ປະຫວັດເຈົ້າສຸຂເສີມ ແລະ ພຣະທາດພູກຽວທາດເກົ່າແກ່ຫຼວງພະບາງ
ທ່ອງທ່ຽວ ປະຫວັດສາດ ວັດທະນະທຳ
ມາຮູ້ຈັກກັບເຈົ້າສຸຂະເສີມ ແລະ ພຣະທາດພູກຽວທາດເກົ່າແກ່ ທີ່ຍັງສ້າງບໍ່ແລ້ວມາແຕ່ອະດີດຈົນຮອດປັດຈຸບັນ.
ພຣະທາດພູກຽວ ຕັ້ງຢູ່ ຈອມພູກຽວ ປາກແມ່ນໍ້າເຊືອງ ນະຄອນຫຼວງພຣະບາງ ເບື້ອງເໜືອ ແທ່ນຕີນພຣະທາດດ້ານຫນຶ່ງໆ ຍາວ 19 ມ ສູງ 4,50 ມ, ຕາມການເລົ່າສືບກັນມາວ່າ ທາດພູກຽວ ຫຼວງພະບາງ ສ້າງຂຶ້ນພ້ອມກັບພະທາດພູສີ ຫຼວງພະບາງ ໂດຍມີການແຂ່ງຂັນກັນສ້າງ ຖ້າບ່ອນໃດສ້າງແລ້ວກ່ອນ ຈະໄດ້ເປັນບ້ານເປັນເມືອງກ່ອນ ແຕ່ວ່າການສ້າງພະທາດພູສີສ້າງແລ້ວກ່ອນ ຈຶ່ງເຮັດໃຫ້ທາດພູກຽວ ບໍ່ໄດ້ຮັບການສ້າງຕໍ່ນັບແຕ່ນັ້ນມາເລີຍ.
ປະຫວັດ ເຈົ້າສຸຂເສີມ
ເຈົ້າສຸຂເສີມ ເປັນພຣະຣາຊໂອຣົສ ສົມເດັດພຣະເຈົ້າມັງທາຕຸຣາຊ ເກີດປີຮັບເໝົ້າ ຈ.ສ. 1157 (ຄ.ສ. 1795) ໄດ້ເປັນ ເຈົ້າຣາຊບຸດ ແລະ ເຈົ້າຣາຊວົງສ໌. ສົມເດັດພຣະນັ່ງເກົ້າ (ເຈົ້າຊີວິດຣາຊການທີ່ 3 ຂອງສຍາມ) ຊົງຕັ້ງໃຫ້ເປັນ ພຣະເຈົ້າລ້ານຊ້າງ. ເຖິງເມື່ອປີກັດໃຄ້ ຈ.ສ. 1201 (ຄ.ສ. 1839) ເດືອນ 6 ພຣະອົງໄດ້ຂໍ ພຣະບາງ ມາພ້ອມກັບເບັ້ຽ ໝາກທຸຣຽນ 50 ກົກ, ແຫ່ມາທາງບົກ ຈຶ່ງເອີ້ນວ່າທາງພຣະບາງ ຮອດບ້ານຊຽງແມນ ແລະ ຄົບງັນສລອງຢູ່ດອນຊາຍທ່າຄົກເຮືອ 7 ວັນ 7 ຄືນ ແລ້ວແຫ່ຂ້າມຂອງ ເຂົ້າເມືອງຫລວງພຣະບາງ ອັນເຊີນໄປປະດິສຖານ ໃນພຣະອຸໂປສົຖ ວັດວິຊຸນຫຣາຊສັທທາຣາມ.
ຄັນເຖິງ ວັນອັງຄານ ເດືອນ 9 ຂຶ້ນ 3 ຄໍ່າ ມື້ເປິກເສັດ ຍາມກອງແລງ (ຄ.ສ. 1839) ຊາວເມືອງພາກັນຣາຊາພິເສກຫົດສົງ ພຣະອົງ ຂຶ້ນເປັນພຣະເຈົ້າແຜ່ນດິນ.ພຣະອົງ ສເດັດໄປສ້າງສວນອຸທຍານ ປູກຕົ້ນໝາກທຸຣຽນ ໃສ່ຕີນພູນາງກາງຮີ ເທິງທ່າຄົກເຮືອ ເໜືອບ້ານຊຽງແມນ ແລ້ວຂຸດຄອງເໝືອງ ເອົານໍ້າຫ້ວຍຕານໄຫລມາຕົກໃສ່ສວນນີ້ ສໍາເຣັດແລ້ວ ສເດັດໄປສ້າງ ນາຜາແດງ ຝັ່ງຂວາຂາລ່ອງນໍ້າຂອງ ກົງກັນຂ້າມບ້ານປາກເຊືອງ ເພື່ອສ້າງພຣະທາດພູກຽວ ( ຕັ້ງຢູ່ ຈອມພູກຽວ ປາກນໍ້າເຊືອງ ເບື້ອງເໜືອ ແທ່ນຕີນບ້າງ ດ້ານນຶ່ງໆ ຍາວ 19ມ ສູງ 4,50ມ, ເກື່ອນທະລາຍລົງ ວັນພຸດ ເດືອນ 9 ແຮມ 12 ຄໍ່າ ປີເປິກໃຈ້ ຈ.ສ. 1310 – ຄ.ສ. 1948) ມີຫໍໄຫວ້ພ້ອມ ແລ້ວສ້າງພຣະແທ່ນ ໃສ່ດອນຄູນ.
