ຂ່າວດີ! ເປີດໃຫ້ບໍລິການແລ້ວຫໍພິພິຕະພັນແຫ່ງຊາດແຫ່ງໃໝ່.
ເຊີນຊົມ! ຫໍພິພິຕະພັນແຫ່ງຊາດ ແຫ່ງໃໝ່ໄດ້ເປີດໃຫ້ເຂົ້າຊົມຢ່າງເປັນທາງການແລ້ວ.
ຖືວ່າເປັນໂອກາດທີ່ດີທີ່ຈະໄດ້ເຂົ້າຊົມຫໍພິພິຕະພັນແຫ່ງໃໝ່ເຊິງໄດ້ເປີດໃຫ້ປະຊາຊົນໄດ້ເຂົ້າຊົມແລ້ວຫລັງຈາກການສ້າງສຳເລັດ ແລະ ຍົກຍ້າຍຈາກບ່ອນເກົ່າຢູ່ບ້ານຊຽງຍືນ ເມືອງຈັນທະບູລີ, ນະຄອນຫຼວງວຽງຈັນມາສະຖານທີ່ໃໝ່ນີ້.
ຫໍພິພິຕະພັນແຫ່ງຊາດ ແຫ່ງໃໝ່ ຕັ້ງຢູ່ບ້ານພະຂາວ ເມືອງໄຊທານີ ນະຄອນຫຼວງວຽງຈັນ ຈະເປັນບ່ອນຮວບຮວມ ແລະວາງສະແດງມໍລະດົກທາງວັດທະນະທຳ, ປະຫວັດສາດ ແລະທຳມະຊາດຂອງຊາດລາວ, ແຜ່ນດິນລາວຍຸກດຶກດຳບັນ ຈົນເຖິງປັດຈຸບັນ ເພື່ອໃຫ້ນັກທ່ອງທ່ຽວພາຍໃນ ແລະ ຕ່າງປະເທດ ນັກຮຽນ-ນັກສຶກສາ, ນັກຄົ້ນຄວ້າ ໄດ້ນັກສຶກສາຮຽນຮູ້ເຖິງຄວາມເປັນມາຂອງປະເທດລາວ.
ຫໍພິພິຕະພັນດັ່ງກ່າວ ໄດ້ເປີດບໍລິການໃຫ້ແຂກ ຫຼື ນັກທ່ອງທ໋ຽວທັງພາຍໃນ ແລະຕ່າງປະເທດ ຢ່າງເປັນທາງການ ໃນວັນທີ 6 ຕຸລາ 2020 ໂດຍການເຂົ້າຮ່ວມຕັດແຖບຜ້າເປີດງານ ຂອງເລຂາທິການສູນກາງພັກ, ເລຂາຄະນະພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ທ່ານ ສຈ.ດຣ ກິແກ້ວ ໄຂຄຳພິທູນ, ທ່ານ ບົວວົງ ຊາພູວົງ ຮອງລັດຖະມົນຕີ ຖວທ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຫໍພິພິຕະພັນດັ່ງກ່າວ ແມ່ນເປີດບໍລິການໃນວັນ ແລະ ໂມງລັດຖະການ, ບັນດາຜູ້ທີ່ເຂົ້າທ່ຽວຊົມຈະໄດ້ສຶກສາຮຽນຮູ້ເຖິງແຜ່ນດິນລາວໃນຍຸກດຶກດຳບັນ, ຍຸກກ່ອນປະຫວັດສາດ ແລະ ປະຫວັດສາດລາວສະໄໝກ່ອນລ້ານຊ້າງ, ຊຶ່ງວັດຖຸບູຮານທີ່ໄດ້ວາງສະແດງໃນຫໍພິພິຕະພັນແຫ່ງນີ້ປະກອບມີ ຊາກພືດ ແລະ ສັດ, ເຄື່ອງມືຫີນ, ກະດູກມະນຸດບູຮານ, ເຄື່ອງປັ້ນດິນເຜົາ ແລະ ອື່ນໆ ໂດຍລວມແລ້ວມີຫຼາຍກວ່າ 850 ລາຍການ.
ຫໍພິພິຕະພັນແຫ່ງຊາດເມື່ອກ່ອນ ແມ່ນຫໍວາງສະແດງມູນເຊື້ອ ຊຶ່ງໄດ້ຮັບການສ້າງຕັ້ງຂຶ້ນໃນປີ 1980 ເພື່ອສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 5 ປີ (1975-1980) ຕໍ່ມາໄດ້ປ່ຽນເປັນຫໍພິພິຕະພັນປະຕິວັດ ໃນປີ 1985, ມາຮອດປີ 2000 ໄດ້ຍົກຂືຶ້ນເປັນຫໍພິພິຕະພັນແຫ່ງຊາດ ໂດຍນຳໃຊ້ອາຄານເກົ່າທີ່ສ້າງຂຶ້ນໃນປີ 1925 ຊຶ່ງເປັນສະຖາປັດຕະຍະກຳຍຸກອານານິຄົມ;
ອາຄານເກົ່າຕັ້ງຢູ່ບ້ານຊຽງຍືນ ເມືອງຈັນທະບູລີ, ນະຄອນຫຼວງວຽງຈັນ ກົງກັນຂ້າມກັບຫໍວັດທະນະທຳແຫ່ງຊາດ ຊຶ່ງສະຖານທີ່ແຫ່ງນີ້ເຄີຍນຳໃຊ້ເປັນສະຖານທີ່ປະກາດເອກະລາດອະທິປະໄຕແຫ່ງຊາດ ຈາກການຄອບຄອງຂອງລະບອບອານານິຄົມຝຣັ່ງ ບົນຜືນແຜ່ນດິນລາວ 12 ຕຸລາ 1945.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: ວຽງຈັນທາຍ