ພະທາດແມວສີ ເມືອງລອງແຂວງຫລວງນ້ຳທາ ກຽມບູລະນະຄືນໃໝ່.
ເມືອງລອງ ແຂວງຫລວງນ້ຳທາ ກຽມບູລະນະ ພະທາດແມວສີຄືນໃໝ່ໃຫ້ເປັນແຫລ່ງທ່ອງທ່ຽວ
ຖ້າຈະເວົ້າເຖິງພະທາດອັນເກົ່າແກ່ໃນແຂວງຫລວງນ້ຳທາຖືວ່າມີຢ່າງຫລວງຫລາຍທັງເປັນເອກະລັກໄວ້ແຕ່ລະເມືອງແຕ່ຍັງມີອີກພະທາດໜຶ່ງທີ່ຫລາຍໆທ່ານຍັງຄົງບໍ່ໄດ້ຮູ້ຈັກ ນັ້ນກໍຄືພະທາດແມວສີ, ກຸ່ມບ້ານສະ, ເມືອງລອງ, ແຂວງ ຫຼວງນ້ຳທາ ເປັນພະທາດເກົ່າແກ່ທີ່ສັກສິດ ທີ່ຊາວບ້ານເຄົາລົບນັບຖື ກຳລັງຈະໄດ້ຮັບການບູລະນະຄືນໃໝ່ ເນື່ອງຈາກພະທາດອົງດັ່ງກ່າວເປ່ເພເສຍຫາຍໄປຫລາຍແລ້ວ ແລະ ຕ້ອງການທີ່ຈະປັບປຸງ ແລະ ພັດທະນາໃຫ້ດີຂື້ນເພື່ອໃຫ້ປະຊາຊົນໄດ້ເຂົ້າມາສັກຂະລະບູຊາຕໍ່ໄປ.
ເຊິງໃນວັນທີ 1 ກຸມພາ 2022 ທີ່ຜ່ານມາ ທາງຄະນະຈັດຕັ້ງ ເມືອງລອງ ກໍໄດ້ຈັດພິທີເປີດ ການບູລະນະ ແລະ ກໍ່ສ້າງ ພະທາດແມວສີ ຄືນໃໝ່ ໂດຍການເຂົ້າຮ່ວມຂອງ ທ່ານ ອຸ່ນຄໍາ ວັນປະເສີດ, ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ, ພຣະອາຈານ ອຸໄທ ສໍວຽງໄຊ, ຄະນະປະຈໍາ ອົງການພຸດທະສາສະນາສໍາພັນລາວ, ພ້ອມດ້ວຍຂະແໜງການທີ່ກ່ຽວຂ້ອງຂັ້ນເມືອງ, ອົງການຈັດຕັ້ງບ້ານ, ເຖົ້າແກ່ແນວໂຮມ ແລະ ຜູ້ມີຈິດໃຈອັນເຫຼື້ອມໃສສັດທາ ເຂົ້າຮ່ວມ.
ໃນພິທີດັ່ງກ່າວ ກໍໄດ້ມີການ ເຮັດພິທີທາງສາສະໜາ ເພື່ອຂໍຂະມາເຈົ້າຖິ່ນ-ເຈົ້າຖານ ແລະ ສິ່ງສັກສິດທັງຫຼາຍ ຕາມຮິດຄອງປະເພນີ, ເຊິ່ງການບູລະນະ ແລະ ກໍ່ສ້າງ ພະທາດແມວສີ ຢູ່ກຸ່ມບ້ານສະ ໃນຄັ້ງນີ້ ແມ່ນຈະໄດ້ນໍາໃຊ້ທຶນ ຈາກການປະກອບສ່ວນຂອງບັນດາຊາວພຸດທະສາສະນິກະຊົນ ທັງພາຍໃນ ແລະ ຕ່າງປະເທດ
ເພື່ອສ້າງໄດ້ອົງພະທາດດວງໃໝ່ ໃຫ້ບັນດາຊາວພຸດທະສາສະນິກະຊົນທັງຫຼາຍທີ່ເຄົາລົບນັບຖື ໄດ້ມາກາບໄຫວ້ບູຊາ ທັງຕິດພັນກັບການພັດທະນາ ແລະ ເສີ່ມຂະຫຍາຍ ແຫຼ່ງທ່ອງທ່ຽວທາງດ້ານວັດທະນະທໍາ ໃຫ້ຍືນຍົງຕະຫຼອດໄປ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ຄໍາອ່ອນ ແສງອຸ່ນ ນັກຂ່າວເມືອງລອງ