​ວັດ​ວິ​ຊຸນ​ເປັນ​ວັດ​ໜຶ່ງ​ທີ່​ຕັ້ງ​ຢູ່​ໃຈ​ກາງ​ເມື່ອງ​ຫລວງ​ພະ​ບາງ ແລະ ປະ​ກາຍ​ລັດ​ສະ​ໝີ​ສວຍ​ງາມ​ໜ້າ​ທ່ຽວ​ຊົມ, ພຣະເຈົ້າວິຊຸນນະຣາຊທິບໍດີ ( ທ້າວພູໄພ ) ຊົງສ້າງວັດແຫ່ງນີ້ໃສ່ນາໄຮ່ດຽວ ຫລືຊາວບ້ານຊາວເມືອງພາກັນເອີ້ນວ່າ ນາເຂົ້າຈ້າວ ເມື່ອເດືອນ 6 ຂຶ້ນ 2 ຄ່ຳ ມື້ຮວາຍຍີ ມື້ເຊົ້າປີເຕົ້າສັນ ຈສ 874 ເສົາໄມ້ສູງ 15 ວາ 1 ຄືບ ໃຫຍ່ 13 ກຳ 5 ຫ້ອງ ກໍ່ແທ່ນ ມຸງດິນຂໍຝາແປ້ນ ລວຍາວວັດ 19 ວາ ລວງກວ້າງ 9 ວາ ເປັນກຳນົດ.

ພຣະຣາຊເທວີຂອງພຣະເຈົ້າວິຊຸນນະຣາຊທິບໍດີ ເພິ່ນກໍ່ປະກອບສັດທາໃນການສ້າງເຈດີຫລວງ ວັດຕໍ່ຫນ້າອາຮາມ ( ສິມ )

ພຣະເຈົ້າວິຊຸນນະຣາຊທີບໍດີ ພຣະອົງໄດ້ອັນເຊີນພຣະບາງຈາກວັດມະໂນຣົມ ໄປປະດິດສະຖານໄວ້ທີ່ແທ່ນພຣະບາງໃນອາຮາມຂອງວັດວິຊຸນ ເມື່ອປີ ກ່າເຮົ້າ ຈສ 875 ທຸກໆຮອດຂອບລະດູປີໃຫມ່ລາວມາຮອດ

ພຣະອົງກໍ່ຊົງຊ້າງພຣະທີ່ນັ່ງ ພ້ອມດ້ວຍເທວະດາຫລວງ ( ປູ່ເຍີ-ຍ່າເຍີ ) ພິກຂຸສາມະເນນ ແລະຣາຊດອນທັງຫລາຍໄປສົງນ້ຳພຣະບາງ ຈາກນັ້ນເທວະດາຫລວງກໍ່ຟ້ອນຖວາຍໃຫ້ຜູ້ຄົນທັງຫລາຍໄດ້ຊື່ນໄດ້ຊົມເບິ່ງ.

ພຣະເຈົ້າວິຊຸນນະຣາຊທິບໍດີ ຄອງຣາຊສົມບັດໄດ້ 20 ປີ ພຣະຊົນມີພັນສາໄດ້ 52 ປີ ກໍ່ສະຫວັນນະຄົດ ໃນວັນສຸກ ເດືອນ 12 ຂຶ້ນ 12 ຄ່ຳ ປີກົດສີ ຈສ 882

ປີກ່າມົດ ຈສ 885 ພຣະເຈົ້າໂພທິສາຣະນະຣິນທາທິຣາຊ ພຣະຣາຊໂອຣົສທົງແຕ່ຣາຊທູດໄປຂໍເອົາພຣະແຊກຄຳ ນຳພຣະເຈົ້າຊຽງໃຫມ່ມະຫາພົມມະຣາຊພຣະເມືອງເກສເກົ້າຜູ້ເປັນທີ 2 ພໍ່ເມຍມາໄວ້ເປັນຄູ່ພຣະບາງ ທາງເມືອງຊຽງໃຫມ່ໄດ້ແຕ່ງໃຫ້ພຣະເທພມົງຄຸລເຖຣະເປັນຜູ້ນຳມາພ້ອມດ້ວຍພຣະໄຕຣປີດົກ 60 ຄັມພີ.