ ແລະ ບໍ່ເຂົ້າໃຈ ຍັງພາກັນສັນຈອນໄປມາຕາມທ້ອງຖະໜົນຢູ່.
ທ່ານ ພັນໂທ ຄຳກ້ຽງ ດຳກາສີ ຫົວໜ້າ ປກສ ກຸ່ມບ້ານສວນມອນ ເມືອງສີສັດຕະນາກ, ຫົວໜ້າຈຸດກວດກາເຂດເຊື່ອມຕໍ່ ບ້ານດົງສະຫວາດ-ໜອງໄຮ ໄດ້ໃຫ້ສຳພາດວ່າ: ຕໍ່ກັບການຕັ້ງຈຸດກວດກາ ໃນຄັ້ງນີ້, ເຫັນວ່າພໍ່ແມ່ປະຊາຊົນບາງຈຳນວນ ຍັງອອກຈາກເຮືອນເພື່ອໄປສັກຢາວັກຊິນ, ໄປທຳມາຫາກິນ ແລະ ມີບາງຈຳນວນ ຍັງບໍ່ທັນເຂົ້າໃຈ ແລະ ບໍ່ຮັບຮູ້ຕໍ່ແຈ້ງການຂອງເຈົ້າຄອງນະຄອນຫລວງວຽງຈັນ.
ປັດຈຸບັນພາຫານະ ຕາມທ້ອງຖະໜົນກໍເລີ່ມຜ່ອນ ແລະ ໜ້ອຍລົງແດ່ແລ້ວ. ຕໍ່ກັບບັນຫາດັ່ງກ່າວ, ທາງເຈົ້າໜ້າທີ່ກໍໄດ້ໃຊ້ມາດຕະການ ແລະ ອະທິບາຍຊີ້ແຈງໃຫ້ຜູ້ຂັບຂີ່ພາຫະນະໄດ້ເຂົ້າໃຈ ຕໍ່ການຕັ້ງຈຸດກວດກາດັ່ງກ່າວ.
ພ້ອມນີ້, ທ່ານ ພັນຕີ ບຸນໂຮມ ແສງອາລຸນ ຮອງກອງຮ້ອຍຕຳຫລວດຈາລະຈອນ ເມືອງຫາດຊາຍຟອງ ຜູ້ຮັບຜິດຊອບຈຸດກວດກາ ບ້ານສົມຫວັງເໜືອ-ຫາດຊາຍຂາວ ກໍໄດ້ໃຫ້ສຳພາດວ່າ:
ໂດຍໄດ້ຮັບຄໍາສັ່ງຈາກຂັ້ນເທິງໃນການຕັ້ງຈຸດກວດ ແມ່ນໃຫ້ປິດການສັນຈອນຂອງພໍ່ແມ່ປະຊາຊົນ, ການໃຊ້ລົດໃຊ້ຖະໜົນ, ເຊິ່ງອີງໃສ່ການແຜ່ລະບາດຂອງພະຍາດໂຄວິດ-19 ທີ່ແຜ່ລາມເປັນວົງກວ້າງ ແຕ່ກໍ່ເຫັນໄດ້ວ່າພໍ່ແມ່ປະຊາຊົນບາງຈຳນວນ ຍັງຖືເບົາຕໍ່ຄຳສັ່ງຂອງເຈົ້າຄອງນະຄອນຫລວງ ເລກທີ 016/ຈນວ ທີ່ພາກັນອອກຈາກບ້ານເຮືອນຂອງຕົນ ເພື່ອເຮັດກິດຈະກຳຕ່າງໆ ເປັນຕົ້ນ ໄປເຮັດວຽກ, ໄປທຳມາຫາກິນ, ຊື້ເຄື່ອງໃຊ້ຂອງສອຍ ແລະ ອື່ນໆ.
ສຳລັບຈຸດກວດກາການສັນຈອນທັງສອງຈຸດນີ້, ແມ່ນເລີ່ມຕັ້ງແຕ່ວັນທີ 20-30 ກັນຍາ 2021 ຕະ ຫລອດ 24 ຊົ່ວໂມງ ແລະ ທາງເຈົ້າໜ້າທີ່ກໍໄດ້ມີການຜັດປ່ຽນກັນປະຈໍາການ. ພ້ອມນີ້, ທາງເຈົ້າໜ້າທີ່ກໍໄດ້ຮຽກຮ້ອງໃຫ້ພໍ່ແມ່ປະຊາຊົນ ໃຫ້ຢຸດການສັນຈອນໄປມາໃນໄລຍະນີ້ກ່ອນ, ຖ້າບໍ່ຈຳເປັນແທ້ແມ່ນບໍ່ໃຫ້ອອກຈາກທີ່ພັກຂອງຕົນເອງ ຫລື ຖ້າຈຳເປັນແທ້ ກໍໃຫ້ມີໜັງສືຢັ້ງຢືນຈາກອຳນາດການປົກຄອງບ້ານຕົນເອງ ເພື່ອປ້ອງກັນ, ຄວບຄຸມ ແລະ ສະກັັດກັ້ນການແຜ່ລະບາດຂອງພະຍາດໂຄວິດ-19.
ຂອບໃຈແຫລ່ງທີ່ມາ: ປະເທດລາວ.