ຄະນະທິມແພດຂອງຫວຽດນາມຢ້ຽມຢາມ ສປປ ລາວ ທີແຂວງໄຊຍະບູລີ
ແຂວງໄຊຍະບູລີ ຈັດພິທີຕ້ອນຮັບຄະນະທີມແພດທີ່ມາຈາກປະເທດຫວຽດນາມ.
ໄດ້ມີການຈັດພິທີຕ້ອນຮັບທິມງານແພດທີ່ມາຈາກ ສສ ຫວຽດນາມ ໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ພ້ອມດ້ວຍຄະນະນໍາຈາກພະແນກສາທາລະນະສຸກ ແຂວງ ໄຊຍະບູລີ, ໄດ້ຕ້ອນຮັບການເຂົ້າພົບປະຂອງທ່ານ ຫງວຽນ ຊ້ອງຮາວ ຮອງຫົວໜ້າພະແນກສາທາລະນະສຸກແຂວງ ອຽນບາຍ ສສ ຫວຽດນາມໃນຕອນເຊົ້າຂອງວັນທີ 12 ກັນຍາ 2022 ນີ້ ທີ່ຫ້ອງຮັບແຂກຫ້ອງວ່າການແຂວງໄຊຍະບູລີ
ໃນພິທີດັ່ງກ່າວໄດ້ມີທັງຄະນະ່ການນຳ,ແພດ ແລະ ພ້ອມດ້ວຍຄະນະທີມແພດແຂວງ ອຽນບາຍເຂົ້າຮ່ວມ, ໃນໂອກາດຕ້ອນຮັບຄະນະທີມແພດຂອງພະແນກສາທາລະນະສຸກແຂວງອຽນບາຍ ໃນຄັ້ງນີ້ ທັງສອງຝ່າຍຍັງໄດ້ລາຍງານໂດຍຫຍໍ້ ກ່ຽວກັບແຜນພັດທະນາເສດຖະກິດ-ສັງຄົມ ເວົ້າລວມເວົ້າສະເພາະແມ່ນວຽກງານການບໍລິຫານດ້ານສາທາລະນະສຸກຂອງແຂວງໄຊຍະບູລີ ໃຫ້ມີການພັດທະນາດີຂຶ້ນ ເທື່ອລະກ້າວ
ທັງນີ້ ກໍ່ເພື່ອເປັນການເສີມຂະຫຍາຍສາຍພົວພັນຮ່ວມມືຮອບດ້ານໃຫ້ໜັກແໜ້ນໃນການຜັນຂະຫຍາຍບັນຫາເນື້ອໃນບົດບັນທຶກການຮ່ວມມືທີ່ສອງຊາດລາວ-ຫວຽດນາມໄດ້ຮ່ວມກັນລົງນາມນັບແຕ່ປີ 2012 ເປັນຕົ້ນມາ ຈາກນັ້ນ ໃນເວລາດຽວກັນ ຄະນະທີມແພດຈາກແຂວງ ອຽນບາຍ ສສ ຫວຽດນາມ ຍັງໄດ້ເຂົ້າຮ່ວມພົບປະກັບຄະນະທີມແພດຂອງພະແນກສາທາລະນະສຸກແຂວງໄຊຍະບູລີ ໂດຍໃຫ້ກຽດຕ້ອນຮັບຂອງທ່ານ ນາງ ໄກຍະສອນ ສີດາ ກໍາມະການພັກແຂວງ ຫົວໜ້າພະແນກສາທາລະນະສຸກແຂວງໄຊຍະບູລີ ພ້ອມດ້ວຍຄະນະເຂົ້າຮ່ວມ
ເຊິ່ງທັງສອງຝ່ານຍັງໄດ້ມີການພົບປະແລກປ່ຽນບົດຮຽນເຊິ່ງກັນ ແລະ ກັນ ເປັນຕົ້ນແມ່ນການສ້າງຊັບພະຍາກອນມະນຸດໃນຂົງເຂດສາທາລະນະສຸກທີ່ໄດ້ໃຫ້ການຊ່ວຍເຫຼືອ ຈາກບັນດາແຂວງຕ່າງໆ ຂອງ ສສ ຫວຽດນາມ ເວົ້າສະເພາະແຂວງອຽນບາຍ ຍັງໄດ້ຮັບພະນັກງານເຂົ້າຝຶກອົບຮົມໄລຍະສັ້ນ ແລະ ໄປຍົກລະດັບວິຊາສະເພາະໄລຍະຍາວເປັນຕົ້ນແມ່ນວິຊາການແພດປິ່ນປົວ, ການຢາ, ຜະດຸງຄັນ, ກຸມມານເວດ, ພະຍາບານ ແລະ ຄຸ້ມຄອງສາທາລະນະສຸກສາດ ໃຫ້ມີຄຸນນະພາບດີຂຶ້ນເທື່ອລະກ້າວ. ພ້ອມນີ້ ຄະນະທີມແພດຂອງແຂວງ ອຽນບາຍຍັງໄດ້ລົງຢ້ຽມຢາມໂຮງໝໍແຂວງໄຊຍະບູລີ ພ້ອມທັງຈັດກິດຈະກໍາກວດພະຍາດ ແລະ ຈ່າຍຢາປິ່ນປົວພະຍາດໂດຍບໍ່ໄດ້ເສຍຄ່າໃຫ້ແກ່ປະຊາຊົນຊາວແຂວງໄຊຍະບູລີ ຕື່ມອີກ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: XBL