ຄໍາວ່າ “ຕົວຢ່າງ” ການນໍາໃຊ້ ແລະ ຄວາມໝາຍໃນພາສາລາວ
DooDiDo
ອະທິບາຍຄໍາວ່າ “ຕົວຢ່າງ” ມີຄວາມໝາຍແນວໃດ?
ຄໍາວ່າ “ຕົວຢ່າງ” ໝາຍເຖິງແບບຢ່າງຂອງແນວໃດແນວນຶ່ງ, ສິ່ງໃດສິ່ງນຶ່ງ ທີ່ນໍາມາສະເໜີ ຫຼື ນໍາມາໃຫ້ກັນເບີ່ງ ເອົາເປັນບົດຮຽນ, ກ່າຍເອົາແບບຢ່າງ ຫຼື ເອົາໄປຮຽນແບບ ເຊັ່ນ: ຕົວຢ່າງແບບເສື້ອນັກຮຽນມັດ ທະຍົມ, ຕົວຢ່າງການທົດລອງໄຟຟ້າແຮງສູງຕ້ອງໃຊ້ຫຍັງແດ່, ຕົວຢ່າງການແກ້ບົດເລກເລຂາຄະນິດ, ຕົວຢ່າງການເຮັດວຽກທີ່ດີ, ຕົວຢ່າງການເດີນທາງທີ່ດີ, ຄອບຄົວຕົວຢ່າງກະເສດຕະກອນດີເດັ່ນ ເປັນຕົ້ນ.
ດັ່ງທີ່ໄດ້ກ່າວມາແລ້ວວ່າ “ຕົວຢ່າງ” ຫຼື ການຍົກຕົວຢ່າງ ເປັນສິ່ງສໍາຄັນໃນການເອົາສິ່ງສິ່ງນຶ່ງຍົກມາອ້າງອີງເພື່ອໃຫ້ທ່ານຜູ້ຊົມ, ຜູ້ຟັງ, ຜູ້ເບີ່ງ, ຜູ້ຊີມ, ຜູ້ສໍາພັດ ຊຶ່ງແມ່ນບຸກຄົນທີ່ເຮົາຢາກສື່ສານໃຫ້ເຫັນຕົວຈິງ ຫຼື ເຂົ້າໃຈຄວາມກະຈ່າງແຈ້ງ, ຊຶ່ງເປັນສິ່ງທີ່ສະແດງເຖິງຕົວແບບ ຫຼື ໃຫ້ຮູ້ຮູບຮ່າງໜ້າຕາ, ລັກສະນະທ່າທາງ, ຂະໜາດ, ສີ, ກີ່ນ, ຊັບພະຄຸນ, ຄຸນນະພາບ ແລະ ອື່ນໆ.
ສະນັ້ນ ເພື່ອໃຫ້ເຂົ້າໃຈ ການນໍາໃຊ້ຄໍາດັ່ງກ່າວໃຫ້ຫຼາຍຂຶ້ນ ເຮົາມາເບິ່ງລາຍລະອຽດດັ່ງລຸ່ມນີ້:
ຄຳວ່າ “ຕົວຢ່າງ”.
“ຕົວຢ່າງ” (1. ຄໍານາມ) ແບບຢ່າງທີ່ເອົາມາອ້າງ.
ຕົວຢ່າງ:
- ໃນຫ້ອງຮຽນວິຊາຄະນິດສາດ ຄູໄດ້ຍົກຕົວຢ່າງບັ້ງເລກຫຼາຍຂໍ້ເພື່ອມາແກ້ສົມທຽບໃຫ້ນັກຮຽນ ເບີ່ງໃຫ້ເຂົ້າໃຈດີຂຶ້ນ.
- ໂຄງການກະເສດທິດສະດີໃໝ່ ໄດ້ມີການສາທິດ ແລະ ເຮັດຕົວຢ່າງໄວ້ໃຫ້ປະຊາຊົນ ແລະ ບຸກ ຄົນທີ່ສົນໃຈໄດ້ເຂົ້າຢ້ຽມຊົມ, ຖອດຖອນບົດຮຽນ ເພື່ອນໍາໄປເຮັດຕົວຈິງ.
- ການຝຶກອົບຮົມກ່ຽວກັບການນໍາໃຊ້ເຄື່ອງມືໃນໂຮງງານ, ຄູຝຶກໄດ້ຍົກຕົວຢ່າງໃນການເຮັດ ແລະ ສາທິດໃຫ້ແກ່ຜູ້ເຂົ້າຮ່ວມເບີ່ງຫຼາຍລົບຫຼາຍຕ່າວ ເພື່ອໃຫ້ເຂົ້າໃຈ.
ສະຫຼຸບ.
ຄໍາວ່າ “ຕົວຢ່າງ” ແມ່ນຕົວແບບ, ແບບຢ່າງຂອງແນວໃດແນວນຶ່ງ ທີ່ເຮົານໍາມາສະເໜີ ເພື່ອອ້າງອີງໃຫ້ແກ່ບຸກຄົນທີ່ເຮົາຢາກສື່ສານໃຫ້ເຫັນຕົວຈິງ ຫຼື ທ່ານຜູ້ຊົມ, ຜູ້ຟັງ, ຜູ້ເບີ່ງ, ຜູ້ຊີມ, ຜູ້ສໍາພັດ ເຫັນເຂົ້າໃຈຄວາມກະຈ່າງແຈ້ງ ເຖິງຮູບຮ່າງໜ້າຕາ, ລັກສະນະທ່າທາງ, ຂະໜາດ, ສີ, ກີ່ນ, ຊັບພະຄຸນ, ຄຸນນະພາບ ແລະ ອື່ນໆ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
