ພິທີເປີດງານວາງສະແດງດັ່ງກ່າວໂດຍມີ ນາຍົກ ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວໃຫ້ກຽດເຂົ້າຮ່ວມໃນງານເປີດຄັ້ງນີ້.
ທ່ານນາງ ຈັນທະຈອນ ວົງໄຊ ຮອງປະທານ ສຄອຊ ກ່າວວ່າ: ງານຜະລິດຕະພັນລາວ 2020 ຫຼືວ່າ Made In Laos 2020 ໃນປີນີ້ ແມ່ນເປັນປີລິເລີ່ມທີ່ໄດ້ມີເຈົ້າພາບຮ່ວມກໍຄື ສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ໄດ້ມີການຕົບແຕ່ງພິເສດທີ່ເປັນເອກະລັກເພື່ອສະແດງຜົນງານການຂະຫຍາຍຕົວທາງດ້ານເສດຖະກິດ-ສັງຄົມຂອງນະຄອນຫຼວງວຽງຈັນ ເພື່ອເປັນການໂຄສະນາສົ່ງເສີມຜະລິດຕະພັນລາວ ແລະ ກະຕຸ້ນຊຸກຍູ້ຜູ້ປະກອບການ ແລະ ພ້ອມດຽວກັນນັ້ນກໍເພື່ອໂຄສະນາ ສົ່ງເສີມ ລາວທ່ຽວລາວ ເພື່ອຊ່ວຍຟື້ນຟູເສດຖະກິດທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19.
ງານວາງສະແດງຄັ້ງນີ້ ມີ 121 ບໍລິສັດ 220 ຫ້ອງວາງສະແດງ ລວມມູນຄ່າຜະລິດຕະພັນທັງໝົດທີ່ເຂົ້າຮ່ວມມາວາງສະແດງຫລາຍກ່ວາ 13ຕືື້ກີບ.
ຄຽງຄູ່ກັບການຈັດງານວາງສະແດງໃນຄັ້ງນີ້, ຍັງມີການສະແດງສິລະປະ, ກິດຈະກຳ ແຈກແຖມຂອງຂວັນຕ່າງໆ ແລະ ຍັງມິກິດຈະກຳສຳມະນາໃນຫົວຂໍ້ຕ່າງໆເພື່ອມາໃຫ້ຄວາມຮູ້ ແລະແລກປ່ຽນຄໍາຄິດຄໍາເຫັນຮ່ວມກັນ ເຊັ່ນ:
ການນໍາສະເໜີແຜນຍຸດທະສາດ ຂອງ ສຄອຊ ການເຂົ້າຫາແຫຼ່ງທຶນ,ຕະຫຼາດ ແລະ E-Commerce, ການສຳມະນາ ສຳລັບຄົນລຸ້ນໃໝ່ທີ່ສົນໃຈເຮັດທຸລະກິດ, ການສຳມະນາກ່ຽວກັບທັກສະອາຊີບທີ່ຕ້ອງການຈາກຜູ້ໃຊ້ແຮງງານ, ກອງປະຊຸມສຳມະນາ ການປັບຕົວຈາກຜົນກະທົບໂຄວິດ-19ຂະແໜງກະສິກຳ, ເວທີສົນທະນາຄວາມຕ້ອງການຂອງຜູ້ຊົມໃຊ້ຕໍ່ຜະລິດຕະພັນລາວ, ການສົ່ງເສີມລາວ ທ່ຽວ ລາວ ແລະອື່ນໆ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: laoedaily.com.la