ທ່ານ ຊູ້ຢູທໍ່ ຫວັງມາຢ່າງ ຮອງຫົວໜ້າຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ເມືອງລ້ອງຊານ ລາຍງານວ່າ:

ບ້ານຫ້ວຍສຽດໄດ້ຮັບການສ້າງຕັ້ງຂຶ້ນໃນປີ 1997 ຫ່າງຈາກເທສະບານເມືອງປະມານ 37 ກິໂລແມັດ, ມີ 98 ຫລັງຄາເຮືອນ, ມີພົນລະເມືອງທັງໝົດ 671 ຄົນ ຍິງ 320 ຄົນ, ປະຊາຊົນສ່ວນຫລາຍແມ່ນຢຶດຖືອາຊີບເຮັດໄຮ່, ປູກຢາງພາລາເປັນຕົ້ນຕໍ ແລະ ລ້ຽງສັດເປັນອາຊີບສໍາຮອງ ສະເລ່ຍລາຍຮັບຈາກການຂາຍສັດລ້ຽງ, ຂາຍເຂົ້າ, ຂາຍນໍ້າຢາງພາລາ ແລະ ຂາຍພືດຜັກຕ່າງໆ ສາມາດສ້າງລາຍຮັບເຂົ້າພາຍໃນບ້ານເກືອບ 5 ຕື້ກີບຕໍ່ປີ, ສະເລ່ຍໃສ່ຫົວຄົນໄດ້ປະມານ 7 ລ້ານກວ່າກີບຕໍ່ຄົນຕໍ່ປີ ເຮັດໃຫ້ປະຊາຊົນສາມາດກຸ້ມຢູ່ກຸ້ມກິນ ແລະ ມີຊີວິດການເປັນຢູ່ທີ່ດີຂຶ້ນ ເທື່ອລະກ້າວ.

ຜ່ານຈາກການລົງປະເມີນຕົວຈິງຕາມ 3 ມາດຕະຖານ ຂອງການສ້າງຄອບຄົວວັດທະນະທໍາ ແລະ 4 ມາດຕະຖານ, 26 ຕົວຊີ້ວັດ ຂອງການສ້າງບ້ານວັດທະນະທໍາ ຕິດພັນກັບຫລາຍຂະແໜງການ ເປັນຕົ້ນແມ່ນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ຊາວໜຸ່ມ 4 ບຸກ, ແມ່ຍິງ 3 ດີ, ບ້ານແບບຢ່າງດ້ານສາທາລະນະສຸກ, ບ້ານປະຕິບັດກົດໝາຍ, ບ້ານສາມັກຄີປອງດອງ ແລະ ອື່ນໆ ສາມາດປະເມີນຄອບຄົວວັດທະນະທໍາໄດ້ 98% ໃນຈໍານວນ 109 ຄອບຄົວ ແລະ ປະເມີນບ້ານວັດທະນະທໍາໄດ້ 89% ຊຶ່ງຖືກຕ້ອງຕາມມາດຖານເງື່ອນໄຂ ທີ່ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກຳນົດໄວ້. ສະນັ້ນ ການນໍາແຂວງຈຶ່ງໄດ້ອອກຂໍ້ຕົກລົງ ຮັບຮອງເອົາບ້ານຫ້ວຍສຽດ ເປັນບ້ານວັດທະນະທໍາແຫ່ງໃໝ່ ໃຫ້ເມືອງລ້ອງຊານ.

ໂອກາດນີ້, ທ່ານ ນາງເພັດສະໄໝ ໂພໄຊຍະວົງ ໄດ້ຍົກໃຫ້ເຫັນເຖິງຄວາມໝາຍສໍາຄັນ ຂອງການສ້າງບ້ານວັດທະນະທໍາ ໂດຍຕິດພັນກັບການພັດທະນາເສດຖະກິດ-ສັງຄົມຂອງບ້ານ ຄຽງຄູ່ກັບຫລາຍຂະແໜງການ, ຫລາຍມາດຖານເງື່ອນໄຂ ສະນັ້ນ ພິທີໃນຄັ້ງນີ້ ໄດ້ສະແດງໃຫ້ເຫັນເຖິງຄວາມສາມັກຄີ ທີ່ທຸກພາກສ່ວນໄດ້ພ້ອມກັນເອົາໃຈໃສ່ບຸກບືນ ແລະ ຜ່ານຜ່າອຸປະສັກຕ່າງໆ ຈົນສາມາດປະກາດຮັບຮອງເປັນບ້ານວັດທະນະທໍາ.

ພ້ອມທັງຮຽກຮ້ອງໃຫ້ອໍານາດການປົກຄອງບ້ານ ຕ້ອງເອົາໃຈໃສ່ເຊື່ອມຊຶມບັນດາເອກະສານສໍາຄັນຂອງພັກ-ລັດ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ເອົາໃຈ ໃສ່ປັບປຸງການຈັດຕັ້ງບ້ານໃຫ້ມີຄວາມເຂັ້ມແຂງ, ສືບຕໍ່ປົກປັກຮັກສານາມມະຍົດບ້ານວັດທະນະທໍາ ໃຫ້ຢູ່ຄຽງຄູ່ກັບບ້ານຫ້ວຍສຽດຕະຫລອດໄປ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ ເບີ່ງ​ເມືອງ​ລາວ

ຂອບ​ໃຈແຫຼ່ງຂໍ້ມູນຈາກ: ຂ​ປ​ລ.