ຍທຂ ຄໍາມ່ວນ ຈັດກອງປະຊຸມປະເມີນກາງສະໄໝ ຄັ້ງທີ V ຂຶ້ນ
ປະເມີນ ຍທຂ ຄໍາມ່ວນ ໃນການປະຕິບັດມະຕິກອງປະຊຸມໃຫຍ່ ກາງສະໄໝ ຄັ້ງທີ V
ຍທຂ ຄໍາມ່ວນ ຈັດກອງປະຊຸມ ກາງສະໄໝ ຄັ້ງທີ V ຂອງຕົນຂຶ້ນ ເຊິ່ງໃນທ້າຍອາທິດຜ່ານມາ, ຄະນະພັກຮາກຖານ ພະແນກໂຍທາທິການ ແລະ ຂົນສົ່ງ (ຍທຂ) ແຂວງຄໍາມ່ວນ ໂດຍການເປັນປະທານຂອງ ສະຫາຍ ວົງເພັດ ຈິດປັນຍາ ຮອງເລຂາພັກແຂວງ, ຜູ້ຊີ້ນໍາວຽກງານອົງການຈັດຕັ້ງພັກ-ພະນັກງານ, ສະຫາຍ ຂວັນຕາ ດວງລາຕີ ເລຂາພັກຮາກຖານ, ຫົວໜ້າພະແນກ ຍທຂ ແຂວງ ພ້ອມດ້ວຍຄະນະພັກຮາກຖານ ແລະ ສະມາຊິກພັກໃນຂົງເຂດດັ່ງກ່າວເຂົ້າຮ່ວມ.
ສະຫາຍ ຂວັນຕາ ດວງລາຕີ ໄດ້ສະຫລຸບ ການຈັດຕັ້ງປະຕິບັດວຽກງານຮອບດ້ານ ກາງສະໄໝ ຄັ້ງທີ V ຂອງຮາກຖານພັກພະແນກ ຍທຂ ຄຳມ່ວນ ແຕ່ປີ 2020-2022 ໂດຍໄດ້ຕີລາຄາໃຫ້ເຫັນຜົນສໍາເລັດໃນແຕ່ລະດ້ານ ໂດຍສະເພາະ ການສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ, ການກໍ່ສ້າງການເມືອງ ໃຫ້ຕິດພັນກັບຂະບວນການຮັກຊາດ ແລະ ພັດທະນາ ດໍາເນີນໄປໃນຈັງຫວະ ແລະ ບາດກ້າວທີ່ໜັກແໜ້ນ ໄປພ້ອມກັບຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫລາຍປະການ.
ຮາກຖານພັກພະແນກ ຍທຂ ແຂວງ ປະກອບມີ 7 ໜ່ວຍພັກ, ມີສະມາຊິກພັກ 114 ສະຫາຍ ຍິງ 32 ສະຫາຍ, ສໍາຮອງ 7 ສະຫາຍ ຍິງ 4 ສະຫາຍ. ໄລຍະຜ່ານມາ, ຄະນະພັກໄດ້ເອົາໃຈໃສ່ນໍາພາ-ຊີ້ນໍາ ໂດຍຍົກສູງ ແລະ ຖືເອົາວຽກງານການເມືອງ-ແນວຄິດ ເປັນວຽກງານສໍາຄັນ ແລະ ເປັນວຽກທີ່ຕົ້ນຕໍບຸລິມະສິດອັນດັບໜຶ່ງ ທີ່ຕັດສິນເຖິງຜົນໄດ້-ຜົນເສຍ ແລະ ຜົນສໍາເລັດຂອງວຽກງານ, ດ້ານການນໍາພາ-ຊີ້ນຳວຽກງານວິຊາສະເພາະ ຂົງເຂດຂະແໜງຂົວ-ທາງ ໄດ້ເອົາໃຈໃສ່ຈັດຕັ້ງປະຕິບັດ ແຜນງົບປະມານ ການລົງທຶນຂອງລັດ
ໂດຍສະເພາະວຽກງານກໍ່ສ້າງ ແລະ ສ້ອມແປງຂົວ-ທາງ ຂອງບັນດາເສັ້ນທາງຫລວງແຫ່ງຊາດ, ທາງຫລວງທ້ອງຖິ່ນ ຕາມເງື່ອນໄຂງົບປະມານ ທີ່ລັດຖະບານອະນຸມັດ ຈໍານວນ 146 ໂຄງການ, ລວງຍາວ 4.218,03 ກິໂລແມັດ, ປະຕິບັດໄດ້ 63,4% ແລະ ໂຄງການທີ່ຈັດຕັ້ງປະຕິບັດສໍາເລັດ ມີຈໍານວນ 101 ໂຄງການ.
ສຳລັບຂົງເຂດຂະແໜງທາງນໍ້າ ເອົາໃຈໃສ່ຄຸ້ມຄອງຕິດຕາມ, ກວດກາໂຄງການກໍ່ສ້າງປ້ອງກັນຕະຝັ່ງເຈື່ອນ ຕາມລໍາແມ່ນໍ້າຂອງ ແລະ ແມ່ນໍ້າສາຂາ ສໍາເລັດ 4 ໂຄງການ.
ຄຽງຄູ່ກັນນັ້ນ, ການຈັດຕັ້ງປະຕິບັດ ກ່ຽວກັບວາລະແຫ່ງຊາດ ໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ, ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ການນໍາພາ-ຊີ້ນໍາ ວຽກງານໃນແຕ່ລະໜ່ວຍພັກ, ວຽກງານນໍາພາກໍ່ສ້າງພະນັກງານ, ການນໍາພາວຽກງານອົງການຈັດຕັ້ງມະຫາຊົນ ແລະ ວຽກງານນຳພາປັບປຸງກໍ່ສ້າງພັກ ໃນແຕ່ລະດ້ານ ແມ່ນໄດ້ເຄື່ອນໄຫວຈັດຕັ້ງປະຕິບັດ ມີຜົນສໍາເລັດເປັນກ້າວໆມາ.
ໂອກາດດຽວກັນ, ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາຄິດຄໍາເຫັນ ເຂົ້າໃສ່ຮ່າງບົດສະຫລຸບ, ທິດທາງແຜນການ ແລະ ບົດສໍາຫລວດນໍາພາລວມ ຂອງຄະນະພັກຮາກຖານ ເພື່ອຍົກສູງຄວາມເປັນເອກະພາບ ໃນການຮັບຮອງ ແລະ ພ້ອມກັນນໍາໄປຈັດຕັ້ງປະຕິບັດຜັນຂະຫຍາຍ ເຂົ້າໃນວຽກງານຕົວຈິງ ຂອງບັນດາຂະແໜງ ການຕົນໃຫ້ມີປະສິດທິຜົນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Lao insight
ຂອບໃຈແຫຼ່ງຂໍ້ມູນຈາກ: ຂປລ.