ຕອນນີ້ຈະມາເວົ້າກ່ຽວກັບຄຳສັບທີ່ວ່າ ຫ່ວງ ແລະ ຮ່ວງ
DooDiDo
ອະທິບາຍຄວາມໝາຍພາສາລາວຂອງຄຳວ່າ ຫ່ວງ ແລະ ຮ່ວງ.
ໃນພາສາລາວຫລາຍໆຄຳມີຄວາມໝາຍແຕກຕ່າງກັນ ແລະ ຫລາຍໆຄຳກໍມີຄວາມໝາຍທີ່ໃກ້ຄຽງກັນສະນັ້ນການທີ່ຈະນຳໃຊ້ໃຫ້ຖືກຕ້ອງແທ້ກໍຕ້ອງໄດ້ສືກສາລົງເລີກອີກກວ່າປົກກະຕິ, ວ່າເຮົາຄວນໃຊ້ຄຳໃດແທ້ໃນພາສາລາວ ຈິ່ງຈະເໝາະສົມ ແລະ ຈະສະກົດຄຳແບບໃດໃຫ້ຖືກຕ້ອງຕາມຫລັກໄວຍາກອນຂອງພາສາລາວ.
ໃນພາສາລາວຄຳວ່າ ຫ່ວງ ແລະ ຮ່ວງ ມີທັງຄວາມໝາຍທີ່ແຕກຕ່າງກັນ ແລະ ຄົນຕ່າງຊາດກໍ່ຍັງຈຳແນກສຽງອອກຍາກຢູ່ດີ ເພາະພາສາ ສາກົນບໍ່ມີວັນນະຍຸດສ່ວນຫຼາຍຈະອ່ານອອກສຽງກາງທີ່ບໍ່ມີສຽງ ເອກ-ໂທ ຄືພາສາລາວ ກັບ ພາສາໄທ. ແຕ່ໃນນີ້ຈະຕ້ອງເນັ້ນໜັກໃນການອອກສຽງ ຄໍາວ່າ: ຫ່ວງ ແລະ ຮ່ວງ ມັນມີຄວາມໝາຍໄປຄົນລະຢ່າງກັນ ແລະ ແຕ່ລະຄໍາກໍ່ມີຄວາມໝາຍໄປອີກຫຼາຍຢ່າງ..
ຄຳວ່າ ຫ່ວງ ມີສອງຄວາມໝາຍ:
1) ເປັນຄໍານາມ ໝາຍເຖິງເຄື່ອງຄ້ອງ, ຂອງເປັນບ້ວງເກາະກັນ, ສາຍແນນ, ຂອງທີ່ເປັນວົງ ເຊັ່ນ ຫ່ວງສຸບມືສຸບຕີນ ດັ່ງໃນບົດວັນນະຄະດີ “ທ້າວຮຸ່ງທ້າວເຈືອງ” ຂຽນໃນຕອນໜຶ່ງວ່າ “ຊັກຫ່ວງຊີ້ ເຊີນມິງແມນຫຼວງ”
2) ເປັນຄໍາກິລິຍາ ໝາຍເຖິງ ຜູກພັນ, ກັງວົນ, ພະວົງ, ອາໄລນໍາ.
ຕົວຢ່າງ:
- ຕອນເປັນເດັກນ້ອຍຂ້ອຍເຄີຍຫລິ້ນຫ່ວງຢາງ.
- ເປັນຫ່ວງລູກຊາຍຫລ້າເດລາວໄປຮຽນຕໍ່ຕ່າງປະເທດ.
ຄຳວ່າ ຮ່ວງ ມີສອງຄວາມໝາຍ:
1) ເປັນຄໍາຄຸນນາມ ໝາຍເຖິງ ຫອມ ເຊັ່ນ “ກິ່ນຮ່ວງເຂົ້າ ຫອມກົ້ວທົ່ວໄພ”
2) ເປັນຄໍາກິລິຍາ ໝາຍເຖິງ ຫຼຸດ, ຫຼົ່ນ, ໃບໄມ້ຫຼືດອກໄມ້ທີ່ຫ່ຽວແຫ້ງແລ້ວຫຼົ່ນລົງ ເອີ້ນວ່າ ໃບໄມ້ຮ່ວງ ດອກໄມ້ຮ່ວງ. ມີນັກແປພາສາຫວຽດເປັນພາສາລາວ ມັກຈະປ່ຽນຄໍາວ່າ “ລະດູໃບໄມ້ຫຼົ່ນ” ເປັນ “ລະດູຮ່ວງໂຮຍ”.
ຕົວຢ່າງ:
- ອາຍຸຂອງຄົນເຮົາ ແລະ ຮູບຮ່າງນັບມື້ນັບຮ່ວງໂຮຍລົງ.
- ຕົ້ນໄມ້ໜ້າບ້ານຂອງຂ້ອຍໃບຂອງມັນຮ່ວງຫລົ່ນລົງມາເກືອບໝົດຕົ້ນ.
ສະຫລຸບ.
ຄຳວ່າ ຫ່ວງ ເປັນຄໍານາມ ໝາຍເຖິງເຄື່ອງຄ້ອງ, ຂອງເປັນບ້ວງເກາະກັນ, ສາຍແນນ, ຂອງທີ່ເປັນວົງ, ຖ້າເປັນຄໍາກິລິຍາ ໝາຍເຖິງ ຜູກພັນ, ກັງວົນ, ພະວົງ, ອາໄລນໍາ. ສ່ວນຄຳວ່າ ຮ່ວງ ເປັນຄໍາຄຸນນາມ ໝາຍເຖິງ ຫອມ, ຖ້າເປັນຄໍາກິລິຍາ ໝາຍເຖິງ ຫຼຸດ, ຫຼົ່ນ, ໃບໄມ້ຫຼືດອກໄມ້ທີ່ຫ່ຽວແຫ້ງແລ້ວຫຼົ່ນລົງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
