ໃນວັນທີ 20 ທັນວາ 2022 ນີ້, ກະຊວງການເງິນ ຈັດກອງປະຊຸມສະຫລຸບ ການຈັດຕັ້ງປະຕິບັດວຽກງານຂອງຂະແໜງ ການເງິນປະຈຳປີ 2022 ແລະ ທິດທາງແຜນການປີ 2023, ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີຜູ້ຕາງໜ້າຈາກກະ ຊວງ, ອົງການ, ຫົວໜ້າພະແນກການແຂວງໃນຂອບເຂດທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ ໄດ້ດຳເນີນໃນທ່າມກາງສະພາບແວດລ້ອມທີ່ມີຄວາມຫຍຸ້ງຍາກຫລາຍປະການ, ແຕ່ຄະນະພັກ ແລະ ບັນດາກະຊວງ ແລະ ອົງການປົກ ຄອງທ້ອງຖິ່ນແຕ່ລະຂັ້ນ ໄດ້ຍົກສູງຄວາມຮັບຜິດຊອບ ແລະ ເອົາໃຈໃສ່ນຳພາ-ຊີ້ນຳ ການຈັດຕັ້ງປະຕິ ບັດງົບປະມານແຫ່ງລັດປະຈຳປີ 2022

ໂດຍໄດ້ບຸກທະລຸເຂົ້າສູ່ວຽກງານຕົວຈິງ ດ້ວຍການວາງນະໂຍ ບາຍ, ນິຕິກໍາ ແລະ ກົນໄກການຈັດຕັງປະຕິບັດຢ່າງລະອຽດຈະແຈ້ງ ແລະ ສອດຄ່ອງກັບສະພາບຕົວຈິງ ອັນທີ່ພົ້ນເດັ່ນ ແມ່ນການຍົກລະດັບການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ເປັນວາລະແຫ່ງຊາດ

ໂດຍສະເພາະການອັດຊ່ອງວ່າງການຮົ່ວໄຫລ, ນະໂຍບາຍປະຢັດ ແລະ ຕ້ານການຟຸມເຟືອຍເຂົ້າສູ່ລວງເລິກໃນການປະຕິບັດແຜນງົບປະມານແຫ່ງລັດປະຈໍາປີ 2022 ສາມາດປະຕິ ບັດ ໄດ້ຕາມແຜນ ແລະ ລື່ນແຜນສະພາແຫ່ງຊາດຮັບຮອງ

ພ້ອມທັງສຸມໃສ່ປ້ອງກັນ, ຄວບຄຸມການແພ່ລະບາດຂອງພະຍາດໂຄວິດ-19 ກໍຄື ແກ້ໄຂຜົນກະທົບຕໍ່ການພັດທະນາເສດຖະກິດ-ສັງຄົມ, ສາ ມາດຮັບປະກັນສະຖຽນລະພາບທາງດ້ານການເມືອງໄວ້ໄດ້ຢ່າງໜັກແໜ້ນ, ການພັດທະນາເສດຖະກິດ -ສັງຄົມແຫ່ງຊາດ ຢູ່ປະເທດເຮົາ ສືບຕໍ່ດຳເນີນຢ່າງຕໍ່ເນື່ອງ, ຄາດຄະເນວ່າໝົດປີຈະສູ້ຊົນໃຫ້ GDP ຂະຫຍາຍົວໃນລະດັບ 4,4%.

ພ້ອມນັ້ນ ກໍເຫັນໄດ້ຈະແຈ້ງບັນຫາຂໍ້ຄົງຄ້າງທີ່ຕ້ອງສຸມໃສ່ແກ້ໄຂຢ່າງເອົາຈິງເອົາຈັງ ແລະ ເປັນລະບົບ ຄື: ສືບຕໍ່ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ບັນຫາໜີ້ສິນທີ່ສະສົມມາຍາວນານ, ອັດຕາແລກປ່ຽນສະກຸນເງິນຕ່າງໆ, ອັດຕາເງິນເຟີ້ ແລະ ຄ່າຄອງຊີບ. ບັນຫາສຳຄັນທີ່ສຸດແມ່ນພວກເຮົາຕ້ອງຮັບຮູ້ຢືນຢັນ ຕໍ່ຜົນສຳເລັດທີ່ຍາດມາໄດ້ ແລະ ຕ້ອງຮັບຮູ້ເຖິງບັນຫາທີ່ເປັນພື້ນຖານຈຸດອ່ອນຂໍ້ຄົງຄ້າງ ທີ່ຈະພາໃຫ້ພວກເຮົາມີຄວາມຫຍຸ້ງຍາກ.

