ຄຳວ່າ ຂອບໃຈ ແລະ ຄອບໃຈ ຖ້າຈະໃຫ້ຖືກຕ້ອງຄວນນຳໃຊ້ໂຕໃດ?
DooDiDo
ຄວາມແຕກຕ່າງ ແລະ ຄວາມໝາຍຂອງ ຂອບໃຈ ແລະ ຄອບໃຈ.
ການຂອບໃຈ ເວລາທີ່ພວກເຮົາເຮັດອັນໃດອັນໜຶ່ງ ແກ່ຜູ້ໃດຜູ້ໜຶ່ງດ້ວຍຄວາມເຕັມໃຈ ແລ້ວໄດ້ຍິນຄໍາວ່າ “ຂອບໃຈ” ເຮົາກໍຮູ້ສຶກມີຄວາມມ່ວນຊື່ນໃນຈິດໃຈທັນທີ ພ້ອມທັງມີຄໍາຕອບໄປວ່າ “ບໍ່ເປັນຫຍັງ” ບາງຄັ້ງເຮົາກໍຕື່ມຄໍາວ່າ “ດອກ” ເຂົ້າໄປ ເຮັດໃຫ້ກາຍເປັນ “ບໍ່ເປັນຫຍັງດອກ”. ຄໍາເວົ້າດັ່ງກ່າວນັ້ນ ສາມາດເຮັດໃຫ້ທັງຜູ້ກ່າວ “ຂອບໃຈ” ແລະຜູ້ຮັບຄໍາຂອບໃຈ ຕ່າງກໍມີຄວາມຮູ້ສຶກດີໆຕໍ່ກັນ.
ສຳລັບການນຳມາໃຊ້ໃນການຂີດຂຽນ, ການພິມ, ການເວົ້າຕ່າງໆ ຍັງຄົງເຫັນບາງຄົນຍັງສະກົດຜິດໃນຄຳນີ້ ອາດເປັນຍ້ອນຫລາຍໆຄົນຍັງບໍ່ໄດ້ສືກສາແທ້ ແລະ ຊອກຫາແຫລ່ງຂໍ້ມູນມາເພື່ອນຳມາອ້າງອີງນຳກັນ, ສຳລັບບົດນີ້ຈະຂໍອີງຕາມວັດຈະນານຸກົມມາອະທິບາຍໃຫ້ຮູ້ນຳກັນ.
ຄໍາວ່າ ຂອບໃຈ.
ໝາຍເຖິງສະແດງຄວາມຮູ້ບຸນຄຸນໃນນໍ້າໃຈທີ່ມີເມດຕາກະລຸນາ, ກ່າວຕອບແທນບຸນຄຸນຜູ້ອື່ນດ້ວຍຄວາມເວົ້າທີ່ມາຈາກໃຈຈິງ.
ຂອບໃຈ ຄວາມໝາຍອີກແບບໜຶ່ງກໍ່ອາດຈະບົ່ງບອກເຖິງການຂອບໃຈທີ່ບໍ່ໄດ້ມີສິ່ງຕອບແທນກັບຄືນມາແຕ່ຢ່າງໃດເຊັ່ນ, ເວລາເຮົາໄປຂໍຮ້ອງໃຫ້ໃຜຈັກຄົນໜື່ງຊ່ວຍເຫລືອ ຫລື ເຮັດສິ່ງໃດສິງໜື່ງໃຫ້ ແຕ່ຜູ້ນັ້ນຊ້ຳພັດຊ່ວຍບໍ່ໄດ້ດ້ວຍເຫດຜົນໃດໆກໍ່ດີ, ເຮົາກໍ່ສາມາດໃຊ້ຄຳຂອບໃຈໃນແບບດຽວກັນໄດ້.
ຕົວຢ່າງ:
ຂອບໃຈເດີທີ່ກະລຸນາຫລີກທາງໃຫ້.
ຂອບໃຈເດີສຳລັບການຊ່ວຍເຫລືອຄັ້ງນີ້.
ຄຳວ່າ ຄອບໃຈ.
ການສະກົດແບບນີ້ເປັນການສະກົດທີ່ຜິດ, ເວລາຂຽນ ປາກົດມີບາງຄົນສະກົດເປັນ ຄອບໃຈ ເຊິ່ງຜິດແຜກຈາກການສະກົດໃນວັດຈະນານຸກົມ ແລະ ຄວາມນິຍົມຂອງຄົນສ່ວນຫຼາຍ.
ສະຫລຸບ.
ຄວາມໝາຍຂອງຄຳວ່າ ຂອບໃຈ ໝາຍເຖິງສະແດງຄວາມຮູ້ບຸນຄຸນໃນນໍ້າໃຈທີ່ມີເມດຕາກະລຸນາ, ກ່າວຕອບແທນບຸນຄຸນຜູ້ອື່ນດ້ວຍຄວາມເວົ້າທີ່ມາຈາກໃຈຈິງ, ສ່ວນຄຳວ່າ ຄອບໃຈ ເປັນການສະກົດທີ່ຜິດ, ເຊິ່ງຜິດແຜກຈາກການສະກົດໃນວັດຈະນານຸກົມ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
