ປະຫວັດຄວາມເປັນມາຂອງພຣະປາງຫ້າມມານທີ່ຫລາຍຄົນຍັງບໍ່ຮູ້ຈັກ
ຮູບພາບ : Houmphet Manisouk
ມາຮູ້ຈັກກັບປະຫວັດຂອງ ພຣະປາງຫ້າມມານວັດສຸວັນນະຄີລີນະຄອນຫລວງພຣະບາງ
ຄິດວ່າບັນດາທ່ານທັງຫລາຍທີ່ເຫັນພຣະອົງນີ້ແລ້ວຄົງຄິດວ່າເປັນຄືພຣະພຸດທະເຈົ້າທົ່ວໄປ, ຜູ້ທີ່ມັກຮັກທາງດ້ານສິລະປະ ວັດທະນະທຳ ແລະວັດວາສາສະໜາ ທັງຫລາຍ ຮູ້ບໍ່ວ່າພຣະພຸດທະຮູບອົງນີ້ ແມ່ນປາງຫຍັງ ? ຢູ່ວັດໃດ ? ໃນຫລວງພຣະບາງ, ຫລາຍຄົນກໍ່ໃຫ້ຄວາມເຫັນ ບາງຄົນກໍ່ຮູ້ ບາງຄົນກໍ່ບໍ່ຮູ້ຈັກ ວ່າແມ່ນເປັນພຣະພຸດທະຮູບປາງຫຍັງ ແລະຢູ່ວັດໃດ ເພື່ອຢາກໃຫ້ຜູ້ຄົນໄດ້ຮູ້ຈັກ ແລະ ໄດ້ສຶກສາຄົ້ນຄວ້ານຳກັນ
ຕາມທີ່ຮູ້ມາແມ່ນພຣະພຸດທະຮູບປາງນີ້ ແມ່ນປາງຫ້າມມານ ຢູ່ໃນອະຣິຍະບົດປະທັບນັ່ງ ຂັດສະມາທິຮາບ ພຣະຫັດຊ້າຍວາງຫງາຍ ຢູ່ເທິງພຣະເພົາ (ຕັກ) ພຣະຫັດຂວາຍົກຂຶ້ນປ້ອງສະເໝີພຣະອຸຣະ (ເອີກ) ສະແດງອາກາດຫ້າມ, ສ່ວນວ່າຂໍ້ມູນນີ້ຈະຖືກຕ້ອງຫລືບໍ່ນັ້ນ ກໍ່ຕ້ອງຂໍຄວາມກະຣຸນາຜູ້ເປັນປາດ ຜູ້ມີຄວາມຮູ້ທາງດ້ານນີ້ຊ່ອຍແນະນຳກັນເພີ່ມຕື່ມເດີ
ເຊິ່ງເປັນມີທີ່ມາຫລັງຈາກທີ່ພຣະສັມມາສັມພຸດທະເຈົ້າຊົງພິຈາຣະນາແລ້ວ ພຣະອົງຈຶ່ງສະເດັດໄປປະທັບຢູ່ກ້ອງຕົ້ນໄຊ ຈາກນັ້ນ ທິດາພຣະຍາມານ ສາມເອື້ອຍນ້ອງ ຄື : ນາງຣາຄະ ນາງຕັນຫາ ແລະນາງອະຣະດີ ໄດ້ຂານອາສາຈາກຜູ້ເປັນບິດາ ເພື່ອໄປທຳຮ້າຍຕະບະເດຊະຂອງພຣະສັມມາສັມພຸດທະເຈົ້າ ດ້ວຍການເມຣະມິດຮ່າງກາຍເປັນສາວທີ່ງົດງາມໃນໄວຕ່າງໆ ຕະຫລອດຈົນສະແດງການຟ້ອນລຳແລະຂັບຮ້ອງ ແຕ່ພຣະສັມມາສັມພຸດທະເຈົ້າບໍ່ຊົງເອົາພຣະໄທໃສ່ເລີຍ ແລະຊົງຂັບໄລ່ທິດາພຣະຍາມານໃຫ້ຫລີກໜີໄປ
ແລະອີກຕອນຫນຶ່ງກໍ່ແມ່ນໃນພັນສາສຸດທ້າຍ ຂອງພຣະຊົນມາຍຸ ພຣະຍາມານໄດ້ອະຣາດທະນາ ໃຫ້ພຣະສັມມາສັມພຸດທະເຈົ້າຊົງປະຣິນິພານ ພຣະສັມມາສັມພຸດທະເຈົ້າເຮັດປາງຫ້າມມານ ແລະໄດ້ບອກພຣະຍາມານວ່າ ພຣະຍາມານ ທ່ານຢ່າໄດ້ເກງໃຈເຮົ້າອີກເລີຍ ຄວາມປະຣິນິພານຈະມີຂຶ້ນໃນອີກບໍ່ຊ້ານີ້ ນັບແຕ່ນີ້ໄປອີກສາມເດືອນ ເຮົາຈະດັບຂັນປະຣິນິພານ ແລ້ວ ເມື່ອພຣະສັມມາສັມພຸດທະເຈົ້າຫ້າມມານແລ້ວ ພຣະຍາມານຈຶ່ງຕັດໃຫ້ຮັກສາວາຈາ ຈາກນັ້ນກໍ່ຫາຍຕົວໄປ.
ນີ້ຄືປະຫວັດຫຍໍ້ໆ ຂອງພຣະປາງຫ້າມມານ ເຊິ່ງພຣະພຸດທະຮູບອົງນີ້ແມ່ນປະດິດສະຖານຢູ່ວັດສຸວັນນະຄີລີ ( ຄີລີ ) ນະຄອນຫລວງພຣະບາງ .
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: ນະຄອນຫລວງພຣະບາງ
