ບັນຫາ ແລະ ປັນຫາ ມີຄວາມໝາຍຄືກັນຕ່າງກັນແນວໃດ?
DooDiDo
ອະທິບາຍພາສາລາວກັບຄຳວ່າ ບັນຫາ ແລະ ປັນຫາ.
ຖ້າຫາກຈະເວົ້າເຖິງສິ່ງທີ່ຕ້ອງໄດ້ແກ້ໄຂຕ່າງໆ ແລະ ໃນໂລກນີ້ຍັງມີຫລາຍໆຢ່າງທີ່ຕ້ອງໄດ້ແກ້ໄຂ, ບໍ່ວ່າຈະເປັນບັນຫາເລື່ອງລາວຂອງບ້ານເມືອງ, ເລື່ອງຂອງພະຍາດລະບາດໂຄວິດ19 ຫລື ພະຍາດໄຂ້ເລືອດອອກ, ບັນຫາຂອງພາສາຄຳເວົ້າຕ່າງໆ, ເຊິ່ງໃນນັ້ນຄຳທີ່ເຮົາຈະເອົາມາອະທິບາຍກັນກໍກ່ຽວຂ້ອງກັບເລື່ອງລາວຕ່າງໆທີ່ໄດ້ເວົ້າມານີ້.
ໃນພາສາລາວຄຳວ່າ ບັນຫາ ແລະ ປັນຫາ ອາດຈະສະກົດຄຳແຕກຕ່າງກັນເລັກນ້ອຍລະຫວ່າງ ອັກສອນຕົວ ບ ແລ ອັກສອນຕົວ ປ, ແຕ່ວ່າເຖິງຈະສະກົດຄຳດັ່ງກ່າວຕ່າງກັນກໍ່ຕາມ, ຖ້າຈະເວົ້າເຖິງເນື້ອໃນຄວາມໝາຍຂອງທັງສອງຄຳແມ່ນຄ້າຍຄືກັນ ຫລື ເວົ້າໄດ້ວ່າເປັນຄວາມໝາຍອັນດຽວກັນເລີຍກໍວ່າໄດ້, ເພາະທຸກສິ່ງທຸກຢ່າງທີ່ຕ້ອງການການປືກສາຫາລືຫາທາງອອກ ຕ້ອງການການແກ້ໄຂໃນເລື່ອງນັ້ນໆບໍ່ວ່າຈະເປັນເລື່ອງໃຫຍ່ ຫລື ນ້ອຍ ລ້ວນແລ້ວແຕ່ສາມາເວົ້າໄດ້ວ່າເປັນ ບັນຫາ ຫລື ປັນຫາ.
ຄຳວ່າ ບັນຫາ.
ໝາຍເຖິງເລື່ອງທີ່ຕ້ອງການປືກສາຫາລືເພື່ອຫາທາງອອກ, ເລື່ອງທີ່ຕ້ອງໄດ້ແກ້ໄຂ, ເປັນເລື່ອງທີ່ຕ້ອງປຶກສາຫາສາຍເຫດທີ່ຕ້ອງໄດ້ອະທິບາຍສິ່ງທີ່ບໍ່ຈະແຈ້ງ ຄັກແນ່, ຫົວຂໍ້ທີ່ປຶກສາຫາລືຕົກລົງກັນໃນກອງປະຊຸມ.
ຕົວຢ່າງ:
ໃນກອງປະຊຸມມື້ນີ້, ເຮົາຈະມາເວົ້າເຖິງບັນຫາກ່ຽວກັບມົນລະຜິດສິ່ງແວດລ້ອມ.
ບັນຫາຂອງແຮງງານຢູ່ບ້ານເຮົາກຳລັງພົບຢູ່ນີ້ກໍ່ຄົງຈະແມ່ນບັນຫາປາກທ້ອງເປັນບັນຫາໃຫຍ່.
ຄຳວ່າ ປັນຫາ.
ແມ່ນມີຄວາມໝາຍດຽວກັນກັບຄຳວ່າບັນຫາຄືເລື່ອງທີ່ຕ້ອງການປືກສາຫາລືເພື່ອຫາທາງອອກ, ເລື່ອງທີ່ຕ້ອງໄດ້ແກ້ໄຂ, ແລະ ອື່ນໆ, ແຕ່ ປັນຫາ ສະກົດຄຳຕາມເຄົ້າຂອງຄຳໃນພາສາບາລີສັນສະກິດ ສ່ວນບັນຫາແມ່ນມີການນຳໃຊ້ຢ່າງກ້ວາງຂວາງຫລາຍກວ່າ ປັນຫາ.
ຕົວຢ່າງ:
ຢ່າຄິດຫລາຍ, ທຸກປັນຫາມີທາງອອກ.
ໂອຍເນາະ! ຈັງແມ່ນໄປຊອກປັນຫາມາໃຫ້ປວດຫົວ.
ສະຫລຸບ.
– ຄຳວ່າ ບັນຫາ ໝາຍເຖິງເລື່ອງທີ່ຕ້ອງການປືກສາຫາລືເພື່ອຫາທາງອອກ, ເລື່ອງທີ່ຕ້ອງໄດ້ແກ້ໄຂ, ເປັນເລື່ອງທີ່ຕ້ອງປຶກສາຫາສາຍເຫດທີ່ຕ້ອງໄດ້ອະທິບາຍສິ່ງທີ່ບໍ່ຈະແຈ້ງ ຄັກແນ່, ຫົວຂໍ້ທີ່ປຶກສາຫາລືຕົກລົງກັນໃນກອງປະຊຸມ.
– ຄຳວ່າ ປັນຫາ ແມ່ນມີຄວາມໝາຍດຽວກັນກັບຄຳວ່າບັນຫາ, ແຕ່ ປັນຫາ ສະກົດຄຳຕາມເຄົ້າຂອງຄຳໃນພາສາບາລີສັນສະກິດ ສ່ວນ ບັນຫາ ແມ່ນມີການນຳໃຊ້ຢ່າງກ້ວາງຂວາງຫລາຍກວ່າ ປັນຫາ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
