ຄວາມເປັນມາຂອງບຸນໄຫລເຮືອໄຟໃນບຸນອອກພັນສາຂອງລາວ
ພາບ: ອິນໄຊລາວ.
ມາຮູ້ຈັກກັບປະຫວັດຄວາມເປັນມາຂອງບຸນໄຫຼເຮືອໄຟໃນບຸນອອກພັນສາຂອງຊາວລາວ.
ແຕ່ໃດໆມາ, ຕາມປະເພນີລາວເຮົາ ບຸນອອກພັນສາເຊິ່ງກົງກັບມື້ຂື້ນ 15 ຄໍ່າ ເດືອນ 11 ຂອງທຸກໆປີ, ຊາວລາວທຸກຄົນຕ່າງກໍຕັ້ງໜ້າຕັ້ງຕາປະຕິບັດຕາມຮີດຄອງປະເພນີເຊິ່ງໃນມື້ບຸນອອກພັນສານັ້ນ ກໍ່ຈະມີຫຼາກຫຼາຍກິດຈະກໍາ ທາງພຸດທະສາສະໜາ, ບຸນໄຫຼເຮືອໄຟ ທີ່ເປັນໜຶ່ງກິດຈະກຳທີ່ສໍາຄັນໃນມື້ອອກພັນສາ
ບຸນອອກພັນສາປະວໍລະນາ
ບຸນອອກພັນສາແມ່ນການເຮັດບຸນ ໃນມື້ອອກພັນສາຂອງພະສົງ ຫຼື ວັນປະວາລະນາເຊິ່ງເປັນມື້ສໍາຄັນມື້ຫນຶ່ງໃນພະພຸດທະສາສະຫນາ, ທັງນີ້ກໍ່ເນື່ອງ ຈາກວ່າເປັນມື້ສີ້ນສຸດການຢູ່ຈໍາວັດສາ 3 ເດືອນ ໃນລະດູຝົນຂອງພະສົງ, ກົງກັບມື້ຂຶ້ນ 15 ຄໍ່າ ເດືອນ 11 ຕາມປະຕິທິນຈັນທະຄະຕິ.
ໃນວັນດັ່ງກ່າວພະສົງຈະເຮັດສັງຄະກໍາເອີ້ນວ່າ ມະຫາປະວາລະນາ, ເມື່ອອອກພັນສາແລ້ວ ພະສົງສາມາດເດີນທາງໄປພັກ ຫຼື ຄ້າງຄືນບ່ອນອື່ນໄດ້ ເພື່ອສຶກສາຮ່ໍາຮຽນຕໍ່ ແລະ ເຜີຍແຜ່ທໍາມະ ແກ່ພຸດທະສາສະນິກະຊົນ, ບຸນນີ້ມີການປະດັບປະດາໂຄມໄຟ ຕາມວັດວາອາຮາມ ແລະ ສະຖານທີ່ຕ່າງໆ, ມີການຈູດບັ້ງໄຟດອກ, ໄຫຼເຮືອໄຟ ແລະ ລອຍກະທົງໃນເວລາກາງຄືນ
ສຳລັບບຸນໄຫຼເຮືອໄຟນັ້ນ ແມ່ນມີປະຫວັດເລົ່າກັນມາດັ່ງນີ້:
ແຕ່ກ່ອນມີຄູ່ຜົວເມຍກາເຜືອກເຮັດຮັງຢູ່ເທິງຕົ້ນເດື່ອແຄມນໍ້າ ແລະ ມີໄຂ່ກຳລັງຈະຝັກຫ້າໜ່ວຍ, ມີມື້ໜຶ່ງລົມພາຍຸເກີດຂຶ້ນເຮັດໃຫ້ຕົ້ນເດື່ອຖືກພັດຫັກລົງນໍ້າ, ກາເຜືອກທັງສອງແມ່ນໄດ້ເສຍຊີວິດ, ສ່ວນໄຂ່ທັງຫ້າໜ່ວຍແມ່ນໄດ້ໄຫລໄປຕາມນໍ້າ.
- ໜ່ວຍທີ່ໜຶ່ງໄດ້ໄຫລໄປຕົກຢູ່ທ່າຂອງພະຍາກຸກຸສັນໂທ(ພະຍາໄກ່) : ພະຍາໄກ່ກໍ່ເອົາໄປຝັກ
- ໜ່ວຍທີ່ສອງໄດ້ໄຫລໄປຕົກຢູ່ທ່າຂອງພະຍາໂກນາຄະມະໂນ(ພະຍານາກ) : ພະຍານາກກໍ່ເອົາໄປຝັກ
- ໜ່ວຍທີ່ສາມໄດ້ໄຫລໄປຕົກຢູ່ທ່າຂອງພະຍາກັດສະໂປ(ພະຍາເຕົ່າ) : ພະຍາເຕົ່າກໍ່ເອົາໄປຝັກ
- ໜ່ວຍທີ່ສີ່ໄດ້ໄຫລໄປຕົກຢູ່ທ່າຂອງພະຍາກໂຄຕະໂມ(ພະຍາງົວ) : ພະຍາງົວກໍ່ເອົາໄປຝັກ
- ໜ່ວຍທີ່ຫ້າໄດ້ໄຫລໄປຕົກຢູ່ທ່າຂອງພະຍາສີອະລິຍະເມດໄຕໂຍ(ພະຍາສິງ) : ພະຍາສິງກໍ່ເອົາໄປຝັກ
ໃນເມືອໄຂ່ທັງຫ້າໜ່ວຍໄດ້ແຕກອອກມາເປັນຄົນຜູ້ໃຫຍ່ກ້າໜ້າບານຂຶ້ນມາກໍ່ຄິດຢາກຈະອອກໄປບວດເປັນພະລືສີທຳມະໂພທິສັດ, ພາຍຫລັງອອກບວດແລ້ວທຸກຄົນກໍ່ມີໃຈໃສສັດທາຢາກເຫັນໜ້າບິດາມານດາຜູ້ບັງເກີດເກົ້າຂອງຕົນໂດຍທີທັງຫ້າແມ່ນບໍ່ຮູ້ວ່າພວກເຂົາມີພໍ່ແມ່ດຽວກັນມາມື້ໜຶ່ງລືສີທັງຫ້າໄດ້ມາພົບກັນຈຶ່ງໄດ້ມີການຖາມຂ່າວໂອ້ລົມສົນທະນາລະຫວ່າງກັນ ແລະ ກັນວ່າຈາກບ້ານເມືອງໃດ, ໃນເວລານັ້ນປະກົດວ່າຄວາມຕັ້ງໃຈຂອງແຕ່ລະຄົນແມ່ນຢາກເຫັນໜ້າມານດາບິດາຄືກັນອັນເປັນເລື່ອງບັງເອີນ, ໃນທັນໃດນັ້ນກໍ່ປະກົດວ່າຄວາມປາດຖະໜາດັ່ງກ່າວໄດ້ຮ້ອນເຖິງມານດາບິດາທີ່ຢູ່ເທິງສະຫວັນຊັ້ນດາວະດິງດ້ວຍເຫດນັ້ນສອງພະອົງຈິ່ງໄດ້ສະເດັດລົງມາພົບລູກທັງຫ້າ ແລະ ກ່າວຂຶ້ນວ່າມານດາບິດາຂອງພວກເຈົ້າແມ່ນພວກເຮົາກາເຜືອກນີ້ແລ້ວ, ເມື່ອລູກທັງຫ້າຮັບຮູ້ວ່າກາເຜືອກແມ່ນມານດາບິດາຂອງຕົນກໍ່ພາກັນດີໃຈ ແລະ ສະແດງຄວາມເຄົາລົບຄາລະວະຕໍ່ບັນພະບູລຸດຂອງຕົນ, ພະຍາກາເຜືອກໄດ້ເລົ່າເຫດການທັງໝົດໃຫ້ພວກລູກໆຟັງແລ້ວກັບຄືນສູ່ສະຫວັນ, ແຕ່ກ່ອນທີ່ຈະກັບລູກທັງຫ້າໄດ້ຮ້ອງຂໍໃຫ້ພະຍາກາເຜືອກທັງສອງຢຽບຫີນສິລາໃຫ້ເປັນຮອຍຕີນໄວ້ເພື່ອເປັນທີ່ເຄົາລົບບູຊາໃນຍາມຄິດຮອດຄິດເຖິງພະຍາກາເຜືອກໄດ້ສັ່ງລູກໆວ່າເພື່ອເປັນການລະນຶກເຖິງບຸນຄຸນຂອງບັນພະບູລຸດເມື່ອເຖິງເດືອນສິບເອັດເພັງຂອງທຸກໆປີໃຫ້ພວກລູກຝັ້ນຝ້າຍເຮັດເປັນຕີກາເອົາວາງໃສ່ຖ້ວຍຫລືຈານແບນແລ້ວເອົານໍ້າມັນຖອກໃສ່ໄຕ້ບູຊາແລ້ວຂຶ້ນໄປຟັງທຳມະເທດສະໜານໍາມານດາບິດາຢູ່ເທິງສະຫວັນເດີ້ລູກເດີ້!
ດ້ວຍເຫດນັ້ນ, ໃນ ມື້ຂຶ້ນ 15 ຄໍ່າ ແລະ ແຮມ 1 ຄໍ່າ ເດືອນ 11 ເພັງ ຂອງທຸກໆປີ, ລູກໆທັງຫ້າຂອງພະຍາກາເຜືອກໄດ້ກັບຄືນລົງສູ່ໂລກມະນຸດເພື່ອເຜີຍແຜ່ສິນລະທຳຄຳສອນ, ມະນຸດທັງຫລາຍຈິ່ງໄດ້ເອົາໄມ້ມາເຮັດເປັນຮູບເຮືອ, ເອົາຝ້າຍມາຝັ້ນເປັນຕີນກາໃສ່ຖ້ວຍນໍ້າມັນຢາຍເປັນຫວ່າງສະເໝີກັນເພື່ອໄຕ້ບູຊາ ຫລື ເອົາໃບຕອງ ຫລື ຕົ້ນກ້ວຍມາເຮັດເປັນຮູບດອກບົວ, ຮູບເຮືອ ຫລື ກະທົງ ແລະ ໄຫລໄປຕາມແມ່ນໍ້າເພື່ອນ້ອມລະນຶກເຖິງຄຸນມານດາບິດາ ບູຊາພະເຈົ້າທັງຫ້າພະອົງທີ່ສະເດັດລົງມາຍັງໂລກມະນຸດເພື່ອເຜີຍແຜ່ສິນລະທຳຄຳສອນ, ສຳລັບລູກພະຍາກາເຜືອກທັງຫ້າແມ່ນໄດ້ເອົາຊື່ມານດາບິດາບຸນທຳຂອງຕົນເປັນຊື່ນັບແຕ່ນັ້ນເປັນຕົ້ນມາ, ມະນຸດທັງຫລາຍຈຶ້ນຂະໜານນາມພະເຈົ້າທັງຫ້າພະອົງວ່າ : ກຸກຸສັນໂທ, ໂກນາຄະມະໂນ, ກັດສະໂປ, ສີອະລິຍະເມດໄຕໂຍ, ສະນັ້ນມະນຸດພວກເຮົາຈຶ່ງເຮັດເຮືອໄຟ, ກະໂທງດອກບົວ ເພື່ອນ້ອມລະນຶກເຖິງຄຸນມານດາບິດາ ແລະ ບູຊາພະຣັດຕະນະໄຕຣ ລວມເຖິງພຮະເຈົ້າທັງຫ້າພະອົງທີ່ສະເດັດລົງມາເຜີຍແຜ່ສິນລະທຳໃນໂລກມະນຸດ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ອິນໄຊລາວ.
