ສຳຫຼວດພື້ນທີ່ຂະບວນຄາລາວານຕາມຮ່ອງຮອຍບັ້ນຮົບນໍ້າບາກ ສ້າງເປັນ ອະນຸສາວະລີ ບັ້ນຮົບນໍ້າບາກ

ວັນທີ 24-25 ມິນາ 2022 ນີ້,  ໄດ້ມີ​ການລົງສຳຫຼວດພື້ນທີ່ດີນລັດຂອງເມືອງນ້ຳບາກ ແຂວງລວງພະບາງ ເພື່ອກະກຽມສ້າງເປັນສວນອຸທິຍານຊາວໜຸ່ມ ແລະອະນຸສາວະລີ ບັ້ນຮົບນໍ້າບາກ. ໂດຍໄດ້ຮັບການຕ້ອນຮັບຈາກສະຫາຍ ສົມຫວັງ ພອນຄຳວົງສາ ເລຂາພັກເມືອງ ເຈົ້າເມືອງເມືອງນໍ້າບາກ, ມີຮອງເຈົ້າເມືອງ ແລະ ເລຂາຄະນະບໍລິຫານງານຊາວໜຸ່ມເມືອງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ເພື່ອເປັນການຫວນຄືນມູນເຊື້ອອັນພິລະອາດຫານຂອງປະຊາຊົນຊາວລາວບັນດາເຜົ່າ ໂດຍສະເພາະ ຊາວເມືອງນໍ້າບາກ ,ໃນການຕໍ່ສູ້-ກູ້ຊາດ ຕ້ານກັບຈັກກະພັດ ແລະ ລູກມືຂາຍຊາດ. ສູນກາງຊາວໜຸ່ມປະຊາຊົນ ປະຕິວັດລາວ ໄດ້ສົມທົບກັບຄະນະຊາວໜຸ່ມປະຊາຊົນ ປະຕິວັດລາວແຂວງຫຼວງພະບາງ ເພື່ອກະກຽມຄວາມພ້ອມໃນດ້ານຕ່າງໆ. ໃນການຈັດຂະບວນການຄາລາວານຕາມຮ່ອງຮອຍປະຫວັດສາດ ບັ້ນຮົບນ້ຳບາກ ໃນທ້າຍປີ 2022 ນີ້.

ສະນັ້ນ, ຄະນະຊາວໜຸ່ມປະຊາຊົນ ປະຕິວັດລາວແຂວງ ຈຶ່ງໄດ້ສົມທົບກັບບໍລິສັດ ເຮີລີເທດ ສະຕູດີໂອ ອອກແບບ ລົງໄປສຳຫຼວດ ພື້ນທີ່ດີນລັດຂອງເມືອງນ້ຳບາກ ( ເຂດພູຈອມແຈ້ງ ) ເພື່ອຈະສ້າງເປັນສວນອຸທິຍານຂອງຊາວໜຸ່ມເມືອງນ້ຳບາກ ແລະອະນຸສາວະລີ ບັ້ນຮົບນ້ຳບາກ, ເຊິ່ງມີເນື້ອທີ່ທັງໝົດ 16.25 ເຮັກຕາ.

ຜ່ານການສຳຫຼວດຕົວຈີງ ເຫັນວ່າເນື້ອທີ່ດີນດັ່ງກ່າວ ແມ່ນມີຄວາມເໝາະສົມ ໃນການສ້າງສວນອຸທິຍານ ແລະອະນຸສາວະລີ, ແຕ່ກໍປາສາຈາກບໍ່ໄດ້ສີ່ງທີ່ກີດຂວາງ ແລະເປັນອຸປະສັກຈຳນວນໜຶ່ງໃນພື້ນທີ່ ເປັນຕົ້ນແມ່ນການຕັ້ງທີ່ຢູ່ອາໄສ, ປູກຕົ້ນໄມ້ກີນໝາກ. ພ້ອມກັນນີ້ ຍັງໄດ້ປຶກສາຫາລືກ່ຽວກັບສະຖານທີ່ປະຫວັດສາດ ເປັນຕົ້ນແມ່ນບັນດາຖໍ້າແຫ່ງການປະຕິວັດ ປະກອບມີ:

ຖ້ຳຫົງຄຳ, ຖ້ຳຜາບໍ, ຖ້ຳພະເຈົ້າ, ຖ້ຳຜາເປັດ, ຖ້ຳຜາຍອນ, ຖ້ຳຫ້ວຍອຸ່ນ, ຖ້ຳຜາເຖີບ, ສ່ວນບ້ານການປະຕິວັດ ແລະ ບ້ານວັດທະນະທຳ ປະກອບມີບ້ານນາຍາງໃຕ້, ບ້ານລີ່ ແລະ ຍັງມີສະຖານທີ່ທ່ອງທ່ຽວທຳມະຊາດອີກຈຳນວນໜຶ່ງ.

ໃນຕອນເຊົ້າຂອງວັນທີ 25 ມິນາ ຄະນະຊາວໜຸ່ມປະຊາຊົນ ປະຕິວັດລາວ ແຂວງ ລົງເຮັດວຽກກັບຄະນະບໍລິຫານງານຊາວໜຸ່ມເມືອງງອຍ ພ້ອມທັງໄປສຳຫຼວດຖ້ຳປະຫວັດສາດທ່ານຜູ້ນຳ, ສຳຫຼວດກ່ຽວກັບບ້ານພັກ, ລີສອດ ແລະ ຮ້ານອາຫານ ອີກດ້ວຍ. ໃນວັນດຽວກັນນີ້, ທາງຄະນະຊາວໜຸ່ມປະຊາຊົນ ປະຕິວັດລາວ ແຂວງ ຍັງໄດ້ລົງຕິດຕາມກວດກາ ແລະ ຊຸກຍູ້ຄອບຄົວຕົວແບບການລ້ຽງປາ ເປັນສິນຄ້າ, ເຊິ່ງແມ່ນຄອບຄົວຕົວແບບທີ່ດີເດັ່ນຂອງເມືອງນໍ້າບາກ, ສາມາດລ້ຽງປາສະໜອງເຂົ້າສູ່ຕະຫຼາດເມືອງນໍ້າບາກຢ່າງພຽງພໍ ແລະ ຍັງສົ່ງອອກຕ່າງແຂວງອີກດ້ວຍ.

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ DooDiDo

ຂອບ​ໃຈແຫລ່ງ​ທີ່​ມາ​: Media Laos