ພຣະຣາຊທານນາມຍົສ ໃຫ້ ຈານບຸສດີ ບ້ານປາກເຊືອງ ເປັນພຣະຍາໝື່ນໜ້າ ຮັກສາພຣະທາດພູກຽວ ພຣະແທ່ນດອນຄູນ ນາຜາແດງ ແລະ ຂ້າແກ້ງຕ້ອງ. ຄັ້ນເຖິງລະດູປີໃໝ່ ເດືອນ 5 ສເດັດໂດຍ ພຍຸຫະຊ້າງມ້າຍາຕຣາ ທາງສຖົລມາຄ ນໍາເອົານໍ້າທ່ຽງ ( ນໍ້າບໍຣິສຸດ ຈາກຖໍ້ານາງອັ່ນ ຢູ່ເຂດບ້ານໂສມ ບ້ານນາ ຕາແສງຊຽງແມນ ) ໄປສົງພຣະບາງ ທີ່ວັດວິຊຸນ ພຣະພຸທຮູບ ວັດຊຽງທອງ ແລະ ວັດສວັນເທວະໂລກຊຽງດົງ ແລ້ວກໍສເດັດ ໂດຍພຍຸຫະຍາຕຣາ ທາງຊົລມາຄ ພັກສເວີຍ ພຣະກາຍາຫາຣ ທີ່ທ່າບ້ານດ່ານ ແລ້ວເມືອໄຫວ້ ພຣະທາດພູກຽວ ລົງມາຊົງປະທັບ ທີ່ພຣະແທ່ນດອນຄູນ ໃຫ້ຣາສດອນຕາແສງປາກເຊືອງ ຫົດສົງ ແລ້ວເມືອສົງພຣະພຸທຮູບຖໍ້າຕິ່ງ ແລະ ວັດປາກອູ ຊົງປະທັບແຮມທີ່ ພັບພາບ້ານປາກອູ ຣາຕຣີນຶ່ງ ຈຶ່ງສເດັດກັບສູ່ພຣະນະຄອນ.
ພຣະອົງຢູ່ໃນຣາຊສົມບັດ 11 ປີ ສິຣິພຣະຊົນພັນສາ 55 ປີ ສວັນຄົດຍາມແຖ ໃກ້ທ່ຽງ ວັນຈັນ ເດືອນ 10 ແຮມ 2 ຄໍ່າ ປີ ກົດເສັດ ຈ.ສ. 1212 ທີ່ຫໍໄຊສວນອຸທຍານຊຽງແມນ. ຄັນເຖິງເດືອນຈຽງ ແຮມ 3 ຄໍ່າ ເຈົ້າອຸປຣາຊອຸ່ນແກ້ວ ທິວົງຄົດ ກັບກຸງເທບ ເຈົ້າຣາຊວົງ ເຈົ້າຣາຊບຸດ ເສນາອາມາດ ແລະ ຣາສດອນ ພ້ອມກັນປົງພຣະບໍຣົມສົພ ພຣະເຈົ້າສຸຂເສີມ ທີ່ດອນຊາຍຄົກເຮືອ ເດືອນ 4 ຂຶ້ນ 6 ຄໍ່າ ປີຮວງໃຄ້ ຈ.ສ. 1213 ແລ້ວຖວາຍພຣະນາມວ່າ ເຈົ້າມະຫາຊີວິດຫລວງ ຊຽງແມນ ໄດ້ເອົາພຣະອັດຖິແຫ່ເມືອ ບັນຈຸໄວ້ທາດພູກຽວ.
ພຣະທາດພູກຽວ ຮູບຖ່າຍເມື່ອປີ 2020 ພຣະທາດພູກຽວ ຕັ້ງຢູ່ຈອມພູກຽວ ທີ່ປາກແມ່ນ້ຳເຊື່ອງ ນະຄອນຫຼວງພຣະບາງ ພຣະທາດພູກຽວ ຕັ້ງຢູ່ ຈອມພູກຽວ ປາກແມ່ນໍ້າເຊືອງ ນະຄອນຫຼວງພຣະບາງ ເບື້ອງເໜືອ ແທ່ນຕີນພຣະທາດດ້ານຫນຶ່ງໆ ຍາວ 19 ມ ສູງ 4,50 ມ ສ້າງໂດຍ ເຈົ້າສຸຂເສີມ ເມື່ອປີ ຄ.ສ 1839 ແລະ ພຣະອັດຖິ ຂອງພຣະອົງ ກໍ່ບັນຈຸໄວ້ ພຣະທາດພູກຽວ ແຫ່ງນີ້
ຄັດຈາກ ພົງສາວະດານຊາຕິລາວ
ຂອງ ເຈົ້າຄໍາໝັ້ນ ວົງກົຕຣັຕນະ
ເຈົ້າເມືອງບໍາເໜັຈ ພ.ສ. 2504
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: Laos Journey.
