ຂອບໃຈ! ຫວຽດນາມຊ່ວຍໄພນ້ຳຖ້ວມ ສປປ ລາວ ມອບເຂົ້າສານ 1 ພັນໂຕນ.
ຫວຽດນາມຊ່ວຍເຫລືອເຂົ້າສານ 1 ພັນໂຕນ ຊ່ວຍຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ ສປປ ລາວ.
ຈາກການທີ່ ປະຊາຊົນລາວໄດ້ຮັບຜົນກະທົບຈາກໄພນ້ຳຖ້ວມຊວງເດືອນທີ່ຜ່ານມາເຮັດໃຫ້ປະຊາຊົນລາວເຂດພາກໃຕ້ໄດ້ຮັບຄວາມລຳບາກຊັບສິນເຂົ້າຂອງເສຍຫາຍຢ່າງຫລວງຫລາຍ ແລະ ຍັງຕ້ອງການຄວາມຊ່ວຍເຫລືອຈາກລັດຖະບານ ແລະ ນ້ຳໃຈຈາກແຫລ່ງອື່ນໆ.
ລ້າສຸດໃນວັນທີ 2 ທັນວາ 2020 ຜ່ານມາ, ທີ່ດ່ານສາກົນແດນສະຫວັນ – ລາວບາວ, ຕາງໜ້າໃຫ້ຄະນະພັກ – ລັດ ແລະ ປະຊາຊົນຫວຽດນາມ ນຳໂດຍ ທ່ານ ຟາມ ຫວຽດ ຮ່າ ຮອງຜູ້ອຳນວຍການພະແນກຄຸ້ມຄອງຄັງສຳຮອງ ກົມສຳຮອງແຫ່ງລັດ ກະຊວງການເງິນ ແລະ ທ່ານ ນາງ ຫງວຽນ ທິ ໂຟ໋ ຫຍາງ ຫົວໜ້າຄັງສຳຮອງແຫ່ງລັດ ກະຊວງການເງິນ ສສ ຫວຽດນາມ ພ້ອມຄະນະ ໄດ້ນຳເອົາເຂົ້າສານ 1 ພັນໂຕນ ມາມອບໃຫ້ແຂວງສະຫວັນນະເຂດ.
ຕາງໜ້າຮັບເຂົ້າໃນຄັ້ງນີ້ໂດຍ ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ມີທ່ານເຈົ້າເມືອງພີນ, ຮອງເຈົ້າເມືອງເຊໂປນ, ພ້ອມຄະນະຫ້ອງວ່າການປົກຄອງແຂວງ, ພະແນກການຕ່າງປະເທດ ແລະ ຄະນະດ່ານສາກົນແດນສະຫວັນ ກໍຄືບັນດາຄະນະກຳມະການຕ້ານ ແລະ ຄວບຄຸມໄພພິບັດຂັ້ນແຂວງ.
ທ່ານ ຟາມ ຫວຽດ ຮ່າ ກ່າວວ່າ: ເຂົ້າສານທັງໝົດ 1 ພັນໂຕນ ເປັນເຂົ້າສານຈ້າວ ເຊິ່ງນຳມາມອບໃຫ້ແກ່ປະຊາຊົນລາວ ເວົ້າລວມ, ເວົ້າສະເພາະກໍແມ່ນປະຊາຊົນແຂວງສະຫວັນນະເຂດ ທີ່ໄດ້ຮັບຜົນກະທົບຕົວຈິງຈາກໄພນ້ຳຖ້ວມໃນເດືອນຕຸລາຜ່ານມາ ໂດຍແມ່ນນ້ຳໃຈຈາກພັກ – ລັດ ແລະ ປະຊາຊົນຫວຽດນາມທຸກຄົນ ນຳມາມອບໃຫ້ປະຊາຊົນແຂວງສະຫວັນນະເຂດ, ທັງເປັນການຮັກສາມູນເຊື້ອຄວາມສາມັກຄີພິເສດແບບອ້າຍນ້ອງໃຫ້ໝັ້ນຄົງທະນົງແກ່ນຕະຫຼອດໄປ.
ໂອກາດນີ້, ທ່ານ ບຸນລົບ ໂຄດຫຼັກຄຳ ໄດ້ຕາງໜ້າໃຫ້ອຳນາດການປົກຄອງແຂວງ ແລະ ປະຊາຊົນຊາວແຂວງສະຫວັນນະເຂດ ໂດຍສະເພາະກໍແມ່ນປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ສະແດງຄວາມຂອບໃຈຢ່າງສູງຕໍ່ການນຳພັກ -ລັດ ແລະ ປະຊາຊົນຫວຽດນາມທຸກຄົນ ທີ່ເຫັນໄດ້ຄວາມຈຳເປັນ ແລະ ຄວາມເດືອດຮ້ອນຂອງປະຊາຊົນຜູ້ທີ່ໄດ້ຮັບຜົນກະ ທົບ.
ທາງອຳນາດການປົກຄອງ ແຂວງ ກໍຄືຄະນະກຳມະການ ຕ້ານ ແລະ ຄວບຄຸມໄພພິບັດຂັ້ນແຂວງ ກໍໄດ້ມີການແບ່ງປັນຕາມຜົນເສຍຫາຍຕົວຈິງຂອງປະຊາຊົນ ແລະ ແຈກຢາຍເຂົ້າທີ່ມອບລົງໃຫ້ແຕ່ລະເມືອງ.
ໄດ້ແບ່ງປັນໄປໃຫ້ປະຊາຊົນຕາມບ້ານຕ່າງໆທີ່ໄດ້ຮັບຜົນກະທົບຕົວຈິງ ຄື: ແບ່ງປັນໃຫ້ເມືອງເຊໂປນ 125 ໂຕນ, ເມືອງວິລະບູລີ 120 ໂຕນ, ເມືອງນອງ 120 ໂຕນ, ເມືອງພີນ 120 ໂຕນ, ເມືອງຈຳພອນ 150 ໂຕນ, ເມືອງສອງຄອນ 125 ໂຕນ, ເມືອງຊົນນະບູລີ, 150 ໂຕນ ແລະ ເມືອງທ່າປາງທອງ 90 ໂຕນ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo
ຂອບໃຈແຫລ່ງທີ່ມາ ໂດຍ: laoedaily.com.la