ສ່ວນການທ່ອງ ທ່ຽວລະຫວ່າງປະເທດ, ປັດຈຸບັນ ມີຫຼາຍກວ່າ 40 ບໍລິສັດທີ່ໄດ້ຂຶ້ນທະບຽນນໍາສະພາການຄ້າ ແລະ ອຸດສາຫະກໍາແຫ່ງຊາດລາວ ເພື່ອເຂົ້າຮ່ວມການຕ້ອນຮັບນັກທ່ອງທ່ຽວຕ່າງປະເທດ, ແຕ່ໃນໄລຍະທີ່ລາວເຮົາເປີດຮັບນັກທ່ອງທ່ຽວຕ່າງປະເທດ ມີຫຼາຍປະເທດປະສົບກັບການລະບາດຂອງພະຍາດໂຄວິດ-19 ສາຍພັນໂອໄມຄຣອນ ເຮັດໃຫ້ການເດີນ ທາງຂອງນັກທ່ອງທ່ຽວຕ້ອງຢຸດສະງັກໄປ. ຢ່າງໃດກໍຕາມ ມາຮອດປັດຈຸບັນ ມີນັກທ່ອງທ່ຽວຈໍານວນໜຶ່ງຈາກ ສ.ເກົາ ຫລີ ແລະ ປະເທດອື່ນໆ ໄດ້ເຂົ້າມາທ່ອງທ່ຽວໃນເຂດທ່ອງທ່ຽວສີຂຽວຂອງລາວແລ້ວ.

ອັດຕາການສັກວັກຊີນປ້ອງກັນເຊື້ອພະຍາດໂຄວິດ-19 ຢູ່ບາງທ້ອງຖິ່ນທີ່ເປີດເປັນເຂດທ່ອງທ່ຽວສີຂຽວຍັງບໍ່ບັນລຸຕາມຄາດໝາຍ, ຄວາມເຂົ້າໃຈຂອງສັງຄົມຕໍ່ເຂດທ່ອງທ່ຽວສີຂຽວ ແລະ ເສັ້ນທາງທ່ອງທ່ຽວສີຂຽວບໍ່ທັນເລິກເຊີ່ງ, ຄວາມພ້ອມຂອງຫຼາຍຂະແຫນງການໃນການກະກຽມຕ້ອນຮັບນັກທ່ອງທ່ຽວບໍ່ທັນດີ, ສະຖານປິ່ນປົວໃນກໍລະນີມີນັກທ່ອງທ່ຽວຕ່າງປະເທດຕິດເຊື້ອພະຍາດໂຄວິດ-19 ເຖີງວ່າສາມາດຮອງຮັບໄດ້ແຕ່ຄວາມພ້ອມບໍ່ທັນສູງເທົ່າທີ່ຄວນ.

ນອກຈາກນີ້ ລາວເຮົາຍັງອາໃສເສັ້ນທາງຂອງປະເທດອື່ນເພື່ອເຊື່ອມໂຍງການທ່ອງທ່ຽວເຂົ້າມາລາວເຊີ່ງອາດເຮັດໃຫ້ການເດີນທາງຂອງນັກທ່ອງທ່ຽວຕ່າງປະເທດມີຄວາມຫຍຸ້ງຍາກສົມຄວນ.