ຄຳວ່າ “ເສື້ອ” ແລະ “ເຊື້ອ” ໃນພາສາລາວມີຄວາມໝາຍແນວໃດ?
ອະທິບາຍຄວາມຄືກັນ ແລະ ຕ່າງກັນ ຂອງຄຳວ່າ “ເສື້ອ” ແລະ “ເຊື້ອ”.
ຄຳວ່າ “ເສື້ອ” ແລະ “ເຊື້ອ” ມີຄວາມໝາຍແຕກຕ່າງກັນ ແຕ່ການອອກສຽງແມ່ນໃກ້ຄຽງກັນ ເພາະວ່າຄວາມແຕກຕ່າງ ຂອງສຽງສູງ ກັບສຽງຕໍ່າ ແມ່ນຕ່າງກັນເລັກນ້ອຍເທົ່ານັ້ນ.
“ເສື້ອ” ແມ່ນເຄື່ອງນຸ່ງຫົ່ມປະເພດໜຶ່ງ ແຕ່ມີຫຼາຍຊະນິດ ໂດຍລວມຂອງການເອີ້ນແມ່ນ ແບ່ງໄປຕາມລັກ ສະນະຮູບຮ່າງ ແລະ ລະດູການ ເຊັ່ນ: ເສື້ອແຂນຍາວ, ເສື້ອແຂນສັ້ນ, ເສື້ອສາຍດຽວ, ເສື້ອກັນໜາວ, ເສື້ອຂົນສັດ, ເສື້ອໜັງສັດເປັນຕົ້ນ.
ໃນສະໄໝບູຮານ “ເສື້ອ” ມີໄວ້ເພື່ອນຸ່ງຫຸ້ມຫໍ່ຮ່າງກາຍໃຫ້ອົບອຸ່ນຮ່າງ ກາຍ, ນຸ່ງເພື່ອກັນການກັດຂອງແມງໄມ້ ແລະ ຍຸງ, ແຕ່ໃນປັດຈຸບັນ ນອກຈາກທີ່ໄດ້ກ່າວມານັ້ນ ການນຸ່ງ ເສື້ອຍັງແມ່ນໂຊແຟຊັນ ເພື່ອຄວາມຈົບຄວາມງາມ, ເປັນເອກະລັກ. ໃນຫຼາຍປະເທດ ຫຼາຍຍຸກ ຫຼາຍສະ ໄໝ “ເສື້ອ” ຍັງບົງບອກເຖິງຊົນຊັ້ນ ແລະ ຖານະຂອງຜູ້ນຸ່ງ ໃນສັງຄົມອີກດ້ວຍ ຕົວຢ່າງເຊັ່ນໃນປະເທດ ຈີນ ການນຸ່ງເສື້ອຂອງຈັກກະພັດຈະແຕກຕ່າງຈາກຂຸນນາງ, ພໍ່ຄ້າຊາວຂາຍ ແລະ ປະຊາຊົນທົ່ວໄປ.
ສ່ວນຄໍາວ່າ “ເຊື້ອ” ແມ່ນມີຄວາມໝາຍວ່າເກີດຈາກສາຍເລືອດດຽວກັນ, ມີບັນພະບູລຸດອັນດຽວກັນ ເປັນຄອບຄົວດຽວກັນ ໃນໂລກນີ້ມີຄົນຫຼາກຫຼາຍເຊື້ອຊາດ ແຕ່ສາມາດແບ່ງອອກເປັນ 3 ກຸ່ມໃຫຍ່ຄື: ຄົນ ຜິວຂາວ (ເຊື້ອສາຍຄົນຢູໂລບ), ຄົນຜິວດໍາ (ເຊື້ອສາຍຄົນອາຟາລິກາ) ແລະ ຄົນຜິວເຫຼືອງ (ເຊື້ອສາຍ ຄົນອາຊີ) ໃນແຕ່ລະກຸ່ມກໍ່ຈະແຕກຍ່ອຍອອກໄປອີກ ເຖິງຢ່າງໃດກໍ່ຕາມໃນຊ່ວງສອງສາມຮ້ອຍປີມີການ ອົບພະຍົບຂອງປະຊາກອນໂລກຢ່າງຕໍ່ເນື່ອງແຕ່ກະຍັງສາມາດຈໍາແນກເຊື້ອຊາດໄດ້ເຊັ່ນ: ຄົນອາເມລິກາ ເຊື້ອຊາດລາວ ໝາຍວ່າມີສາຍເລືອດ ຫຼື ບັນພະບູລຸດ ເປັນຄົນລາວ, ຄົນອົດສະຕາລີ ເຊື້ອຊາດຈີນ. ສະນັ້ນ ເພື່ອໃຫ້ເຂົ້າໃຈເລີກຊຶ່ງກວ່າເກົ່າ ແລະ ເປັນໄປຕາມຫຼັກໄວຍະກອນ ເຮົາມາເບີ່ງລາຍລະອຽດດັ່ງລຸ່ມ ນີ້:
ຄວາມໝາຍຄຳວ່າ “ເສື້ອ”.
“ເສື້ອ” (1.ຄໍານາມ) ເຄື່ອງນຸ່ງ ສູບໃສ່ຕົນຕົວສ່ວນເທິງ ມີຫຼາຍຢ່າງ. (2.ຄໍານາມ) ເທວະດາ. ຍັກ. ຜີ: “ຈັກກ່າວເຖິງກຸມພັນເຖົ້າ ເນົາໃນອະໂນຣາດ ເປັນອາດໃຕ້ລຸ່ມຟ້າສວງເສື້ອສ່ວຍສິນ” (ສິນໄຊ).