ທ່ານລັດຖະມົນຕີກະຊວງການເງິນ ໄດ້ກ່າວຕື່ມວ່າ: ກອງປະຊຸມຄັ້ງນີ້ ຈະໄດ້ສະເໜີບາງບັນຫາທີ່ຄວນເອົາໃຈໃສ່ ໂດຍສະເພາະ ຕີລາຄາສະພາບການຈັດຕັ້ງປະຕິບັດ ແຜນງົບປະມານແຫ່ງລັດປີ 2022 ເປັນຕົ້ນ ການຂຸດຄົ້ນທ່າແຮງບົ່ມຊ້ອນທີ່ພວກເຮົາເກັບ ເຂົ້າງົບປະມານແຫ່ງລັດຢ່າງພາວະວິໄສ, ຕ້ອງຮັບຮູ້ ແລະ ກ້າຮັບຜິດຊອບຕໍ່ຜົນສຳເລັດ ແລະ ກ້າຕຳນິວິຈານສິ່ງທີ່ພວກເຮົາເຮັດບໍ່ໄດ້ດີ ເຮັດໃຫ້ເກັບລາຍຮັບບໍ່ຄົບຖ້ວນ, ເກັບແລ້ວບໍ່ມອບ, ຮົ່ວໄຫລໃນຫລາຍຂອດຂັ້ນ, ຫລາຍຂົງເຂດທີ່ຍັງສະສົມມາບໍ່ໄດ້ຖືກແກ້ໄຂ

ເກັບລາຍຮັບບໍ່ສົມຄູ່ກັບທ່າແຮງບົ່ມຊ້ອນ ທ່າແຮງທີ່ພວກເຮົາມີ ເປັນຕົ້ນ ໃນຂົງ ເຂດຊັບພະຍາກອນທຳມະຊາດ, ແຮ່ທາດ, ພະລັງງານ, ການນຳເຂົ້ານໍ້າມັນເຊື້ອໄຟ, ອຸປະກອນກໍ່ສ້າງ, ເຄື່ອງໄຊ້ໄຟຟ້າ, ເຄື່ອງອຸປະໂພກ-ບໍລິໂພກ ແລະ ອື່ນໆ ນີ້ຕ້ອງໄດ້ຕີລາຄາຢ່າງມີຄວາມຮັບຜິດຊອບສູງ ເພື່ອເຫັນໄດ້ບັນຫາທີ່ເຮົາຕ້ອງຕັດສິນໃຈເດັດຂາດແກ້ໄຂ ເພື່ອຂຸດຄົ້ນທຸກທ່າແຮງບົ່ມຊ້ອນຖານລາຍຮັບໃຫ້ໄດ້ເພີ່ມຂຶ້ນຢ່າງຈະແຈ້ງ ຊັດເຈນ.

ພ້ອມນີ້, ຄວາມຈໍາເປັນໃນການຜັນຂະຫຍາຍ ແລະ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ເປັນບັນຫາທີ່ສະສົມມາຢ່າງຍາວນານບໍ່ທັນໄດ້ຮັບການແກ້ໄຂ ເປັນຕົ້ນ ແມ່ນບັນຫາໜີ້ສິນສາທາລະນະພາຍໃນ ແລະ ຕ່າງປະເທດ ສູງເກີນຄວາມສາມາດທີ່ຈະແກ້ໄຂໄດ້ໃນໄລຍະສັ້ນ, ບັນຫາການລະເມີດວິໄນການເງິນ, ການອັດຊ່ອງວ່າງການຮົ່ວໄຫລການຂຸດຄົ້ນທຸກແຫລ່ງລາຍຮັບທີ່ບົ່ມຊ້ອນ ກໍຄືຕາມຄໍາສັ່ງເລກທີ 18/ນຍ

