ຈັດງານໂຮມຊຸມນຸມມິດຕິງ ສະເຫຼີມສະຫຼອງວັນແມ່ຍິງສາກົນ
ວັນແມ່ຍິງສາກົນ 8 ມີນາ ແລະ ວັນສ້າງຕັ້ງຊາວໜຸ່ມປະຊາຊົນປະຕິວັດລາວ ຄົບຮອບ 68 ປີ
ໄດ້ມີການຈັດກິດຈະກຳສົ່ງເສີມ-ອະນຸລັກວັດທະນະທຳໃນວັນທີ 31 ມີນາ 2023 ນີ້ຢູ່ ທີ່ເດີ່ນໂຮງຮຽນປະຖົມແກ້ງກອກເໜືອເມືອງຈຳພອນ ແຂວງສະຫວັນນະເຂດ ເນື່ອງໃນໂອກາດພິທີສະເຫຼີມສະຫຼອງວັນແມ່ຍິງສາກົນ 8 ມີນາ ຄົບຮອບ 113 ປີ ແລະ ວັນ ສ້າງຕັ້ງຊາວໜຸ່ມປະຊາຊົນປະຕິວັດລາວຄົບຮອບ 68 ປີ ໃຫ້ກຽດ ເປັນປະທານຂອງ ທ່ານ ປອ ພູລຳພອນ ສີຫາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆຈຳພອນ
ໃຫ້ກຽດເຂົ້າຮ່ວມຂອງທ່ານ ໂພສີສ້ອຍ ກຸທິລາດ ກຳມະການພັກແຂວງ ຫົວໜ້າພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງມີບັນດາທ່ານອະດີດການນຳເມືອງ,ຫົວໜ້າ-ຮອງຫົວໜ້າຫ້ອງການອ້ອມຂ້າງ,ຄູ-ອາຈານແລະນ້ອງນັກຮຽນເຂົ້າຮ່ວມ 1,230 ຄົນ.
ກ່ອນເຂົ້າພິທີບັນດາທ່ານການນຳຂັ້ນແຂວງແລະຂັ້ນເມືອງໄດ້ຮັບຊົມລາຍການສີລະປະ-ວັນນະຄະດີຈາກນັກຮຽນ ມຕົ້ນ ຂອງເມືອງຈໍາພອນ , ຂະບວນຟ້ອນຈາກສະຫະພັນແມ່ຍິງກຸ່ມບ້ານ ແກ້ງກອກ ແລະ ຂະບວນ ເຕັ້ນບາສະຫຼົບ ຈາກນ້ອງນັກຮຽນ,ສະຫະພັນແມ່ຍິງບ້ານ ແລະ ພະນັກງານ ຂອງເມືອງ ຈຳພອນ,ໃນຕອນທ້າຍ ທາງຂະບວນຟ້ອນທັງໝົດ ກໍຍັງໄດ້ສາມະຄີກັນມາຟ້ອນທີ່ ວົງວຽນຂອງເມືອງຈຳພອນ ອີກດ້ວຍ
ຈາກນັ້ນທ່ານ ປອ ພູລຳພອນ ສີຫາວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆຈຳພອນກໍ່ໃຫ້ກຽດຂື້ນກ່າວຄຳປາໄສ ແລະ ເຫຼົ່າຄືນປະຫວັດຄວາມເປັນມາຂອງ ເອື້ອຍນ້ອງແມ່ຍິງ ໃນສະໄໝສັກດີນາແລະນາຍທຶນ ທີ່ຖືກກົດຂີ່ຮູດຮີດຢ່າງໜັກໜ່ວງ ເຮັດວຽກຫຼາຍຊົ່ວໂມງ ແຕ່ຄ່າແຮງງານລາຄາຖືກແລະຍັງຖືກດູຖູກ,ໜິ່ນປະມາດ,ເປັນເຄື່ອງຫຼີ້ນ,ຖືກຂົ່ມຂືນກະທະສຳເລົາແລະຖືກໄລ່ອອກຈາກວຽກ.
ໃນເວລາຖືພາ,ເກີດລູກຫຼເຈັບເປັນແມ່ນບໍ່ໄດ້ຮັບການປິ່ນປົວດັ່ງນັ້ນ ເຮັດໃຫ້ກຳມະກອນຍິງຮູ້ສຶກຄຽດແຄ້ນຈຶ່ງໄດ້ສາມັກຄີກັນລຸກຂື້ນທວງໃຫ້ເຈົ້າຂອງໂຮງງານແກ້ໄຂຊີວິດການເປັນຢູ່ໃຫ້ດີຂື້ນພາຍໃຕ້ຄຳຂວັນ ” ເຂົ້າຈີ່ແລະດອກກຸຫຼາບ ” ເຂົ້າຈີ່ໝາຍເຖິງເສດຖະກິດດີຂື້ນ,ດອກກຸຫຼາບໝາຍເຖິງຊີວິດດີຂື້ນມາເຖິງປີ 1910 ,ກອງປະຊຸມສາກົນໄດ້ໄຂຂື້ນຢ່າງເປັນທາງການ ທີ່ປະເທດແດນມາກມີ 18 ປະເທດເຂົ້າຮ່ວມ ກອງປະຊຸມດັ່ງກ່າວໄດ້ຕົກລົງຮັບຮອງວັນທີ 8 ມີນາ ເປັນວັນແມ່ຍິງສາກົນແລະ ທ່ານ ຍັງໄດ້ເລົ່າຄືນປະຫວັດ ຄວາມເປັນມາຂອງຊາວໜຸ່ມປະຊາຊົນປະຕິວັດລາວ.
ຈາກນັ້ນທ່ານຍັງໄດ້ສະແດງຄວາມຮູ້ບຸນຄຸນຢ່າງລົ້ນເຫຼືອຕໍ່ການນຳພັກລັດແຕ່ລະຂັ້ນ,ພະນັກງານອາວຸໂສບຳນານ,ນັກຮົບ ເວົ້າລວມເວົ້າສະເພາະ ພີ່ນ້ອງຊາວເມືອງຈຳພອນແຕ່ລະຍຸກແຕ່ລະສະໄໝທີ່ໄດ້ເອົາໃຈໃສ່ກໍ່ສ້າງແລະຖະນຸບຳລຸງ,ອະນຸຊົນ,ເຍົາວະຊົນ,ຊາວໜຸ່ມແລະເອື້ອຍນ້ອງແມ່ຍິງໃຫ້ຄຸນທາດການເມືອງ,ຄຸນສົມບັດສິນທຳປະຕິວັດ,ມີຄວາມຮູ້ຄວາມສາມາດກາຍເປັນຜູ້ສືບທອດໃນອະນາຄົດທີ່ດີ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: Media Laos