ເມືອງຄອບ ແຂວງໄຊຍະບູລີ ເປີດງານບຸນນະມັດສະການພຣະທາດປວກ ຄັ້ງທີ 10 ປະຈໍາປີ 2023.

ໃນຕອນເຊົ້າຂອງວັນທີ 20 ມີນາ 2023 ນີ້ ບຸນນະມັດສະການພຣະທາດປວກ ປະຈໍາປີ 2023 ຂອງເມືອງຄອບ ແຂວງໄຊຍະບູລີ ໄດ້ຈັດຂື້ນຢ່າງເປັນທາງການ.

ພາຍຫຼັງມີການຄົບງັນມາເປັນເວລາຫຼາຍວັນ ຢູ່ທີ່ເດີນໃຫຍ່ຜາມໄຊພຣະທາດປວກ ເມືອງຄອບ ແຂວງໄຊຍະບູລີ ໂດຍໃຫ້ກຽດເຂົ້າຮ່ວມຂອງທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແລະ ປະທານຄະນະສະມາຊິກສະພາປະຊາຊົນແຂວງໄຊຍະບູລີ, ມີທ່ານ ແພງຊ້ອຍ ແພງເມືອງ ກໍາມະການພັກແຂວງ ເລຂາພັກເມືອງ ເຈົ້າເມືອງໆຄອບ, ມີບັນດາການນໍາຂອງແຂວງ, ຂອງເມືອງ, ແຂກທີ່ຖືກເຊີນ ທັງພາຍໃນ ແລະ ຕ່າງປະເທດ ພ້ອມດ້ວຍປະຊາຊົນບັນດາເຜົ່າພາຍໃນເມືອງເຂົ້າຮ່ວມຢ່າງຄຶກຄື້ນ.

ໃນພິທີ ໄດ້ມີການແຫ່ກ້ອນກໍາລັງແຕ່ລະບ້ານພາຍໃນເມືອງຈໍານວນ 10 ຂະບວນ, ກ້ອນກໍາລັງຊາວໜຸ່ມ-ເຍົາວະຊົນ 1 ຂະບວນ ແລະ ຊົມການສະແດງສິລະປະວັນນະຄະດີ 3 ລາຍການ. ຈາກນັ້ນ ທ່ານ ສະໝັກ ລິດສະຖານ ກໍາມະການປະຈໍາພັກເມືອງ ຮອງເຈົ້າເມືອງໆຄອບ ປະທານຈັດງານບຸນນະມັດສະການພຣະທາດປວກ ກໍໄດ້ຂື້ນລາຍງານການກະກຽມຈັດງານບຸນນະມັດສະການພຣະທາດປວກ ປະຈໍາປີ 2023 ໂດຍກ່າວວ່າ:

ຄະນະຮັບຜິດຊອບແມ່ນໄດ້ແບ່ງຄວາມຮັບຜິດຊອບກະກຽມຄວາມພ້ອມດ້ານຕ່າງໆ ເປັນຕົ້ນໄດ້ສຸມໃສ່ຂະບວນການຮອບດ້ານເຊັ່ນ: ຂະບວນການປ້ອງກັນຄວາມສະຫງົບ, ນໍາພາຂະບວນການອະນາໄມປະດັບປະດາຕົບແຕ່ງ, ແສງ, ສີ, ແສງ, ຂະບວນສິລະປະວັນນະຄະດີ, ຂະບວນກ້ອນກໍາລັງແຕ່ລະບ້ານ ແລະ ອື່ນໆ ພ້ອມທັງກ່າວຕື່ມວ່າ ການຈັດງານບຸນນະມັດສະການພຣະທາດປວກໃນປີນີ້ໄດ້ກໍານົດກິດຈະກໍາຕ່າງໆຄື:

ພິທີກໍາທາງສາສະໜາ, ຂະບວນແຫ່ກ້ອນກໍາລັງ ແລະ ປະດັບປະດາແສງສີຕ່າງໆ, ການສະແດງສິລະປະວັນນະຄະດີ ແລະ ປະກວດນາງສາວງາມ, ການປະກວດອາຫານພື້ນບ້ານ ແລະ ການວາງສະແດງສິນຄ້າ ຕະຫລາດນັດ

ໃນໂອກາດນີ້ ທ່ານ ແພງຊ້ອຍ ແພງເມືອງ ເຈົ້າເມືອງໆຄອບ ກໍໃຫ້ກຽດຂື້ນກ່າວເປີດງານບຸນນະມັດສະການພຣະທາດປວກ ປະຈໍາປີ 2023 ຢ່າງເປັນທາງການ ພ້ອມທັງເຊີນຄະນະປະທານຮ່ວມລັ່ນຄ້ອງ 9 ບາດ, ຕັດແຖບຜ້າເປີດງານບຸນນະມັດສະການພຣະທາດປວກ. ພ້ອມດຽວກັນກໍໄດ້ມີການມອບຂອງທີ່ລະນຶກ, ມອບໃບສົມມະນາບຸນຄຸນ, ຂື້ນບູຊາພຣະທາດປວກ, ທ່ຽວຊົມຕະຫລາດນັດ ແລະ ຊິມອາຫານພື້ນບ້ານຢູ່ຂ້າງຜາມໄຊນໍາອີກ.

ຈຸດປະສົງຂອງການຈັດງານບຸນດັ່ງກ່າວກໍເພື່ອ ເປັນການປົກປັກຮັກສາ ແລະ ເສີມຂະຫຍາຍວັດທະນະທໍາ-ຮີດຄອງປະເພນີ ຂອງເມືອງຄອບ ເປັນຕົ້ນແມ່ນຄວາມຫລາກຫລາຍສີສັນທາງດ້ານວັດທະນະທໍາ-ປະເພນີ, ວິທີການດໍາລົງຊີວິດ, ມູນເຊື້ອຄວາມດຸໝັ່ນຂະຫຍັນພຽນ, ການນຸ່ງຖື, ຂະນົບທໍານຽມ, ຄວາມອຸດົມສົມບູນທາງດ້ານຊັບພະຍາກອນທໍາມະຊາດ, ຊັບໃນດິນສິນໃນນໍ້າ, ເພື່ອຮັດແໜ້ນຄວາມສາມັກຄີປອງດອງໃນຖັນແຖວສະມາຊິກພັກ, ພະນັກງານ, ທະຫານ, ຕໍາຫລວດ ແລະ ພໍ່ແມ່ປະຊາຊົນບັນດາເຜົ່າຂອງຊາວເມືອງຄອບ ແຂວງໄຊຍະບູລີ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: News.XBL