ມີຂາຍແລ້ວ! ປີ້ລົດໄຟຂາຍຢູ່ໃນຕົວເມືອງຊື້ໄດ້ທີ່ຕືກວຽງຈັນເຊັນເຕີ
laoedaily.com
ປັບປຸງແລ້ວ ສຳລັບທ່ານທີ່ຈະເດີນທາງດ້ວຍລົດໄຟສາມາດຊື້ປີ້ລົດໄຟໃນວຽງຈັນເຊັນເຕີໄດ້ເລີຍ
ຖືວ່າເປັນບັນຫາມາຕັ້ງແຕ່ມື້ເລີມຕົ້ນເປີດນຳໃຊ້ລົດໄຟຢ່າງເປັນທາງການໃນວັນທີ່ 03 ທັນວາ ປີ 2021 ຜ່ານມາ, ຖືວ່າເປັນບັນຫາທີ່ຫລາຍໆຄົນໄດ້ໃຫ້ຫາງສຽງກັນທົ່ວໄປກ່ຽວກັບການຈະຊື້ປີ້ລົດໄຟ, ບັນຫາການຊື້ໄປເກັບໄວ້ເພື່ອຂາຍຕໍ່ເກງກ່ຳໄລ ແລະ ຍັງມີຫລາຍໆຮ້ານ ຫລື ບຸກຄົນຮັບເປັນນາຍໜ້າໃນການຊື້ປີ້ຈ່ອງປີ້ລົດໄຟນີ້ຖືວ່າ ສັງຄົມໃຫ້ຄວາມສົນໃຈຢ່າງຫຼວງຫຼາຍ ກ່ຽວກັບຂ່າວລົດໄຟ
ໂດຍສະເພາະການຊື້ປີ້ ເຫັນໄດ້ວ່າປັດຈຸບັນ ແມ່ນພົບຄວາມຫຍຸ້ງຍາກຫຼາຍ ຕ້ອງໄດ້ໄປຕໍ່ຄີວແຕ່ເຊົ້າ ໄດ້ຕາກແດດຕາກລົມເປັນເວລາດົນຢູ່ສະຖານີລົດໄຟເຮັດໃຫ້ເສຍເວລາ ຫຼື ບາງຄັ້ງກໍ່ໄປເສຍຖ້ຽວບໍ່ໄດ້ປີ້ ຈາກຈຸດນີ້ເຮັດໃຫ້ສັງຄົມຈົ່ມວ່າຫຼາຍຢາກໃຫ້ມີການປັບປຸງແກ້ໄຂ ແລະຫຼ້າສຸດນີ້ບໍລິສັດທາງລົດໄຟແຈ້ງວ່າຈະເລີ່ມຂາຍຢູ່ຈຸດບໍລິການໃນເມືອງທີ່ສູນການຄ້າວຽງຈັນເຊັນເຕີ້ແລ້ວ.
ຕາມຂ່າວຈາກບໍລິສັດທາງລົດໄຟລາວ-ຈີນ ຈຳກັດ ໃຫ້ຮູ້ວ່າ: ຈຸດຂາຍປີ້ ລົດໄຟຄວາມໄວສູງລາວ-ຈີນ ຢູ່ສູນການຄ້າວຽງຈັນເຊັນເຕີ້ຈະເລີ່ມໃຫ້ບໍລິການມວນຊົນຢ່າງເປັນທາງການ ເລີ່ມແຕ່ວັນທີ 25 ກຸມພາ 2022 ກົງກັບວັນສຸກ ເວລາ 10:00 ເປັນຕົ້ນໄປ.
ທັງນີ້, ກໍ່ເພື່ອຄວາມສະດວກ ແລະເພີ່ມທາງເລືອກແກ່ຜູ້ຕ້ອງການໃຊ້ບໍລິການລົດໄຟລາວ-ຈີນ ເຖິງແມ່ນວ່າຍັງບໍ່ທັນເປີດຂາຍທາງອອນລາຍ ແຕ່ຂາຍຢູ່ອາຄານສູນການຄ້າວຽງຈັນເຊັນເຕີຊັ້ນ1 ນະຄອນຫຼວງວຽງຈັນ ກໍ່ຖືວ່າໄດ້ຊ່ວຍປະຊາຊົນຜູ້ຕ້ອງການເດີນທາງຜ່ານລົດໄຟຫຼາຍສົມຄວນ ບໍ່ໃຫ້ໄດ້ໄປຢືນຕໍ່ຄີວຍາວດ້ານນອກອາຄານ, ບໍ່ເສຍເວລາຂີ່ລົດໄປໄກຮອດສະຖານີອີກຕໍ່ໄປ.
ທາງນີ້ການຂາຍປີ້ລົດໄຟແມ່ນສາມາດຊື້ໄດ້ 3 ວັນລ່ວງໜ້າ ໃນຈຸດນີ້ນີ້ຕາມແຜນແມ່ນຈະຂາຍປີ້ລົດໄຟຈາກວຽງຈັນຫາບໍ່ເຕັນ, ເມືອງໄຊ ແລະ ຫຼວງພະບາງ. ເວລາຂາຍປີ້ໃນເບື້ອງຕົ້ນຈະເລີ່ມແຕ່ 10 ໂມງເຊົ້າ ຫາ 15 ໂມງ 30 ນາທີ. ສ່ວນວິທີຊື້ປີ້ສາມາດຈ່າຍຜ່ານການຮູບບັດທະນາຄານ ຫຼື ສະແກນ QR code, ໃນເບື້ອງຕົ້ນຂອງການຊື້ປີ້ຍັງບໍ່ຮັບເງິນສົດເທື່ອ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: laoedaily.com.