ເພື່ອສ້າງລາຍຮັບພາຍໃນໃຫ້ເພີ່ມຂຶ້ນ ຕາມທ່າແຮງທີ່ມີ ແລະ ສະພາບການຮົ່ວໄຫລການເກັບລາຍຮັບຍັງເກີດຂຶ້ນຢ່າງແຜ່ລາມ, ການປະຕິບັດ ແລະ ຕ້ານການຟຸ່ມເຟືອຍ ຕາມດໍາລັດເລກທີ 205/ລບ ເພື່ອຫລຸດຜ່ອນການຂາດດຸນງົບປະມານ, ການລະດົມທຶນ ເພື່ອການພັດທະນາ ແລະ ດຸ່ນດ່ຽງງົບປະມານ ທັງໝົດນັ້ນ ເປັນບັນຫາພື້ນຖານທີ່ເຫັນວ່າ ໝົດທຸກພາກສ່ວນຂະແໜງການສູນກາງ, ທ້ອງຖິ່ນ ແລະ ທົ່ວສັງຄົມຕ້ອງໄດ້ເຂົ້າຮ່ວມຕາມພາລະບົດບາດ ເພື່ອໃຫ້ມີສ່ວນຮ່ວມຂອງທຸກພາກສ່ວນ ເສດຖະກິດ-ສັງຄົມໃນການແກ້ໄຂບັນຫາ.

ກອງປະຊຸມຄັ້ງນີ້, ໄດ້ຮັບຟັງການລາຍງານ, ເຜີຍແຜ່ ແລະ ແນະນຳບັນດາເອກະສານທີ່ສຳຄັນ ເປັນຕົ້ນ ສະຫລູບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ແລະ ທິດທາງແຜນການປະຈຳປີ 2023, ມະຕິຂອງສະພາແຫ່ງຊາດ ສະບັບເລກທີ 63/ສພຊ ລົງວັນທີ 9 ທັນວາ 2022 ແລະ ຮ່າງຄຳແນະນຳການຈັດຕັ້ງປະຕິບັດແຜນງົບປະມານແຫ່ງລັດປີ 2023, ການຈັດຕັ້ງປະຕິບັດວາລະແຫ່ງຊາດວ່າດ້ວຍ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນໃນໄລຍະຜ່ານມາ ແລະ ທິດທາງແຜນ ການປີ 2023, ຮ່າງຂໍ້ຕົກລົງ ວ່າດ້ວຍກຳນົດໝາຍງົບປະມານຂອງລັດ, ການປະຢັດ ແລະ ຕ້ານການ ຟຸມເຟືອຍ (ດຳລັດ ສະບັບເລກທີ 205/ລບ ແລະຂໍ້ຕົກລົງ ສະບັບເລກທີ 4000/ກງ (ສະບັບປັບປຸງ), ເຜີຍແຜ່ແນະນຳ ດຳລັດ ສະບັບເລກທີ 599/ລບ, ລົງວັນທີ 29 ກັນຍາ 2022 ວ່າດ້ວຍລົດຂອງລັດ ແລະ ການສະເໜີປັບປຸງນິຕິກຳກ່ຽວກັບວຽກງານສາມສ້າງ. ພ້ອມກັນນີ້, ໃນກອງປະຊຸມ ຍັງຈະໄດ້ຮັບຟັງການສະເໜີ ແລະ ແນະນຳວຽກງານວິຊາສະເພາະຈາກກົມວິຊາການ ຂອງກະຊວງການເງິນຈຳນວນໜຶ່ງ.

ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ DooDiDo

ຂອບ​ໃຈແຫຼ່ງຂໍ້ມູນຈາກ: ກະຊວງການເງິນ