ຈະໄດ້ຈັດບໍ່! ເທດສະການບູນຊ້າງແຂວງໄຊຍະບູລີຢູ່ໃນຂັ້ນຕອນການຫາລື.
ພາບ: laoedaily.com.la
ໄຊຍະບູລີກຳລັງທຳການກະກຽມບຸນຊ້າງ ປະຈໍາປີ 2021 ທີ່ຈະມາເຖິງ.
ເປັນປະຈຳທຸກໆປີຈະມີເທດສະການຈັດງານບູນຊ້າງຂື້ນທີ່ແຂວງໄຊຍະບູລີແຕ່ສະພາບໃນປະຈະບັນເນືອງຈາກການລະບາດຂອງພະຍາດໂຄວິດ-19 ຢູ່ທົວໂລກຍັງຄົງຕ້ອງໄດ້ປ້ອງກັນເພື່ອບໍ່ໃຫ້ກັບມາລະບາດອີກຮອບ ແລະ ເພື່ອໃຫ້ເທດສະການປະເພນີຍັງຄົງໄດ້ປະຕິບັດກັນຕໍ່ໄປໃນປີທີ່ຈະມາເຖິງ.
ດັງນັ້ນກ່ອນເທດສະການຈະມາເຖິງນີ້ ກໍໄດ້ມີການຈັດກອງປະຊຸມ ປຶກສາຫາລື ກ່ຽວກັບການກະກຽມຈັດງານບຸນຊ້າງປະຈໍາປີ 2021 ຂຶ້ນໃນວັນທີ 15 ທັນວາ 2020 ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ເຊິ່ງກອງປະຊຸມໄດ້ຜ່ານ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການແຕ່ງຕັ້ງຄະນະຮັບຜິດຊອບ ຊີ້ນໍາການກະກຽມ ແລະ ຈັດງານບຸນຊ້າງ ໄຊຍະບູລີ ປະຈໍາປີ 2021.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ປືກສາຫາລືກ່ຽວກັບການກໍານົດຕາຕະລາງ, ວັນ, ເວລາມື້ຈັດງານບຸນ, ກໍານົດບັນດາກິດຈະກໍາຕ່າງໆ ເຊັ່ນ: ການສະແດງຂອງຊ້າງຈໍານວນໜຶ່ງ, ການຂີ່ຊ້າງອ້ອມເມືອງ, ບາສີສູຂວັນຊ້າງ, ການໃສ່ບາດ-ຍາດນໍ້າ ເພື່ອອຸທິດບຸນກຸສົນໄປໃຫ້ຊ້າງ, ວາງສະແດງສິນຄ້າໂອດດັອບຂອງທ້ອງຖິ່ນ, ການສະແດງສິລະປະ-ວັນນະຄະດີ ແລະ ອື່ນໆ.
ເຊິ່ງການຈັດງານບຸນຊ້າງປະຈໍາປີ 2021 ນີ້ ແມ່ນຈະໄດ້ເຮັດນ້ອຍຕາມຮີດຄອງປະເພນີ, ທັງນີ້ ກໍເພື່ອປະຕິບັດຕາມມາດຕະການຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19, ສ່ວນລາຍລະອຽດຄະນະຮັບຜິດຊອງຈັດງານບຸນ ຈະໄດ້ມີການຖະແຫລງຂ່າວໃຫ້ຮູ້ໃນທ້າຍເດືອນນີ້.
ໂອກາດນີ້, ທ່ານ ເພັດພິໄຊ ສູນວິໄລ ກໍໄດ້ຮຽກຮ້ອງ ມາຍັງບັນດາທ່ານທີ່ຖືກແຕ່ງຕັ້ງຮັບຜິດ ຊອບໃນການກະກຽມຈັດງານບຸນຄັ້ງນີ້, ຈົ່ງເພີ່ມທະວີຄວາມເປັນເຈົ້າການເຮັດໜ້າທີ່-ທີ່ໄດ້ມອບໝາຍໃຫ້ສໍາເລັດ, ທັງນີ້ ກໍເພື່ອເຮັດໃຫ້ການຈັດງານບຸນຊ້າງ ໄດ້ຮັບຜົນສໍາເລັດຕາມລະດັບຄາດໝາຍ ແລະ ຮັບປະກັນຄວາມປອດໄພຮອບດ້ານ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: laoedaily.com.la
