ຄວາມໝາຍ ຄວາມສຳຄັນຂອງພິທີແຫ່ຊ້າງຮຽງເກີຍ ກ່ອນບຸນປີໃໝ່ລາວ
MD Travel ທ່ຽວໄປຕາມໃຈເຮົາ
ມາຮູ້ຈັກກັບຄວາມໝາຍ ຄວາມສຳຄັນຂອງພິທີແຫ່ຊ້າງຮຽງເກີຍຂອງນະຄອນຫຼວງພະບາງ.
ຫາກທ່ານໃດໄດ້ມາທ່ຽວຊົມຖືກຊ່ວງກ່ອນບຸນປີໃໝ່ລາວທີ່ແຂວງຫຼວງພະບາງ ຫຼື ທ່ານທີ່ຢູ່ແຂວງຫລວງພະບາງເອງຄົງໄດ້ເຫັນນຳກັນໃນທຸກໆປີ ກ່ອນຈະຮອດພິທີບຸນສະເຫລີມສະຫລອງ ບຸນສົງການ ປີໃຫມ່ລາວ ທີ່ນະຄອນຫລວງພຣະບາງ ຈະຕ້ອງມີ ພິທີຂະບວນແຫ່ຊ້າງຮຽງເກີຍ ຈາກ ວັດໃຫມ່ສຸວັນນະພູມມາຣາມ ໄປຫາ ວັດຊຽງທອງ.
ຖ້າຈະເວົ້າເຖິງຄວາມໝາຍ ຄວາມສຳຄັນ ຂອງຄຳວ່າ ຊ້າງຮຽງເກີຍແລ້ວ ແມ່ນໄດ້ຄຳນີ້ມາຈາກປະຫວັດຄວາມເປັນມາອັນດົນນານ, ໂດຍສະໄໝກ່ອນແມ່ນໝາຍເຖິງ ການຝຶກແອບຊ້າງ ກ່ອນເຂົ້າສູ່ສະໜາມຮົບ ໂດຍມີຄຳເວົ້າບາງຕອນໃນພິທີຮຽງເກີຍວ່າ: ເວລາອອກສູ້ຮົບນັ້ນ ເຈົ້າຢ່າໄດ້ງວກຊ້າຍ-ງວກຂວາ ໃຫ້ໄປໜ້າຕິກໆ ຄັນໄດ້ຍິນສຽງຄົນຮ້ອງໂຮແຊວຢູ່ທາງໜ້າແມ່ນສັດຕູ.
ແລະ ຍັງມີອີກຄວາມໝາຍຫນຶ່ງ ມີຄວາມເຊື່ອກັນວ່າ ແມ່ນພິທີກຳທີ່ກ່ຽວກັບເສົາຫລັກບ້ານຫລັກເມືອງ ທີ່ມີການເຊື່ອມຕໍ່ກັນລະຫວ່າງດິນກັບຟ້າ ໂດຍມີຊ້າງເປັນພາຫະນະຂອງພຣະອິນ ຫລື ພຣະຍາແຖນ ເຊິ່ງເປັນສັນຍາລັກຂອງເຈົ້າມະຫາຊີວິດໃນຕົວລະຄອນຫລັກ, ພິທີຮຽງເກີຍຈຶ່ງເປັນພິທີກຳ ທີ່ຂຶ້ນຟ້າຂຶ້ນແຖນ ເພື່ອເປັນການຄອບລາ ຫລື ບອກກ່າວການປ່ຽນສັກກະຣາຊ ປີເກົ່າ ໄປສູ່ປີໃຫມ່.
ໃນອາດີດ ບ້ານລ້ຽງຊ້າງວັງຫລວງ ຂອງຫຼວງພຣະບາງ ກໍ່ແມ່ນ ບ້ານນາຫລວງ ແລະ ມີນາຍຄວານຊ້າງຂອງຣາຊວັງກໍ່ຄື ທ່ານ ອົ້ນ ອົ້ນສີສະຫວັດ (ໄດ້ນາມມະຍົດເປັນແສນ) ໃນເວລາທີ່ມີພິທີກັມທີ່ກ່ຽວກັບຊ້າງ ທ່ານຜູ້ນີ້ຈະເປັນຜູ້ນຳພາປະກອບພິທີການນີ້ຄື: ເວລາຊ້າງມາຮຽງເກີຍ ທ່ານຜູ້ນີ້ຈະເປັນຜູ້ກ່າວຄາຖາ ດຶງຫູຊ້າງ ແລະ ບໍລິກັມຄາຖາ ເຊັ່ນຄຳວ່າ ສັງກາດສັງຂານໃຫມ່ ທ່ານຜູ້ໃຫຍ່ ມາຖ່າຍເດືອນຖ່າຍປີ …. ( ຜູ້ຂ້າຈື່ໄດ້ແຕ່ເທົ່ານີ້ ) ຫລັງຈາກເພິ່ນກະສຽນອາຍຸແລ້ວ ເພິ່ນໄດ້ບວດເປັນສາທຸ ຢູ່ວັດນາຫລວງ ແລະ ວັດນາງຊາງ ຈົນມໍຣະນະພາບ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ: ທ່ານ ຫຸມເພັດ ມະນີສຸກ
