ສິ່ງທີ່່ກ່ຽວຂ້ອງກັບປາກປ່າສັກ ໃນສະໄໝບູຮານ ຄົນລາວເຮົາ ມັກຈະທ່ອງ ຄຳກອນ ທີ່ກ່ຽວຂ້ອງກັບສະຖານທີ່ສັກສິດ ເຊິ່ງເປັນບ່ອນທີ່ຄົນລາວໃນອະດິດມັກຈະໄປບູຊາ ເປັນປະຈຳ ເພາະເປັນບ່ອນທີ່ມີເທວະດາຮັກສາເມືອງວຽງຈັນທນ໌ ໂດຍຈະເລົ່າເປັນກອນວ່າ : ” ສ້າງສອງ , ໜອງສາມ , ລາມສີ່ , ສີ່ຫ້າ ” ເຊິ່ງແຕ່ລະຢ່າງນັ້ນກໍ່ເປັນບ່ອນ ເປັນສະຖານທີສັກສິດແຕ່ອະດິດມາຮອດປັດຈຸບັນນີ້ ແຕ່ວ່າ ຄົນໃນທຸກມື້ນີ້ແມ່ນມີຜູ້ຮູ້ນ້ອຍແລ້ວ ເຊັ່ນ :

– ສ້າງສອງ = ປະກອບດ້ວຍ ສ້າງທ້າວ ແລະສ້າງນາງ ( ບໍ່ບອກເທື່ອວ່າຢູ່ໃສ )

– ໜອງສາມ = ປະກອບດ້ວຍ ໜອງດ້ວງ , ໜອງຈັນ , ບຶງທາຕຸຫລວງ (ບໍ່ແນ່ໃຈ ຕ້ອງຊອກຄົ້ນອີກຕື່ມກ່ອນ).

– ລາມສີ່ = ຂໍອະນຸຍາດບອກແຕ່ໜຶ່ງບ່ອນ ຄືຊື່ວ່າ ອິນທະຈັກ (ປາກປ່າສັກ) ນັ້ນເອງ.

– ສີ່ຫ້າ ( ສີ່ຫ້າຂອງເມືອງ ) = ຂໍບອກແຕ່ສອງບ່ອນຄື : ລິດທິໂທນາກ ( ທະນາໃຕ້) ແລະ ຄັນທັບພະ ( ທະນາເໜືອ )

ດັ່ງນັ້ນ ປາກປ່າສັກ ຈຶ່ງເປັນດິນແດນທີ່ສັກສິດ ມາແຕ່ໃນອະດິດ ເມື່ອວັດປາກປ່າສັກຫລວງຖືກທຳລາຍຈາກສົງຄາມ ຈົນເຮັດໃຫ້ເມືອງວຽງຈັນເປັນເມືອງຮ້າງ ເມື່ອຝຣັ່ງເສດເຂົ້າມາເລືອກເອົາເມືອງວຽງຈັນເປັນເມືອງຫລວງຂຶ້ນໃຫມ່ ( ຝຣັ່ງຄິດຈະເລືອກເອົາວຽງຈັນ ແລະສະຫວັນນະເຂດ ເປັນເມືອງຫລວງ ໃນຍຸກເຂົ້າມາປົກຄອງລາວໃຫມ່ໆ ) ແຕ່ໃນທີ່ສຸດກໍ່ເລືອກເອົາວຽງຈັນ ເປັນເມືອງຫລວງ ເພາະມີວັດຖຸດິບທີ່ເປັນດິນຈີ່ທີ່ຍັງຫລົງເຫລືອຈາຊາກເມືອງຫລາຍ ເພື່ອການສ້າງແປງບ້ານເຮືອນ ແລະວຽງຈັນກໍ່ເປັນຈຸດຍຸດທະສາດສູນກາງໃນການຕິດຕໍ່ພົວພັນກັບເມືອງ ແລະປະເທດອ້ອມຂ້າງດີກວ່າສະຫວັນນະເຂດ ເມື່ອຝຣັ່ງເລືອກເອົາວຽງຈັນເປັນເມືອງຫລວງແລ້ວ ກໍ່ນຳຜູ້ຄົນເຂົ້າມາຢູ່ ໂດຍມີຄົນຕ່າງຊາດ 3 ເຊື້ອຊາດຫລັກ ຄື : ຝຣັ່ງ , ອັນນາມ (ຫວຽດນາມ ) ແລະຈີນ ສ່ວນຄົນຈີນຈະມາຕັ້ງບ້ານເຮືອນຕິດແຄມຂອງ ຕັ້ງແຕ່ເຂດວັດຈັນຮອດວັດຊຽງຍືນ ເມື່ອຄົນຈີນມີການຄ້າຂາຍໃນເຂດນັ້ນ ຈົນຮັ່ງມີແລ້ວ ກໍ່ມາສ້າງ ຫໍຍາພໍ່ປາກປ່າສັກໃສ່ ໂດຍເຮັດຫໍແບບຈີນ ເຊິ່ງມູນເຫດໃຫ້ຄົນເຊື້ອສາຍຈີນນັບຖືຫລາຍກໍ່ເພາະວ່າ ມີເດັກນ້ອຍຢູ່ເຂດນັ້ນຫາຍຕົວໄປຫລາຍມື້ ຊອກແນວໃດກໍ່ບໍ່ເຫັນ ຈົນມີຜູ້ຄົນໄປບະໄປຂໍໃຫ້ຍາພໍ່ປາກປ່າສັກຊ່ອຍ ຈາກນັ້ນກໍ່ພົບເຫັນເດັກນ້ອຍນັ້ນ ແລະເດັກນ້ອຍຄົນນັ້ນກໍ່ບອກວ່າ ຢືນຕົວແຂງຢູ່ຂ້າງຕົ້ນໄມ້ແຖວນັ້ນ ເຫັນຄົນຍ່າງຊອກກາຍໄປ-ກາຍມາ ກໍ່ບໍ່ເຫັນຕົນ ນີ້ແມ່ນການເລົ່າຂອງມານດາຂອງແມ່ເຖົ້າວາລີນ ຄຳວົງສາ ເລົ່າໃຫ້ຟັງວ່າ ( ແມ່ເຖົ້າວາລີນ ຄຳວົງສາ ເກີດ 23/09/1921 ມໍຣະນະກັມ 30/04/2018 ລວມອາຍຸໄດ້ 93 ປີ ) ຄົນແຖວອິນແປງ ສີຫ້ອມ ວັດຈັນ ຈະນັບຖື ຍາພໍ່ປາກປ່າສັກ ຖ້າຈະໄປຄ້າຂາຍ ກໍ່ຈະໄປຄອບໄປລາ ກໍ່ຈະທຳມາຄ້າຂຶ້ນ ແລະເດີນທາງປອດໄພ.

