ຄະນະຊ່ຽວຊານສູນມໍລະດົກໂລກ ອຸຍແນັສໂກຢ້ຽມຢາມ ສປປ ລາວ
ພິທີຕ້ອນຮັບຄະນະຊ່ຽວຊານສູນມໍລະດົກໂລກ ອຸຍແນັສໂກລັດທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ
ໄດ້ມີການຈັດພິທີຕ້ອນຮັບການເຂົ້າມາຢ້ຽມຢາມຂອງຄະນະຊ່ຽວຊານສູນມໍລະດົກໂລກໃນວັນທີ 9 ເມສາ 2022 ທີ່ຜ່ານມາ, ຢູ່ທີ່ນະຄອນຫລວງວຽງຈັນ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ)
ໄດ້ຕ້ອນຮັບ ທ່ານ ນາງ ນາໂອະ ຮາຢາຊິ ຜູ້ຊ່ຽວຊານດ້ານວັດທະນະທຳພາກພື້ນອາຊີ-ປາຊີຟີກ, ສູນມໍລະດົກໂລກ ອົງການອຸຍແນັສໂກ ແລະ ທ່ານ ສຈ. ລໍເຣັນ ໂລ ຜູ້ຊ່ຽວ ຊານຈາກສະພາສາກົນເພື່ອອະນຸລັກມໍລະດົກໂລກສະຖານ ແລະ ອະນຸສອນສະຖານ ອີໂກໂມສ (ICOMOS) ພ້ອມດ້ວຍຄະນະ ໃນໂອກາດທີ່ເດີນທາງມາເຮັດວຽກຢູ່ ສປປ ລາວ ໃນການລົງປະເມີນ ແລະ ຕິດຕາມສະພາບການປົກປັກຮັກສາເມືອງມໍລະດົກໂລກຫລວງພະບາງ ໃນລະຫວ່າງວັນທີ 4-8 ເມສາ 2022 ນີ້.
ໃນໂອກາດດັ່ງກ່າວ, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຕ້ອນຮັບອັນອົບອຸ່ນຢ່າງຈິງໃຈ ແລະ ຕີ ລາຄາສູງຕໍ່ ທ່ານ ນາງ ນາໂອະ ຮາຢາຊິ ພ້ອມດ້ວຍຄະນະ ທີ່ໄດ້ລົງປະເມີນ ແລະ ຕິດຕາມສະພາບການປັກປັກຮັກສາ ເມືອງມໍລະດົກຫລວງພະບາງ ໃນຄັ້ງນີ້ ແມ່ນເພື່ອປະຕິບັດຕາມລະບຽບການມາດຖານເງື່ອນໄຂຂອງສົນທິສັນຍາມໍ ລະດົກໂລກ ແລະ ຕິດຕາມການຈັດຕັ້ງປະຕິບັດ ບັນດາໂຄງການພັດທະນາພື້ນຖານໂຄງລ່າງ ຢູ່ໃນ ແລະ ໃກ້ຄຽງ ເມືອງມໍລະດົກໂລກຫລວງພະບາງ ເຊັ່ນ:
ໂຄງການກໍ່ສ້າງຕາຝັ່ງເຈື່ອນແຄມນ້ຳຄານ, ໂຄງການບູລະນະຂົວນ້ຳຄານເກົ່າ, ສະພາບຄວາມສົມບູນ ແລະ ຄວາມເປັນເອກະລັກດັ້ງເດີມຂອງເມືອງ, ການປົກປ້ອງ ແລະ ການບໍລິຫານພາຍໃນຕົວເມືອງ ແລະ ອື່ນໆ ຕາມມະຕິຂອງກອງປະຊຸມຄະນະກຳມະການມໍລະດົກໂລກ ຄັ້ງທີ 44.
ທ່ານ ນາງ ນາໂອະ ຮາຢາຊິ ກໍໄດ້ຕາງໜ້າໃຫ້ຄະນະ ສະແດງຄວາມຂອບໃຈ ຕໍ່ທ່ານ ລັດຖະມົນຕີ ທີ່ໄດ້ໃຫ້ຕ້ອນຮັບອັນອົບອຸ່ນໃນຄັ້ງນີ້, ພ້ອມທັງລາຍງານກ່ຽວກັບຜົນສຳເລັດການລົງປະເມີນ ແລະ ຕິດຕາມສະພາບການປົກປັກຮັກສາ ເມືອງມໍລະດົກຫລວງພະບາງ ໃຫ້ທ່ານ ລັດ ຖະມົນຕີໄດ້ຮັບຊາບນຳອີກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ຂປລ