ຄອບຄົວການນຳ ຫວຽດນາມ ເຂົ້າຢ້ຽມຊົມ ພິພິທະພັນຜ້າໄຫມລາວ
ຄະນະພັນລະຍາການນຳ ສສ ຫວຽດນາມ ຢ້ຽມຢາມ ສປປ ລາວ ແລະ ຊົມພິພິດຕະພັນຜ້າໄຫມລາວ
ທ່ານ ຫານຊະນະ ສີສານ ປະທານສະມາຄົມຫັດຖະກໍາລາວ ໄດ້ຮັບກຽດຕ້ອນຮັບການເຂົ້າຊົມພິພິທະພັນຜ້າໄຫມລາວ ຕັ້ງຢູ່ບ້ານໜອງທາໃຕ້, ເມືອງຈັນທະບູລີ ຂອງພັນລະຍາຂອງທ່ານລັດຖະມົນຕີຊວງການ ຕ່າງປະເທດ ສສ ຫວຽດນາມ, ພັນລະຍາທ່ານຮອງລັດຖະມົນຕີກະຊວງການຕ່າງປະເທດລາວ ພ້ອມຄະນະ ໃນວັນທີ 24 ສິງຫາ 2022 ນີ້ ເນື່ອງໃນໂອກາດມາຢ້ຽມຢາມ ສປປ ລາວ.
ດັ່ງທີ່ເຮົາໄດ້ຮູ້ກັນດີຢູ່ແລ້ວວ່າສິລະປະຜ້າໄໝລາວມີຄວາມສວຍງາມ ແລະ ເອກະລັກທີ່ແຕກຕ່າງກັນອອກໄປ ແລະ ທັງບໍ່ຄືກັບປະເທດໃດໃນໂລກ ດ້ວຍເຫດນັ້ນໄດ້ເຮັດໃຫ້ທາງບັນດາ ພັນລະຍາ ແລະ ຄະນະມີຄວາມສົນໃຈຫຼາຍຕໍ່ການອະນຸລັກມໍລະດົກການຕໍ່າຜ້າພື້ນເມືອງຂອງລາວ ໂດຍສະເພາະແມ່ນການສ້າງມູນຄ່າເພີ່ມໃຫ້ກັບສິນຄ້າຜ້າຕໍ່າດ້ວຍມືຂອງແມ່ຍິງລາວ ສ້າງລາຍໄດ້ເປັນກອບເປັນກໍາໃຫ້ກັບຕົນເພື່ອນໍາໄປຊ່ວຍເຫລືອເກື້ອກູນໃຫ້ກັບຄອບຄົວ.
ທ່ານ ຫານຊະນະ ສີສານ ໄດ້ອະທິບາຍກ່ຽວກັບປະຫວັດຄວາມເປັນມາຂອງການປູກມອນລ້ຽງມ້ອນ, ຕໍ່າຫູກສາວໄໝນັ້ນ, ຕາມການບັນທຶກປະຫວັດສາດທີ່ເກົ່າແກ່ໃນຍຸກລາດຊະວົງຮັ່ນ ປະມານ 2000 ກ່ວາປີກ່ອນນີ້ ກໍໄດ້ເວົ້າເຖິງຊົນເຜົ່າພື້ນເມືອງຢູ່ເຂດພາກໃຕ້ຂອງຈີນໄດ້ຮູ້ຈັກການປູກມອນລ້ຽງມ້ອນ, ຕໍ່າຫູກສາວໄໝ ແລະ ທັງຮູ້ຈັກນໍາເອົາເປືອກໄມ້ມາເຮັດສີຍ້ອມເສື້ອຜ້າເປັນແລ້ວ ຊົນເຜົ່າພື້ນເມືອງເລົ່ານັ້ນ ເປັນກົກເຫງົ້າຂອງລາວເຮົາລວມທັງຊົນເຜົ່າອື່ນໃນອາຊີຕາເວັນອອກສ່ຽງໃຕ້.
ຜ້າພື້ນເມືອງບໍ່ພຽງແຕ່ໃຊ້ເປັນເຄື່ອງນຸ່ງຫົ່ມເຄື່ອງໃຊ້ສອຍໃນຊີວິດປະຈໍາວັນເທົ່ານັ້ນ ແຕ່ຍັງເປັນເຄື່ອງປະກອບໃນພິທີກໍາທາງສາດສະຫນານໍາອີກ ຜ້າໄດ້ກາຍມາເປັນຈິດວິນຍານແຕ່ດຶກດໍາບັນ ແລະ ປັດຈຸບັນໄດ້ກາຍມາເປັນຂະແໜງເສດຖະກິດທີ່ສໍາຄັນໜຶ່ງທີ່ຊ່ວຍໃຫ້ແມ່ຍິງລາວ ມີຊີວິດທີ່ດີຂຶ້ນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫຼ່ງຂໍ້ມູນຈາກ: laoedaily.com.la