ດັ່ງນັ້ນເຂດນີ້ປາກປ່າສັກ ຈຶ່ງເປັນເຂດດິນທີ່ມີຄວາມສຳຄັນ ເປັນສະຖານທີສັກສິດ ຂອງເມືອງວຽງຈັນອີກສະຖານທີ່ຫນຶ່ງ.

ສ່ວນຮູບສີແມ່ນ ພໍ່ລຸງຂາວ ( ຫຸມແພງ ມະນີສຸກ ) ເຂົ້າໄປຢ້ຽມຊົມ ໂຮງຮຽນການຊ່າງ ( ວິທະຍາໄລເຕັກນິກ ປາກປ່າສັກ ) ທີ່ເພິ່ນເຄີຍມາສຶກສາຮ່ຳຮຽນ ເມື່ອປີ ຄສ 1960-1963 ມາເບິ່ງເພື່ອຫວນຄືນອະດິດທີ່ເຄີຍມາດຳລົງຊືວິດ ສືກສາຮ່ຳຮຽນ ໃນສະຖານບັນແຫ່ງນີ້

ໃນສະໄຫມນັ້ນ ປີ 1960-1963 ແມ່ນທ່ານ ເອເວຣາ ຄົນຝຣັ່ງ ເປັນຜູ້ອຳນວຍການ ແລະຕໍ່ມາ ກໍ່ແມ່ນທ່ານ ວິຣະວົງ ສຸວັນນະວົງ ເປັນຜູ້ອຳນວຍການ ໂດຍເປີດວິຊາຮຽນຄື :

– ຊ່າງກົນຈັກ automatic

– ຊ່າງຊ່ຽນແລະຈອດ.

– ຊ່າງກໍ່ສ້າງ.

– ຊ່າງໄມ້.

– ຊ່າງຕີເຫລັກ.

– ຊ່າງໄຟຟ້າ.

– ຊ່າງອອກແບບແລະແຕ້ມແບບ.

– ພິມດິດ.

– ວິຊາສອນພາສາອັງກິດ ພາສາຝຣັ່ງເສດ ແລະວິຊາເລກ ເປັນຕົ້ນ ສ່ວນພໍ່ລຸງຫລັງຈາກເຂົ້າຮຽນລວມຕາມຫລັງສູດແລ້ວ ແມ່ນມາເລືອກຮຽນ ສາຍ : – ຊ່າງກົນຈັກ Automatic ແລະ ໄຟຟ້າ ອາຈານທີ່ສອນ ທີ່ພໍ່ລຸງເພິ່ນຈື່ໄດ້ ເກືອບທັງຫມົດທີ່ສອນແມ່ນເປັນຄົນຝຣັ່ງ ແລະຈື່ໄດ້ມີ 2 ຄົນ ຄື: ອາຈານ ປີໂຣ ( ຄົນນີ້ເອົາເມຍເປັນຄົນລາວ ) ແລະອາຈານ ຊັງຕອກຊີ.

ເມື່ອວັນທີ 24/07/2020 ຕຶກອາຄານເກົ່າຂອງໂຮງຮຽນເຕັກນິກປາກປ່າສັກຫລັງນີ້ ທີ່ສ້າງມາແຕ່ປີ ຄສ 1937 ກໍ່ຖືກມ້າງອອກແລ້ວ