ມາຮູ້ຈັກກັບ ວັດນາກຫໍ່ຜ້າ ຮ່ອງແພ ບ້ານຖິ່ນເພຍ ນະຄອນຫລວງວຽງຈັນ
ມາເບິ່ງປະຫວັດຄວາມເປັນມາຂອງ ວັດນາກຫໍ່ຜ້າ ຮ່ອງແພ ບ້ານຖິ່ນເພຍ ເມືອງຫາດຊາຍຟອງ.
ເມືອເວົ້າເຖິງວັດນາກຫໍ່ຜ້າ ຮ່ອງແພ ບ້ານຖິ່ນເພຍ ເມືອງຫາດຊາຍຟອງ ນະຄອນຫລວງວຽງຈັນນີ້, ໄດ້ມີປະຫວັດຄວາມເປັນມາອາໜ້າອັດສະຈັນ ແລະ ຫລາຍໆທ່ານຄົງຍັງບໍ່ຮູ້ວ່າທີ່ໄປທີ່ມາມີແນວໃດເຊິ່ງໄດ້ມີຕຳນານ “ອຸຣັງຄະນິທານ” ໄດ້ເລົ່າໄວ້ວ່າ: ເມື່ອກ່ອນມີພຣະອໍຣະຫັນ 3 ອົງ ຄື: ພຸດທະຮັກຂິຕະ, ທໍາມະຮັກຂິຕະ ແລະ ສັງຄະຮັກຂິຕະ. ທີ່ເດິນທາງມາຈາກຊົມພູທະວີບ.
ໄດ້ເຂົ້າມາເຜີຍແຜ່ພຸດທະສາສະໜາສູ່ດິນແດນໃນແຖວປະເທດລາວ ການມາເຜີຍແຜ່ພຸດທະທໍາໃນເຂດແຄວ້ນນີ້ ໂດຍຮີບໂຮມເພື່ອສັງສອນພຣະທໍາ ຈາກຫຼາຍຮ້ອຍຄົນ ຄັດເຂົ້າມາບວດ ຈົນໄດ້ພຣະທີ່ປະຕິບັດດີ ປະຕິບັດຊອບຈຳນວນ 5 ອົງ ຈາກນັ້ນຈຶ່ງສົ່ງພຣະຈຳນວນ 5 ອົງທີ່ຄັດເລືອກນີ້ ໄປສຶກສາພຣະທໍາ ທີ່ເມືອງຣາຊະຄື ອິນເດຍ ພ້ອມດ້ວຍຄະນະ 20 ອົງໄປໃນຄັ້ງນັ້ນດ້ວຍ ຫລັງຈາກ 2 ປີ ຈຶ່ງໄດ້ຮຽນຈົບ ທີ່ເມືອງຣາຊະຄື ທີ່ອິນເດຍແລ້ວ ຈຶ່ງໄດ້ກັບຄືນມາສູ່ດິນແດນບ້ານເກີດໂຕເອງ ໂດຍໄດ້ນຳຫຼັກທໍາຂອງພຣະສໍາມາສໍາພຸດທະເຈົ້າ ແລະ ທີ່ສຳຄັນໄດ້ນຳເອົາພຣະບໍຣົມສາຣິຣິກະທາດຂອງພຣະບໍຣົມສາສະດາ ເຊັ່ນ ກະດູກຫົວເໜົ່າ, ກະດູກແຂ້ວຝາງ ແລະ ອຶ່ນໆ ແລ້ວນໍາມາບັນຈຸໃນອູບມຸງຕາມຖິ່ນແຄວ້ນແຫ່ງນີ້ຄື:
1.ພຣະທາດຫົວເໜົ່າ ຄື:ພຣະທາດຫຼວງ ນະຄອນຫລວງວຽງຈັນ.
2.ອຸລັງຄະທາດ ຄື:ພຣະທາດພຣະນົມ ນະຄອນພຣະນົມ .
3.ພຣະທາດແຂ້ວຝາງ 3 ອົງ ບັນຈຸໄວ້ທີ່ພຣະທາດໂພນຈິກວຽງງົວ ໜອງຄາຍ .
4.ພຣະທາດແຂ້ວຝາງ 4 ອົງ ຢູ່ທີ່ພຣະທາດຫໍ່ຜ້າ ຮ່ອງແພ ເຂດບ້ານຫ້ອມ ນະຄອນຫລວງວຽງຈັນ
5.ພຣະທາດ ພຣະບາດເບື້ອງຂວາ 9 ອົງ ມາປະດິດສະຖານໄວ້ທີ່ພຣະທາດແຄມນ້ຳຂອງ ພຣະທາດຫຼ້າໜອງ ໜອງຄາຍ(ປະຈຸບັນຈົມຢູ່ກາງນ້ຳຂອງ).
6.ພຣະທາດຫົວເໜົ່າ ຈຳນວນ 29 ອົງ ມາປະດິດສະຖານໄວ້ທີ່ພຣະທາດບັງພວນ ໜອງຄາຍ
ຕົກມາຮອດສະໄຫມ ພຣະເຈົ້າໂພທິສາຣະຣາຊ ເມື່ອ ພສ 2063-2093 ຫຼື ຄສ 1520-1550 ໄດ້ມີພຣະຣາຊະສັດທາອັນແຮງກ້າຕໍ່ພຸດທະສາສາໜາ ຊົງມາບູຣະນະອູບມຸງ ຂອງພຣະທາດແຂ້ວງຝາງ ທີ່ວັດຫໍ່ຜ້າ ຮ່ອງແພນີ້ ໂດຍມີການສ້າງພຣະທາດບົວຫລ່ຽມ ຫຍໍ້ມູມ 20 ກໍ່ກວມອູບມຸງນ້ອຍຂຶ້ນ ຈາກນັ້ນກໍ່ມີການມາສ້າງພຣະພຸດທະຮູບນາກປົກ ປູກຕົ້ນສີມະຫາໂພ.
ປະຈຸບັນນີ້ພຣະທາດທີ່ບັນຈຸພຣະທາດແຂ້ວຝາງອົງທີ່ກ່າວເຖິງນີ້ ແມ່ນບໍ່ມີໃຫ້ເຫັນ ມີແຕ່ຖານຂອງພຣະທາດນີ້ເທົ່ານັ້ນ ເມື່ອກ່ອນມີພຣະອາຈານທີ່ເພິ່ນມາຢູ່ວັດແຫ່ງນີ້ ເພິ່ນໄດ້ພາອ້າຍຈົວມາຖາກຖາງ ແລະ ຂຸດດິນຂ້າງພຣະທາດອົງນີ້ ຈາກນັ້ນພຣະ ຈົວຫມົດວັດບໍ່ສະບາຍ ຈຶ່ງຕ້ອງມາຂໍຂະມາ ລ່າໂທດ ແລະ ສຶບປະຫວັດຄວາມເປັນມາຂອງພຣະທາດດັ່ງກ່າວ ຈຶ່ງຮູ້ວ່າເປັນພຣະທາຕຸທີ່ສຳຄັນ ແລະສັກສິດຫລາຍ.
ນ້ຳສ້າງຂອງວັດດັ່ງກ່າວນີ້ ແມ່ນມີມາເປັນຮ້ອຍໆ ປີມາແລ້ວ ບໍ່ເຄີຍບົກແຫ້ງຈັກເທື່ອ ມີປີຫນຶ່ງ ນ້ຳຂອງຫນອງຄຳແສນຂ້າງໆວັດບົກແຫ້ງ ຈະມີປາຈາກໜອງຄຳແສນມາອາໄສຢູ່ໃນນ້ຳສ້າງດັ່ງກ່າວນີ້
ພຣະນາກປົກອົງນີ້ທາງຫລັງພຣະຈະມີຮູປະມານທໍ່ແຂນຄົນ ຮູດັ່ງກ່າວຊອດຮອດໜອງຄຳແສນ ຊອດຮອດແຄມຂອງ ຊອດຮອດວັດນາກນ້ອຍ ແຖວຫລັກ 3 ແຖວສະຖານທຸດສິງກະໂປ ( ຂໍສັງເກດ ຮູບຮ່າງພຣະຍານາກປົກພຣະພຸດທະຮູບອົງນີ້ ເປັນແບບລາວບູຮານໂດຍແທ້ຈິງ ກໍ່ຄື ມີຫອນທີ່ຕັ້ງໄປທາງຫນ້າ ເຊິ່ງນາກປະຈຸບັນນີ້ຈະມີຫອນຊີ້ໄປດ້ານຫລັງເປັນສ່ວນຫລາຍ ເພາະຮູບນາກທີ່ງົດງາມ ຫນ້າເກງຂາມ ໃນການຮັກສາພຸດທະສາສະນາ ແລະ ສົ່ງເສີມໃຫ້ພຸດທະສາສະໜາໃຫ້ຈະເຣິນຮຸ່ງເຮືອງໄປຫນ້າເລື້ອຍໆ
ພຣະທາດແຂ້ວຝາງຂອງວັດຫໍ່ຜ້າ ຮ່ອງແພນີ້ ມີການບູຣະນະແຕ່ສະໄຫມພຣະເຈົ້າໂພທິສາຣະຣາຊ ເມື່ອ ພສ 2063-2093 ຫລື ຄສ 1520-1550 ແລະ ດິນແຖວດິນເປັນດິນໃກ້ແຄມຂອງ ໃກ້ແຄມຫນອງຄຳແສນ ເປັນດິນອ່ອນ ເຮັດໃຫ້ພຣະທາຕຸຫລົ້ນລົງ ແລະບໍ່ໄດ້ມີການບູຣະນະນັບແຕ່ນັ້ນມາເລີຍ ຈົນກະທັງຕົກມາຮອດສະໄຫມຝຣັ່ງເສດເຂົ້າມາ ຈຶ່ງມີການມາບູຣະນະປະຕິສັງຂອນຄືນໃຫມ່.
ຂອບໃຈແຫລ່ງທີ່ມາ: Art and Culture of Laos.
