ຄໍາວ່າ “ສະຖານະ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ສະຖານະ” ມີຄວາມໝາຍແນວໃດ?
ຄໍາວ່າ “ສະຖານະ” ໝາຍເຖິງການຕັ້ງຢູ່ ຫຼື ຄວາມເປັນໄປຂອງສິ່ງໃດສິ່ງນຶ່ງ ທີ່ເຮົາສາມາດພົບເຫັນໄດ້ ອ້ອມຕົວເຮົາທົ່ວໄປ ເຊັ່ນ: ອາຍແກັດສ໌ ແມ່ນສະຖານະນຶ່ງຂອງສະສານ ມີຮູບຮ່າງ ແລະ ບໍລິມາດບໍ່ຄົງທີ່, ຂອງແຂງ ແມ່ນສະຖານະນຶ່ງຂອງສະສານທີ່ມີຮູບຮ່າງ ແລະ ບໍລິມາດຄົງຕົວ, ຂອງແຫຼວ ສະຖານະແມ່ນນຶ່ງຂອງສະສານ ຊຶ່ງມີບໍລິມາດຄົງຕົວ ແຕ່ຮູບຮ່າງປ່ຽນໄປຕາມພາຊະນະທີ່ບັນຈຸ, ຈຸດເຍືອກແຂງ ແມ່ນສະຖານະເປັນຂອງແຂງ, ຈຸດຫຼອມແຫຼວ ແມ່ນສະຖານະເປັນຂອງແຫຼວ ເປັນຕົ້ນ.
ນອກຈາກນີ້, “ສະຖານະ” ຍັງໝາຍເຖິງຄວາມເປັນຢູ່ຂອງຄົນ, ບ້ານ, ເມືອງ, ປະເທດໃດນຶ່ງ ຫຼື ຢ່າງໃດຢ່າງນຶ່ງ ດັ່ງ ເປັນຄົນສະຖານະຍາກຈົນ ຫຼື ສະຖານະລໍາບາກ, ປະເທດລາວມີສະຖານະໝັ້ນຄົງ ແລະ ມີສະຖຽນທາງດ້ານການເມືອງ, ໂລກຕົກຢູ່ໃນສະຖານະໂລກຮ້ອນ, ຕົກຢູ່ໃນສະຖານະດຽວກັນ ເປັນຕົ້ນ. “ສະຖານະ” ຍັງບົງບອກເຖິງໜ້າທີ່ຕໍາແໜ່ງ ຊັ້ນຄົນຂອງຄົນ ແລະ ສັດ ອີກດ້ວຍ ດັ່ງ ຄົນມີສະຖານະ ເປັນສັດຊັ້ນສູງ, ລະບອບສັກດີນາ ເຈົ້າຊີວິດມີສະຖານະປົກຄອງທົ່ວແຜ່ນດິນ, ປະທານປະເທດມີສະຖາ ນະທຽບເທົ່າກັບປະມູກລັດ ແລະ ປະທານາທິບໍດີ ແລະ ອື່ນໆ. ແຕ່ຖ້າເປັນຄົນບໍ່ມີສະຖານະແມ່ນບໍ່ມີສັນ ຊາດ ນັ້ນເອງ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ສະຖານະ”.
“ສະຖານະ” (1. ຄໍານາມ) ການຕັ້ງຢູ່, ຄວາມເປັນໄປ, ຄວາມເປັນຢູ່. ຕໍາແໜ່ງ, ໜ້າທີ່, ບ່ອນຢູ່, ບ່ອນເຊົາ.
ຕົວຢ່າງ:
- ນໍ້າມີສະຖານະເຍືອກແຂງ ຫຼື ຈຸດເຍືອກແຂງຢູ່ທີ່ອຸນຫະພູມສູນອົງເຊເຊັດສ໌, ຖ້າໜາວກວ່ານັ້ນ ແມ່ນແຮງແຂງດີ.
- ໃນປະເທດທີ່ບໍ່ຈະເລີນແມ່ນມີຄົນສະຖານະຍາກຈົນຫຼາຍກວ່າປະເທດທີ່ຈະເລີນແລ້ວ ທີ່ມີຄົນສະ ຖານະຮັ່ງມີຫຼາຍ.
- ປະທານນາທິບໍດີຂອງອາເມລິກາມີສະຖານະພິເສດ ແລະ ມີສິດຫຼາຍຢ່າງເມື່ອທຽບກັບພົນລະເມືອງປະເທດເຂົາເຈົ້າ.
- ບ່າວ ແລະ ສາວຄູ່ນຶ່ງຮັກກັນມາຕັ້ງດົນແດ່ຍ້ອນສະຖານະຕ່າງ ຈິ່ງຖືກກິດກັ້ນຈາກພໍ່ແມ່ຜູ້ສາວທີ່ມຖານະດີກວ່າ ແລະ ເຮັດໃຫ້ຕ້ອງເລີກລາກັນໄປ.
ສະຫຼຸບ.
ຄໍາວ່າ “ສະຖານະ” ແມນການຕັ້ງຢູ່, ແມ່ນຄວາມເປັນໄປຂອງຢ່າງໃດຢ່າງນຶ່ງ ຕາມຈຸດພິເສດຂອງມັນ
ນອກຈາກນີ້, “ສະຖານະ” ຍັງແມ່ນຄວາມເປັນຢູ່ຂອງສິ່ງຕ່າງໆ ລວມທັງຄົນ, ສັດ, ສິ່ງຂອງ, ບ້ານ, ເມືອງ ຮອດປະເທດໃດນຶ່ງ ຫຼື ຢ່າງອື່ນໆ. ພ້ອມນັ້ນ, “ສະຖານະ” ຍັງໃຊ້ບົງບອກເຖິງໜ້າທີ່ຕໍາແໜ່ງ, ຊັ້ນຄົນຂອງຄົນ ແລະ ສັດ ອີກດ້ວຍ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