ຕົວຢ່າງ:
- ພໍຍ່າງເຂົ້າເດືອນຕຸລາ ອາກາດເລີ່ມໜາວ ໃຫ້ຊື້ເສື້ອກັນໜາວມານຸ່ງໃຫ້ຮ່າງກາຍອົບອຸ່ນຈິງບໍ່ເປັນ ຫວັດ.
- ຊຸດນັກຮຽນປະກອບມີເສື້ອແຂນຍາວ ແລະ ເສື້ອແຂນສັ້ນ ສ່ວນການນຸ່ງຂຶ້ນຫ້ອງແມ່ນບໍ່ຫ້າມ ແລ້ວແຕ່ຄວາມສະດວກຂອງແຕ່ລະບຸກຄົນ.
- ໃນບຸນປີໃໝ່ລາວ (ສົງການ) ຈະເຫັນຄົນຫຼາຍກຸ່ມນິຍົມໄປໃສເສື້ອຢືດທີ່ມີລາຍເປັນເອກະລັກຂອງ ກຸ່ມໃດກຸ່ມນັ້ນມານຸ່ງ ແລະ ຫຼິ້ນນໍ້າຢ່າງມ່ວນຊື່ນ.
- ຜູ້ຍີ່ງສະໄໝນີ້ມັກນຸ່ງເສື້ອບາງໆ ແລະ ບາງເທື່ອກໍ່ນຸ່ງເສື້ອສາຍດ່ຽວ ຕ່າງຈາກຜູ້ຍີງສະໄໝກ່ອນ ທີ່ນຸ່ງເສື້ອຫຸ້ມຮອດປາຍແຂນ.
- ການນຸ່ງເສື້ອຂອງຈັກກະພັດແມ່ນເຫັນວ່າມີສະຫງ່າລາສີ ແລະ ງົດງາມຫຼາຍປະດັບໄປດ້ວຍສີຄໍາ ແຕກຕ່າງຈາກເສື້ອຂອງຂຸນນາງທີ່ເປັນພຽງແພທໍາມະດາ.
- ນາງຍັກຜີເສື້ອສະມຸດ ເປັນຍັກທີ່ມີໜ້າຕາຂີ້ຮ້າຍ ຊຶ່ງປະກົດໃນຫຼາຍໆນິທານ ແຕ່ໃນຄວາມເປັນຈິງ ແລ້ວແມ່ນບໍ່ມີຕົວຕົນ.
ຄວາມໝາຍຄຳວ່າ “ເຊື້ອ”.
“ເຊື້ອ” (1. ຄໍານາມ) ເຊື້ອຊາດ, ເຊື້ອສາຍ, ເຊື້ອພົງພັນ, ສາຍຕະກຸນ, ໂຄດ, ເຫງົ້າ, ຈຸ້ມ, ວົງ, ສະກຸນ, ສາຍເລືອດ ດຽວກັນ, ກໍາມະພັນດຽວກັນ, ສາຍພັນດຽວກັນ, ແນວ, ແຖວ.
ຕົວຢ່າງ:
- ເຊື້ອສາຍລາຍລ່ອງຂອງຄົນຕະກຸນລາວ-ໄທ ແມ່ນປະກົດມີມາໄດ້ຫຼາຍພັນປີ ຊຶ່ງເຊື່ອກັນວ່າມີຖີ່ນ ກໍາເນີດໃນເບື້ອງຕົ້ນຢູ່ຕອນໃຕ້ຂອງປະເທດຈີນ ແລ້ວຄ່ອຍໆອົບພະຍົບໜີສົງຄາມລົງປັກລັກຢູ່ດີນ ແດນສຸວັນນະພູມ. ປະຈຸບັນ ເຊື້ອຕະກຸນດຽວກັນຍັງພົບເຫັນໄດ້ຢູ່ພາກໃຕ້ຂອງຈີນ ຢູ່ລັດອັດສໍາ ຂອງປະເທດອິນເດຍ ແລະ ຕິດກັບຊາຍແດນພະມ້າ ລວມທັງຢູ່ຕອນເໜືອຂອງປະເທດຫວຽດ ນາມ.
- ຢູ່ປະເທດສະຫະລັດອາເມລິກາ ແມ່ນປະກອບມີຫຼາກຫຼາຍວັດທະນາທໍາ ແລະ ຫຼາຍເຊື້ອຊາດ.
- ໝາກມ່ວງກົກນີ້ໜ່ວຍໃຫຍ່ດີ, ສຸກແລ້ວທັງຫວານ ທັງຫອມ ບໍ່ເລະ ເປັນຕາເອົາໄປເຮັດແນວປູກ ຂາຍຄືຊິມີຄົນມາຍາດກັນຊື້.
ສະຫຼຸບ.
ຄຳວ່າ “ເສື້ອ” ແລະ “ເຊື້ອ” ແມ່ນອອກສຽງໃກ້ຄຽງກັນຫຼາຍແຕ່ ມີຄວາມໝາຍຕ່າງຄົນລະແນວ “ເສື້ອ” ແມ່ນເຄື່ອງນຸ່ງຫົ່ມ ຫຼື ອາພອນແນວນຶ່ງ ໃສ່ເພື່ອຄວາມອົບອຸ່ນ ຫຼື ສວຍງາມ. ສໍາລັບຄຳວ່າ “ເຊື້ອ” ໝາຍ ເຖິງສິ່ງທີ່ມີບັນພະບູລຸດອັນດຽວກັນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo