ຢ່າຫລົງກັນ! ຄຳວ່າ ຫວຸດຫວິດ ແລະ ວຸດວິດ ມີຄວາມໝາຍບໍ່ຄືກັນ
ຄຳວ່າ ຫວຸດຫວິດ ແລະ ວຸດວິດ ແມ່ນມີຄວາມໝາຍແຕກຕ່າງກັນ.
ໃນສອງຄຳນີ້ຫາກວ່າທ່ານຢາກໃຫ້ຄວາມໝາຍ ຫລື ຢາກໃຊ້ຄວາມໝາຍຂອງຄຳໄປໃນທາງທີ່ວ່າ ລອດພົ້ນ ຫລື ເກືອບ…ເພື່ອໃຫ້ໄດ້ຄວາມໝາຍແບບນີ້ແລ້ວຕ້ອງສະກົດ ຫລື ນຳໃຊ້ໃຫ້ຖືກກໍຕ້ອງແມ່ນຄຳວ່າ ຫວຸດວິດ ແຕ່ຍັງພົບບາງຄົນຂຽນຜິດກັນຢູ່ອາດເນືອງມາຈາກຄວາມມັກງາຍ ຫລື ອາດມາຈາກຄວາມເຂົ້າໃຈຜິດໃນການນຳໃຊ້ ຕົວ ຫວ ແລະ ວ.
ເພື່ອຄວາມກະຈ່າງແຈ້ງ ແລະ ເພື່ອໃຫ້ຫລາຍໆທ່ານໄດ້ຮຽນຮູ້ເຂົ້າໃຈໄປນຳກັນລະຫວ່າງ ຄຳວ່າ ຫວຸດວິດ ແລະ ວຸດວິດນີ້ຂ້າພະເຈົ້າກໍໄດ້ໄປຊອກຫາຂໍ້ມູນຕ່າງໆເພື່ອນຳມາອະທິບາຍ ແລະ ເບິ່ງເຫດຜົນໄປນຳກັນ, ຕາມທີ່ໄດ້ໄປຊອກຫາໃນແຫລ່ງຂໍ້ມູນຕ່າງໆ ແລະ ໃນວັດຈະນານຸກົມຫລາຍໆສະບັບກໍໄດ້ໃຫ້ຄວາມໝາຍຂອງຄຳ ແລະ ອະທິບາຍໄປໃນທິດທາງທີ່ຄ້າຍໆກັນເຊິງລາຍລະອຽດຈະມີປະມານນີ້.
ຄຳວ່າ ຫວຸດຫວິດ.
ໂດຍທົ່ວໄປແລ້ວຈະເປັນຄຳທີ່ປະສົມກັນເລີຍໂດຍບໍ່ຄອຍປະກົດເຫັນຄຳວ່າ ຫວຸດ ຢູ່ຄຳດຽວ, ສ່ວນຫລາຍແມ່ນມາປະສົມກັບ ຫວິດ ໂດຍສະເພາະ “ຫວຸດຫວິດ”
ຄຳວ່າ ຫວຸດ.
ຫວຸດ ຕົວດຽວແມ່ນບໍ່ປາກົດເຫັນ ແລະ ກໍບໍ່ເຫັນການອະທິບາຍຄວາມໝາຍໄວ້ໃນວັດຈະນານຸກົມ.
ຄຳວ່າ ຫວິດ.
ເປັນຄຳກຳມະໝາຍເຖິງ ມົ້ມ, ລອດ, ພົ້ນ, ເກືອບຖືກ, …
ມັກໃຊ້ກັບເຫດການເອົາຕົວລອດແບບບໍ່ຄາດຄິດ, ການເອົາຕົວລອດແບບໜ້າອັດສະຈັນ.
ຕົວຢ່າງ:
ລົດເມທັງໃຫຍ່ ແລະ ຍາວ ແຊງຂ້ອຍໄປບຽດຂ້ອຍເກືອບຖືກຕຳລອດມາຢ່າງຫວຸດວິດ.
ເດັກນ້ອຍຢອກກັນເກືອບຕົກຮ່ອງນ້ຳພໍ່ລາວຈັບໄດ້ທັນຢ່າງຫວຸດຫວິດ.
ສາມາດເວົ້າໄດ້ວ່າ”ຫວິດ” ເປັນຕົວຫຼັກ ແລະຫວຸດເປັນຕົວຂະຫຍາຍຄຳ ທີ່ຢູ່ທາງໜ້າ.
ຄຳວ່າ ວຸດວິດ.
ຖ້າຈະໃຫ້ໄດ້ຄວາມໝາຍທີ່ວ່າ ລອດພົ້ນ ຫລື ເກືອບ ເຫັນວ່າເປັນການສະກົດທີ່ບໍ່ຖືກ, ຕາມຄວາມໝາຍແລ້ວ, ຄຳວ່າ ວຸດ ມີຄວາມໝາຍ ເຊັ່ນ ວຸດທິການສຶກສາ, ອາວຸດ, …
ຄຳວ່າ ວິດ ໝາຍເຖິງຫ້ອງສ້ວມ, ບ່ອນຖ່າຍ, ວິດຖ່າຍ…
ສະຫລຸບ.
ຢາກໃຊ້ຄວາມໝາຍຂອງຄຳໄປໃນທາງທີ່ວ່າ ລອດພົ້ນ ຫລື ເກືອບ, ຈະຕ້ອງສະກົດ ຫວຸດຫວິດ ແລະ ບໍ່ຄວນຂຽນວ່າ ວຸດຫວິດ, ຫວຸດວິດ, ສ່ວນ ຄຳວ່າ ວຸດວິດ ຈະເປັນຄວາມໝາຍອື່ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo