ອະທິບາຍຄວາມໝາຍຂອງຄໍາວ່າ “ດາວ” ແລະ “ດາຣາ”

ຄໍາວ່າ “ດາວ” ແລະ “ດາຣາ” ຫຼື “ດາລາ” ເຖິງຈະເວົ້າຕ່າງກັນ ແຕ່ມີຄວາມໝາຍອັນດຽວກັນໝາຍເຖິງສິ່ງທີ່ຮຸ່ງຢູ່ຟ້າ (ຍົກເວັ້ນດວງເດືອນ). ດາວມີອິດທິພົນຕໍ່ການດໍາລົງຊີວິດຂອງມະນຸດມາແຕ່ດຶກດໍາບັນ ເພາະຄົນເຮົາໃຊ້ດາວເພື່ອນໍາທາງໃນຍາມຄໍ່າມຶດ, ໃຊ້ເພື່ອໃຫ້ຮູ້ເຖິງການປ່ຽນຂອງລະດູການຕ່າງໆ ເພື່ອໃຫ້ສາມາດກໍານົດການ ເພາະປູກ ແລະ ບູຊາເທບພະເຈົ້າຕ່າງໆ.

ດາວ ຫຼື ດາຣາ ຍັງມີການເອີ້ນຊື່ຕ່າງໆເຊັ່ນ: ດາວເຄາະ, ດາວເລີກ, ດາວນົບພະເຄາະ, ດາວຊ້າງ, ດາວຫາງ, ດາວທຽມ (ແມ່ນສິ່ງທີ່ມະນຸດສ້າງຂຶ້ນສົ່ງຂຶ້ນໄປເທີງຟ້າ ເພື່ອສົ່ງສັນ ຍານວິທະຍຸ ຫຼື ພາລະກິດດ້ານອາວະກາດບໍ່ແມ່ນເກີດໂດຍທໍາມະຊາດ). ຄົນເຮົາຍັງເອີ້ນດາວຕາມເຫດທີ່ເກີດຂຶ້ນ ເຊັ່ນ: ດາວຕົກ, ດາວຝົນ, ດາວແຈ້ງສະຫວ່າງ, ດາວປະກາຍແສງ, ດາວກະຈາຍ. ຈາກການສຶກສາດ້ານລະບົບ ດາວ ລວມທັງໝົດຂອງດາລາຈັກກະວານ ຊຶ່ງໄດ້ຈໍາແນກເອີ້ນຕາມລັກສະນະຮູບຮ່າງມີຈໍານວນ 88 ກຸ່ມ.

ນອກຈາກນັ້ນ, ມະນຸດຍັງເອີ້ນວັນເວລາ ຕາມຊື່ຂອງດວງດາວຕ່າງໆ ລວມທັງຕາເວັນ ແລະ ດວງເດືອນ ຄື: ວັນຈັນ ມາຈາກຊື່ຂອງດວງຈັນ ຫຼື ເດືອນ, ວັນອັງຄານ ເອີ້ນມາຈາກດາວອັງຄານ, ວັນພຸດ ເອີ້ນຈາກດາວພຸດ, ວັນພະຫັດ ເອີ້ນຈາກດາວພະຫັດ, ວັນສຸກ ເອີ້ນຈາກດາວສຸກ, ວັນເສົາ ເອີ້ນຈາກດາວເສົາ ແຕ່ວັນອາທິດ ແມ່ນເອີ້ນຈາກດວງອາທິດ ຫຼື ຕາເວັນ ນັ້ນເອງ. ອີກຄວາມໝາຍນຶ່ງ “ດາວ” ຫຼື “ດາຣາ” ແມ່ນໃຊ້ເອີ້ນບຸກຄົນທີ່ໂດ່ງດັງຈາກການຮ້ອງເພັງ, ສະແດງໜັງ ຫຼື ລະຄອນ ເຊັ່ນ: ດາລາຮູບເງົາ, ດາວປະຈໍາເມືອງ, ດາວປະຈໍາຄະນະ, ດາວມະຫາວິທະຍາໄລ ແລະ ອື່ນໆ.

ຄວາມໝາຍຄຳວ່າ “ດາວ”.

“ດາວ” (1. ຄໍານາມ) ດາຣາ. ໜ່ວຍມີແສງໃນຟ້າໃນຍາມກາງຄືນ ນອກຈາກໜ່ວຍຕາເວັນ ແລະ ດວງເດືອນ, ໜ່ວຍໂລກ ຕ່າງໆ, ແຕ່ທາງໃນທາງໂຫຣາສາດ ເອີ້ນຕາເວັນ ແລະ ເດືອນວ່າ ດາວນົບພະເຄາະ.

ຕົວຢ່າງ:

• ຂ່າວດາວຫາງຕົກຢູ່ປະເທດລັດເຊຍ ເຮັດໃຫ້ມີເຮືອນຫຼາຍຫຼັງເພພັງ ແລະ ຄົນຫຼາຍພັນຄົນໄດ້ຮັບບາດ ເຈັບຈາກເຫດການຄັ້ງນີ້.
• ດາວອັງຄານ ເປັນດາວສີແດງ ແລະ ໄດ້ຮັບຄວາມສົນໃຈຈາກມະນຸດໃນການທີ່ຢາກໄປສຶກສາວ່າເຄີຍ ມີນໍ້າ ແລະ ມີສີ່ງທີ່ມີຊີວິດດໍາລົງຢູ່ກ່ອນບໍ່.

ຄວາມໝາຍຄຳວ່າ “ດາຣາ”.

“ດາຣາ” ຫຼື “ດາລາ” (1. ຄຳນາມ) ດາວ, ດວງດາວ. ໝາຍເຖິງສິ່ງທີ່ຮຸ່ງແຈ້ງຍິບຍັບຢູ່ເທີ່ງທ້ອງຟ້າ ຢາມຄໍ່າມຶດ ມີຫຼາຍລ້ານດວງ ແລະ ນ້ອຍກວ່າດວງເດືອນ. (2. ຄຳນາມ) ໃຊ້ເອີ້ນບຸກຄົນສະແດງນໍາ ຫຼື ຄົນທີ່ມີຊື່ສຽງໃນການຮ້ອງເພັງ ຫຼື ສະແດງຮູບເງົາ ຫຼື ລະຄອນ.

ຕົວຢ່າງ:

• ອົງການນາຊາ (NASA) ແມ່ນອົງການນຶ່ງທີ່ຕັ້ງຂຶ້ນມາ ເພື່ອສືກສາກ່ຽວກັບອາວະກາດ ລວມເອົາທັງລະ ບົບດາຣາສາດ.
• ດາຣາ ຫໍລີວຸດ ອາເມລິກາ ແມ່ນມີຊື່ສຽງໂດ່ງດັງຫຼາຍ ຊຶ່ງໜັງທີ່ດາຣາຄ້າຍດັ່ງກ່າວສະແດງແມ່ນມີຄົນ ທົ່ວໂລກມັກ, ນິຍົມ ແລະ ຕິດຕາມຫຼາຍລ້ານຄົນ.

ສະຫຼຸບ.

ຄໍາວ່າ “ດາວ” ແລະ “ດາຣາ” ມີການອ່ານ ແລະ ອອກສຽງຕ່າງກັນ ແຕ່ຄວາມໝາຍແມ່ນອັນດຽວກັນໝາຍເຖິງສິ່ງທີ່ຮຸ່ງແຈ້ງຍິບຍັບຢູ່ເທີ່ງທ້ອງຟ້າ ຢາມຄໍ່າມຶດ ມີຫຼາຍລ້ານດວງ ແຕ່ບໍ່ແມ່ນເດືອນ ແລະ ຕາເວັນ. ນອກຈາກ ນັ້ນ, ຍັງໃຊ້ເອີ້ນບຸກຄົນທີ່ໂດ່ງດັງຈາກການຮ້ອງເພັງ, ສະແດງໜັງ ຫຼື ລະຄອນ ວ່າເປັນດາລາ ຫຼື ເປັນດາວ ແຫ່ງວົງການ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo